1 Mel 18 - JAM DE NHIALIC 2011

Elija kekë Tït ke Baal

¹ Na ɣɔn aacï nïn juëc tëëk, ke lëk ë Bɛ̈nydït Elija an, “Lɔ nyuöthë rɔt melik Aɣap, ku Yɛn bï deŋ tɔ tueny.

² Go Elija lɔ lee rɔt nyuöth Aɣap, ku cɔk aacï jɔ dït aläl në Thamaria.

³ Go Aɣap Obadaya cɔɔl, raan nu në luɔi ë ɣöndïït ë melik nɔm (Ku Obadaya aaye raan cï rɔt gäm Bɛ̈nydït aläl,

⁴ ka wään nɛ̈k ë Jedhebel tït ke Bɛ̈nydït. Obadaya acï bɔt ë tït ke Nhialic bɛ̈n jɔt le ke thiaan ë kɔ̈kiic ë kuriic, köŋë ke thiërdhïc ku köŋë ke thiërdhïc pei, ku ye ke miɔɔc në kacaam ku pïïu).

⁵ Go Aɣap lɛ̈k Obadaya an, “Lok ciɛɛthku pinyic ëbɛ̈n, ku nyïïniic ke pïïu ëbɛ̈n na de të bïï wo wal lɔ yok, wal bï jöŋgöör muk wëi ayï mul, na de të bï läi pïïr kedhie ke cïn kë bï thou.”

⁶ Agokï röt tɛ̈k të bï ŋɛk lɔ caath. Go Aɣap lɔ ë baŋ tök, ku lɔ Obadaya ë baŋ däŋë.

⁷ Na wën ke Obadaya räm kekë Elija kueer. Go Obadaya ye ŋic, ago guŋ ë yenɔm ku lop, an, “Ee yïn bɛ̈nydï Elija?”

⁸ Go Elija bɛ̈ɛ̈r, an, “Ɣɛɛ, ee yɛn Elija. ‘Lɔ lɛ̈kë bɛ̈nydu luɔi nu yɛn eenë.”’

⁹ Go Obadaya bɛ̈ɛ̈r, an, “Eeŋö cä wööc kë kɔɔr yïn nääk bï Aɣap a nɔ̈k?

¹⁰ Yɛn ë kuëëŋ në rin ke Bɛ̈nydït pïïr, Nhialicdu acïn ciɛɛŋ ayï jur kën ë melik yï tɔ kɔɔr thïn, ku të cïï bɛ̈ny ee ciɛɛŋë ayï jurë ye lueel nɔn liiu yïn pinyde, aye Aɣap luöi gutguut nɔn kën ë yï yök ë yic.

¹¹ Ku ënɔɔnë akɔɔr nɔn bän e lɔ lɛ̈k en nɔn nu yïn eenë?

¹² Ku na ja jäl ku jɔ Wëi ke Bɛ̈nydït yï guɔ lɔ̈ɔ̈k gap të cïï ŋic? Ku ja lɔ lɛ̈k Aɣap luɔi nu yïn eenë, ku cïï yï bï bɛ̈n yök, abï ya nɔ̈k.

¹³ Kɛ̈në piŋ luɔi ë cän bot ë tït lɔ thiaan në kɔ̈kiic, thiërdhïc ë köŋë yic ku thiërdhïc ë köŋë yic wään nɛ̈k ë Jedhebel tït ke Bɛ̈nydït, ku miaac ke në kacaam ku pïïu?

¹⁴ Ka duɛ̈ɛ̈r lɔ lɛ̈k ɛn adï na la lɛ̈k melik nɔn nu yïn eenë? Abï ya nɔ̈k!”

¹⁵ Go Elija bɛ̈ɛ̈r an, “Yɛn ë kuëëŋ në Bɛ̈nydït de rɛm, Raan ya luööi nɔn bän rɔt nyuöth melik ee köölë.”

¹⁶ Go Obadaya lɔ të nu melik Aɣap le lëk en. Go Aɣap jäl ke lɔ të nu Elija.

¹⁷ Na wën aa tïŋ ë Aɣap Elija kë lɛ̈k en an, “Yï kï, yïn raan cï Yithriɛl noon?”

¹⁸ Go Elija pɔ̈k nɔm en, an, “Acie yɛn ë non Yithriɛl, ee yïn wekë baai de wuur. Wek ë lööŋ ke Bɛ̈nydït pɔ̈l ku lamkï yiëth ke Baal.

¹⁹ Ku ënɔɔnë, määtë kɔc ke Yithriɛliic ku tɔ ke biɔɔth ɛn ë kuur ë Karmel nɔm, ku bɛ̈ɛ̈iyë tït ke Baal ayadäŋ bot kaŋuan ku thiërdhïc 450, ku tït ke Acera bot kaŋuan 400, kɔc mät në Jedhebel.”

²⁰ Go Aɣap kɔc ke Yithriɛl tɔ lɔ ë kuur ë Karmel nɔm ayï tït ke Baal.

²¹ Go Elija bɛ̈n ë kɔc lɔ̈m tëthiɔ̈k, ku lueel, an, “Bäk tök jɔ dɔm nɛn? Na ee Bɛ̈nydït yen ee Nhialic, ke kuanykï cök, ku na ee Baal yen ee Nhialic, ke kuanykï cök!” Go kɔc ciën kë cïk puk nɔm.

²² Go Elija lueel, an, “Yɛn aye tiët ë Bɛ̈nydït cï döŋ yatök, ku tït ke Baal ayek bot kaŋuan ku thiërdhïc.

²³ Gämkï wo miöör kaarou, ku takï tït ke Baal nöm tök, nɛ̈kkï, ku ë dhɔ̈ɔ̈rkï ë tiim, ku tɛ̈ɛ̈ukï tiim kɔ̈ɔ̈th, ku cïn many kothkï, ku yɛn bï miɔɔr däŋë nööm ku dhäär ë tiim nïïm ku tääu ë tiim kɔ̈ɔ̈th ayadäŋ ku acïn many bä kooth.

²⁴ Ku në tït ke Baal ë ke läŋ yanhden, ku yɛn bï Bɛ̈nydït lɔ̈ŋ, ku Nhialic lɔ lɔ̈ŋ piŋ ku tuuc mac piny nhial yen aye Nhialic.” Go kɔc gam kedhie ku luelkï an apiɛth.

²⁵ Go Elija lɛ̈k tït ke Baal, an, “Wek juëc, kankï miɔɔrdun nööm tueŋ, ku kiëëtkï, ku läŋkï yanhdun, ku duökï de many tääukï ë tiimiic.

²⁶ Gokï miɔɔr cï gäm ke nööm, ku kïïtkï, ku läŋkï Baal, aake gɔl lɔ̈ŋ ɣɔn amiäk abï akɔ̈l rɔt puk. Aake ye cööt aläl, an, “Baal piŋ jamda!” Colkï ke ke riäŋ ke ke geeu yïïŋ cïk yïkë piny. Ago ciën röl piŋkï, ku cïn raan piŋ këden.

²⁷ Na wën aacï akɔ̈l rɔt puk, ke dɔl ë Elija kegup, lueel, an, “Kiëtkï aläl në röldït, yen ee yath! Adhil lɔ̈ŋ aläl, ku nɔn cï lɔ ë pänydït këc biic, ku nɔn cï keny, ku nɔn niin ka kɔɔr bï pɔ̈ɔ̈c!”

²⁸ Agokï lɔ̈ŋ në röldït, ku temkï kegup në leem ku abätɛ̈ɛ̈u cït man ye kek e looi ëcaŋawën, agut të bïï riɛm wat.

²⁹ Gokï cool ë wou ë ke riäŋ abï akɔ̈l thëi, ku cïn raan piŋ këdäŋ, ku cïn röl cï bɛ̈n piŋ.

³⁰ Go Elija lɛ̈k kɔc kedhie, an, “Cuötkï röt tënu yɛn. Go kɔc röt cuöt en kedhie. Go yïïŋ de Bɛ̈nydït wään cï wiɛt pinyë kiɛm piny.

³¹ Go kur kathiëër ku rou nööm cït man ë kuën ë dhiëën ke wɛ̈ɛ̈t ke Jakop raan wään cïï Bɛ̈nydït cäk rin an, Yithriɛl.

³² Ku yïk yïïŋ bï Bɛ̈nydït aa lam në kurkë, ku wec awuöl wil en yïk piny, awuöldïït duëër kacït töny ke pïïu lɛɛr kadhetem.

³³ Ku guiir tiim ë yïk nɔm, ku dhɔ̈ɔ̈r miɔɔr në tiim ku tɛ̈ɛ̈u ë tiim kɔ̈ɔ̈th, ku lueel an, “Thiäŋkï töny kaŋuan ë pïïu ku wälkï ke ë miɔɔr kɔ̈u ayï tiim kɔ̈ɔ̈th

³⁴ Ku be lɛ̈k keek, an, “Bɛkï ke thiɔ̈ɔ̈ŋ, ku bɛkï keek wäl.” Agokï bɛ looi në kë ye kek rou. Go bɛ lɛ̈k keek, an, “Bɛkï ke nyɔk ë thiäŋ, ku wälkï keek në kë ye kek diäk.” Gokï bɛ looi në kë ye kek diäk.

³⁵ Go pïïu wɛt piny në yïk nɔm, ku thiäŋkï awuöl abïk wiɛl piny.

³⁶ Na wën aacï thaa de miɔ̈ɔ̈c thëën bɛ̈n, ke tiët Elija ë lɔ ë yïk lɔ̈ɔ̈m, ku lɛ̈ŋ an, “Bɛ̈nydït, Nhialic de Abraɣam, ku Yithaak, ku Jakop, nyuɔɔthë rɔt ee köölë luɔi Yïn ee Nhialic në Yithriɛl, ku luɔi yan lïmdu, ku nɔn luɔɔi yɛn ee kakë kedhie në Jamduön ë lɛ̈kë yɛn.

³⁷ Piŋ jamdï, Bɛ̈nydït piŋ jamdï, ke bï ë kɔckë ŋic Bɛ̈nydït nɔn Yïn Nhialic, ku bïk ŋic nɔn puk Yïn kenïïm rɔt.

³⁸ Go Bɛ̈nydït mac tɔ bɔ̈ piny, go miɔɔr nyup, ku nyop tiim, ku nyop kur, ku nyop tiɔp, ku jiic pïïu awuölic.

³⁹ Na wën aa tïŋ kɔc ee kënë, ke ke cuɛt röt piny, ku luelkï, an, “Bɛ̈nydït Yen aye Nhialic, Bɛ̈nydït Yetök Yen aye Nhialic!”

⁴⁰ Go Elija lɛ̈k keek, an, “Damkï tït ke Baal, duökï de töŋ takï bän.” Go kɔc ke dɔm kedhie, ku lee ë Elija ke piny në nyin ë Kicon le ke nɔ̈k ëtɛ̈ɛ̈n.

Thök de Yaak

⁴¹ Go Elija lɛ̈k melik Aɣap, an, “Lɔ nhial lɔ cämë ku dɛ̈kë, yɛn cï awuɔɔu piŋ, deŋ abɔ̈.”

⁴² Na wën aacï Aɣap lɔ cam, ke Elija ë lɔ nhial ë kuur ë Karmel nɔm, le yenɔm guöt piny ku tɛ̈ɛ̈u e nɔm ë yemiɔl.

⁴³ Ku lëk lïmde an, “Lɔ woi wɛ̈ɛ̈ric.” Go lïm lɔ ku le yenɔm puk, an, “Acïn kë cä tïŋ.” Go Elija bɛ lɛ̈k en an, “Lɔ raandhorou.”

⁴⁴ Na wën ke lɔ në lɔ ye kek yiic dhorou, ke puk e nɔm ku lueel, an, “Yɛn ë luän thiin cït raan ciin tïŋ ajiɛt rɔt nhial në wɛ̈ɛ̈ric.” Go Elija lɛ̈k lïmde, an, “Lɔ lɛ̈kë melik Aɣap ë lɔ në abël ë tɔŋde yic, ku ë lɔ baai ke cïï deŋ en bï pɛ̈n cäth.”

⁴⁵ Të thiinakäŋ, ke luän col ë cut ë go nhial paat, ku put yom, ku lɔ gök dïït ë deŋ piny. Go Aɣap kɛɛc abëldɛn ë tɔŋic ku puk yenɔm Jedhreel.

⁴⁶ Go riɛl ë Bɛ̈nydït bɛ̈n tëde Elija go yeyic duut ku riŋ në Aɣap nɔm tueŋ aɣeet en Jedhreel.