1 Mel 19 - JAM DE NHIALIC 2011

Elija anu ë Kuur de Thinai nɔm

¹ Go Aɣap Jedhebel lɛ̈k käŋ kedhie ka cïï Elija looi, ku luɔi cï en tït ke Baal nɔ̈k kedhie në abätäu.

² Go Jedhebel tuc tuöc Elija, lueel an, “Yɛn cï kuëëŋ në rin ke yiëth, na kɛ̈n wëiku tɔ cït wëi ke raan töŋ ee kɔckë yiic miäk wälë.”

³ Na wën, aacï Elija kënë piŋ, ke riɔ̈c ku jɔt rɔt, ku jiël kekë lïmde ke bɛ̈ɛ̈k wëike, le Biirceba, paan ë Juda. Ku nyiëëŋ raan ee ye luööi ëtɛ̈ɛ̈n.

⁴ Ku le roor guöpde ciɛth ë akööl tök, le ku nyuuc ë tim thar, ku jɔ rɔt läm thuɔɔu lueel an, “Ë loi, ënɔɔnë, Bɛ̈nydït, nyaaiyë wëikï yɛn cïï kuarkuɔ wär!”

⁵ Na wën, aacï tɔ̈c, niin, ë tim thar dï, ke jɛk tunynhial, yöök, an, “Jɔt rɔt, cämë.”

⁶ Go liec, ke tïŋ kuïn cï pam cï nyop ë cool, ku gul ë pïïu ë yenɔm. Go cam ku dëk, ku be lɔ tɔ̈c.

⁷ Na wën, ke tunynhial ë Bɛ̈nydït be bɛ̈n ë bɛ̈n ee kek rou, bïï ku jiɛk, lueel, an, “Jɔt rɔt, cämë, yïn bï cäth tiaam.”

⁸ Go Elija rɔt jɔt, ku ciëm ku dëk, na wën, ke jɔ cath ë riɛl ë kuïnë akööl yiic kathiërŋuan ku wɛ̈ɛ̈r yiic kathiërŋuan le Thinai, kuur ë Nhialic.

⁹ Ku le ë köŋ ë kuuric, le rëër thïn Na wën, ke jam ë Bɛ̈nydït bɔ̈ tëde yen ëthiäu, yöök, an, “Eeŋö loi eenë. Elija?”

¹⁰ Go lueel, an, “Yɛn göth arëët ë baŋ de Bɛ̈nydït Nhialic de Rɛm, në kë cï kɔc ke Yithriɛl löŋduön cï mac pɔ̈l, ku thuurkï ɣäänkuön ke läm piny, ku näkkï tïtku në abätäu ku ja döŋ yatök ë giliŋ, ku akɔɔrkï wëikï, bïk a nɔ̈k.”

¹¹ Go ë Bɛ̈nydït lɛ̈k en, an, “Lɔɔ, ku kääcë ë kuur nɔm ë Bɛ̈nydït nɔm.” Go Bɛ̈nydït tëëk, go yom dïït ril ago kur ɣääriic ku dhoŋ kur kor ë Bɛ̈nydït nɔm, ku Bɛ̈nydït acïï nu ë yomic: na wën, aacï yom wan, ke piny nieŋ rɔt, ku Bɛ̈nydït ë cïï nu të nieeŋ piny ë rɔt.

¹² Ku be mac bɛ̈n, ku Bɛ̈nydït aliu ë macic: ku be aa röl thiin jam ëmääth.

¹³ Na wën, aacï Elija ye piŋ, ke dut e nyin ë lupɔdɛn ë kɔ̈u, ku le biic, le kɔ̈ɔ̈c ë kök thok. Go röl bɛ̈n tëde yen, lueel, an, “Eeŋö loi eenë, Elija?’

¹⁴ Go lueel, an, “Yɛn cï tiɛɛl dɔm Bɛ̈nydït Nhialic de Rɛm, në kë cï kɔc ke Yithriɛl löŋduön cï mac pɔ̈l, ku thuurkï ɣäänkuön ke läm piny, ku näkkï tït ke Nhialic në abätäu, ku ja döŋ yatök ë giliŋ ku akɔɔrkï wëikï bïk a nɔ̈k.”

¹⁵ Go Bɛ̈nydït lɛ̈k en, an, “Pɔ̈kë yïnɔm ë kueerdu yic lɔ në jɔ̈ɔ̈r ë Damathko yic, ku na cï jɔ lɔ, ke yï tɔc Ɣadhiɛl bï ya melik de Thiriya,

¹⁶ ku Jeɣu wën ë Nimci abä tɔc ke ye melik de Yithriɛl, ku Elica wën ë Capat de Abel Meɣola abä tɔc bï ya tiët ë Nhialic ë nyinduyic.

¹⁷ Ku raan lɔ poth në abätäu de Ɣadhiɛl thok, abï Jeɣu nɔ̈k, ku raan lɔ poth në abätäu de Jeɣu thok abï Elica nɔ̈k.

¹⁸ Ku yɛn cï rɔt bɔ̈th aguum kadhorou 7,000 në Yithriɛl, kɔc kën kemiɔl tuök Baal ëbɛ̈n, ku kënkï ciim ë kethook.”

Cɔ̈t de Elica

¹⁹ Go jäl ëtɛ̈ɛ̈n le ku yök Elica wën ë Capat apur në miöör cï ke rek yiëth në tiim, miöör kathiëër ku rou, ku apur në miɔɔr wën ee kek thiëër ku rou. Go Elija tëëk ë yelɔ̈ɔ̈m le ku cuët lupɔde ë yekɔ̈u.

²⁰ Go miöör pɔ̈l, ku kɔt ke lɔ Elija cök, le ku lueel, an, “Yïn läŋ, ë ya kɔn wäär ku maar lɔ tɔ̈ɔ̈ŋ, ku bä yïn jɔ kuany cök.” Go yɔ̈ɔ̈k, an, “Apiɛth lɔɔr ciëën, yïn cä pɛ̈n!”

²¹ Go rɔt puk, ku nööm miöör cï mac yiëth ë tiim tëtök, ku nɛ̈k keek, ku thɛɛl rïŋken në tiim ee miöör mac yiëth, ku gëm ke kɔc, ago kɔc ke cuet. Ku jɔ rɔt jɔt, biɔɔth Elija, ku ye luööi.