1 Mel 17 - JAM DE NHIALIC 2011

Elija ku yaak ë deŋ

¹ Go tiët cɔl Elija raan ë Ticibe në Giliyad lɛ̈k melik Aɣap an, “Alɛ̈k yïn në rin ke Bɛ̈nydït, Nhialic pïïr de Yithriɛl ya luööi, an abï ciën deŋ ku cïn thäc në ee runke yiic agut të bän e lueel.”

² Go Bɛ̈nydït lɛ̈k Elija an,

³ “Jäl eenë ku lɔ thiaanë të lɔ aköl amiäk të thiääk ke nyin ë Kerith, në wɛ̈ɛ̈r de Jordan kɔ̈u baŋ të lɔ aköl amiäk.

⁴ Yïn bï aa dek ë nyinic ku acä lɛ̈k gɛk bïk yïn aa yiɛ̈n këcam ëtɛ̈ɛ̈n.”

⁵ Go Elija jam de Bɛ̈nydït riëëu, go lɔ lee rëër në nyin ë Kerith yɔu të lɔ aköl amiäk ë Jordan.

⁶ Go aa dek ë pïïu ë nyinic ku ye gɛk en yiɛ̈n kuïn cï pam ku rïŋ miäk ku thëën.

⁷ Na wën, ke nyin ë dëu në luɔi cïn en deŋ.

Elija kekë Tiiŋ Thuööm në Dharepath

⁸ Go Bɛ̈nydït lɛ̈k Elija, an,

⁹ “Lɔ wun cɔl Dharepath në Thidon lɔ̈ɔ̈m, lɔ rɛ̈ɛ̈rë ëtɛ̈ɛ̈n. Yɛn ë tiiŋ thuööm nu ëtɛ̈ɛ̈n yɔ̈ɔ̈k bï yï cääm.”

¹⁰ Go Elija jɔ lɔ Dharepath. Na wën aa ɣëët ë kal ë pänydït thok ke tïŋ tiiŋ thuööm akuany tiim ke thät. Go lɛ̈k en, an, “Miɔc en ë pïïu dɛk.”

¹¹ Na wën aa lee pïïu diëc ke cöt ku lueel, an, “Ku luɛ̈thë ya kuïn cï pam ayadäŋ.”

¹² Go tik puɔ̈k nɔm en, an, “Yɛn ë kuëëŋ në rin ke Bɛ̈nydït Nhialicdun pïïr an yɛn cïn nɔm kuïn cï pam aa aɣar thiäŋ cin yen anu tëde yɛn yetök në abïnyic. Ku miök thiinakäŋ në agutic. Ka yɛn aa bɔ̈ eenë bä bɛ̈n kuany ë tiim bän ee këthiinë lɔ thaal ku cam wokë wëndï, ku jɔku bɛ̈n thou.”

¹³ Go Elija lɛ̈k en, an, “Du diɛɛr, lɔ thal këcamdu, ku kɔn a thäl kuïn cï pam thiinakäŋ në aɣarë yic, ku yiɛ̈në yɛn, ku jɔ kë cï dɔ̈ŋ lɔ thaal bäk cam wekë wëndu.

¹⁴ Në luɔi cïï Bɛ̈nydït ye lueel, Nhialic de Yithriɛl an, ‘Abïny de aɣaar acïï yic bï thök kekë aɣar, ku aguun ë miök acïï yic bï thök ke miök, agut cï kööl bän deŋ tuɔɔc ë pinynɔm Yɛn Bɛ̈nydït.’”

¹⁵ Go tiiŋ thuööm kë cïï Elija lɛ̈k en lɔ looi ëbɛ̈n, agokï nïïm bɛ̈n dɛk këcamkï në nïn juëc.

¹⁶ Abïny de aɣaar akënic bɛ̈n thök kekë aɣaar, ku aguun ë miök akën yic thök kekë miök cït man cïï Bɛ̈nydït e tɔ lueel ë Elija.

¹⁷ Na ɣɔn aacï akööl lɔ, ke wën de tiiŋ thuööm ë dɔm juäi, ku juäi e nyin ŋuak athou en.

¹⁸ Go tiiŋ thuööm lɛ̈k Elija, an, “Raan de Nhialic eeŋö lui yïn ɛn ee kënë? Ee yï bɔ̈ eenë bä Nhialic bɛ̈n täk nɔm në awɛ̈ɛ̈ckï ku tɔ wëndï thou?”

¹⁹ Go Elija lɛ̈k en an, “Gämë yɛn meth,” go Elija meth nööm në yecin, ku lee ɣön nhial të rëër en thïn, ku lee tääc në agen nɔm.

²⁰ Ku lɛ̈ŋ ë röl dït, an, “Bɛ̈nydït Nhialic, eeŋö lui yïn ee tiiŋ thuöömë këdïït tuc thok cït ee kënë? Acï ya ŋiëc döt në liɛɛrëpiɔ̈u, ku ënɔɔnë yïn ë wënde nɔ̈k!”

²¹ Go Elija rɔt cuat ë meth kɔ̈u raandiäk ku lɛ̈ŋ, an, “Bɛ̈nydït Nhialicdï, tɔ ee mɛnhë tɔ pïïr!”

²² Go Bɛ̈nydït lɔ̈ŋ de Elija piŋ, go wëi kenïïm bɛ pɔ̈k ë meth guöp, ago ɣɔ̈ɔ̈r.

²³ Go Elija meth pɔ̈k nɔm ɣön piny yïn man ku lɛ̈k en an, “Tïŋ, wëndu apïïr!”

²⁴ Go tik bɛ̈ɛ̈r, an, “Yïn cä jɔ ŋic ënɔɔnë luɔi yïn raan de Nhialic, ku jam ë Bɛ̈nydït lueelë ee yic!”