1 Mel 21 - JAM DE NHIALIC 2011

Dom de Naboth

¹ Na ɣɔn, aacï kake jɔ thök, Naboth raan ë Jedhreel ade nɔm dom e tim de enap, dom nu ë Jedhreel, tëthiääk ke baai de Aɣap melik de Thamaria.

² Go Aɣap jam kekë Naboth, lueel, an, “Gämë yɛn domduön ë enap, bï ya domdiën ë wal, në luɔi thiëëk en ke ɣöndï, ku yïn bä gäm dom ë enap dom ŋuän ë ye, ku na piɛth tëde yïn, ke yïn bä gäm wëu röŋ ke yen.”

³ Go Naboth jam de Aɣap bɛ̈ɛ̈r, an, “Yɛn cï kuëëŋ ë Nhialic luɔi cän yïn bï gäm piny, piny aa lak tëde kuarkuɔ!”

⁴ Go Aɣap lɔ ɣönde ku nɛ̈k e nyin ke cï piɔ̈u diu, në jam cï lɛ̈k en ë Naboth raan de Jedhreel, luɔi cï en e lueel, an, cïï bï gäm kë cä lɔ̈ɔ̈k lak tëde kuarken. Go lɔ tɔ̈c në agende nɔm, ku wel e nyin wei, ku cïï cäm.

⁵ Na wën, ke Jedhebel tiiŋde ë lɔ tëde yen le ku thiëëc, an, “Eeŋö cï yïn piɔ̈u jiɛth aya, ku cïï cäm?”

⁶ Go yɔ̈ɔ̈k, an, “Yɛn ë jam wokë Naboth raan ë Jedhreel, guɔ yɔ̈ɔ̈k, an, Gämë yɛn domduön ë enap në wëu ku na ŋuɛ̈ɛ̈n tëde yïn, ke yïn bä wɛ̈ɛ̈r dom däŋ ë enap go bɛ̈ɛ̈r, an, yïn cä bï gäm domdiën de enap!”

⁷ Go yɔ̈ɔ̈k ë tiiŋdɛn Jedhebel, an, “Cie yïn nu ë ciɛɛŋ ë Yithriɛl nɔm ënɔɔnë? Jɔt rɔt, cämë, ku tɔ yïpiɔ̈u mit yïn bä gäm dom de enap de Naboth raan ë Jedhreel!”

⁸ Na wën, ke gäär awereek ë rin ke Aɣap, ku boot kethook në rin ke Aɣap, ku tɔ awereek yïnë röördït ku bäny ke baai, kɔc rɛ̈ɛ̈r në Naboth ë pänydït yic.

⁹ Ku acï gɔ̈ɔ̈r awereek yiic, an, “Luɛlkï kööl bï kɔc cool ke ke cïï cäm, ku tääukï Naboth tëpiɛth ë kɔc yiic cil.

¹⁰ Ku bɛ̈ɛ̈ikï kɔc de gup anäinäi kaarou ë yenɔm bïk aa cäätɔɔ luel ater në yen, në baŋ cï yen Nhialic lat, ku lat melik. Ku jakï lɛɛr ë wut këc biic lak biɔ̈ɔ̈k ë kur abï thou.’

¹¹ Go kɔc ke wunden, ayï röördït ku bäny ke baai, agokï looi cït man ë jam cï Jedhebel tɔ yïnë keek, ku cït man de jam cï gɔ̈ɔ̈r në awereek cï tɔ yïnë keek.

¹² Agokï kööl bï kɔc cool ke ke cï cäm caal, ku tɛ̈ɛ̈ukï Naboth tëpiɛth ë kɔc yiic cil.

¹³ Na wën, ke kɔc kaarou ke ke bɔ̈, kɔc de gup anäinäi, bïkkï ku nyuckï ë yenɔm, ku jɔkï cäk thok, luelkï ater në yen an cï Naboth Nhialic läät, ku lɛ̈ɛ̈t melik. Na wën, ke jɔkï jat biic në wut këc, lek biɔ̈ɔ̈k ë kur, abï thou.

¹⁴ Ku tɔkï Jedhebel yïnë thok, an: “Naboth ë biɔ̈ɔ̈k, ka cï thou.”

¹⁵ Na wën, aacï Jedhebel e piŋ nɔn cï Naboth biɔ̈ɔ̈k ka acï thou, ke Jedhebel ë yöök Aɣap, an, “Jɔt rɔt, nöm dom de enap, dom ë Naboth raan ë Jedhreel, dom wään cï pɛ̈n yïn ë wëu: Naboth acï thou.”

¹⁶ Na wën, aa piŋ Aɣap nɔn cï Naboth thou, ke nöm dom de enap, dom ë Naboth raan ë Jedhreel.

¹⁷ Na wën, ke jam ë Bɛ̈nydït bɔ̈ tëde Elija tiët de Nhialic raan wun ë Ticibe, lueel, an,

¹⁸ “Jɔt rɔt, lɔ kaŋ Aɣap nɔm melik de Yithriɛl, nu ë Thamaria: yeka, nu dom de enap, dom ë Naboth, ë lɔ thïn le nööm.

¹⁹ Ku bä lɛ̈k en an, ‘Acïï Bɛ̈nydït lueel, an, ‘Cï raan nɔ̈k, ku nöm kake ayadäŋ?’ Ku abä yɔ̈ɔ̈k, an, ‘kë luɛɛl kï, an: ‘Të cï jɔ̈k riɛm ë Naboth lap thïn, yen abï jɔ̈k riɛmdu lap thïn!”’

²⁰ Go Aɣap Elija thiëëc, an, “Cï ya yök, yïn raandiën de ater?” Go bɛ̈ɛ̈r, an, “Yïn cä yök, në luɔi cï yïn rɔt gam bä kërac looi ë Bɛ̈nydït nyin.

²¹ Yen alëk ë Bɛ̈nydït yïn an, ‘Yïn bä tɔ yök kërac. Yïn bä riɔ̈ɔ̈k, ku näk mïthwät ëbɛ̈n dhiëndu, dhuök ku röördït.

²² Ku dhiëndu abä tɔ cït dhiën ë Jerobowam wën ë Nebat, ku ta cït dhiën ë Baaca wën ë Aɣija, në kë cï yïn A tɔ göth, ku cï Yithriɛl tɔ loi kërac.’

²³ Ku lueel Bɛ̈nydït në këde Jedhebel aya, an, “Jɔ̈k abïk Jedhebel cuet ë pänydïït ë Jedhreel lɔ̈ɔ̈m.

²⁴ Ku raanden ë yï Aɣap bï thou ë pänydïtic abïï jɔ̈k cuet, ku raan lɔ thou roor abïï diɛt ŋueet.”

²⁵ (Acïn raan cï rɔt gam taitai looi kërac ë Nhialic nyin cït Aɣap ku yen këde piɔ̈n ë tiiŋdɛn Jedhebel ka

²⁶ Acï kërɛɛc mɛɛn Bɛ̈nydït looi, në luɔi yen yiëth lam, cït kë ɣɔn ye kɔc ke Amor looi, kɔc ɣɔn cïï Bɛ̈nydït thiäi wei në Yithriɛl nɔm).

²⁷ Wën jɔ Elija thök ë jam, go Aɣap lupɔɔ ke yen kɔ̈u rɛtiic në jiɛthëpiɔ̈u, ku bïï ke biic ë yekɔ̈u ku pot rɔt në ŋeth, ku reec cäm ku tɔ̈ɔ̈c ë ŋethic, ku jiël ke cï rɔt tak në kë ë lui yë.

²⁸ Go Bɛ̈nydït lɛ̈k tiët Elija raan wun ë Ticibe an,

²⁹ “Kënë tïŋ luɔi cï Aɣap rɔt kuɔɔr piny në Yanɔm? Nɔn cï yen ee kënë looi Yɛn cïï riääk bï bɛ yiɛ̈n en në akööl ke pïïrde yic, Yɛn bï riääk bɛ̈ɛ̈i baai de Aɣap në akööl ke wɛ̈ɛ̈tke yiic.