1 Mel 15 - JAM DE NHIALIC 2011

Abijam melik de Juda

¹ Në ruöön ye Jerobowam wën ë Nebat run thiëër ku bɛ̈t ë bääny yic ke ee melik de Yithriɛl, go Abijam aa melik de Juda,

² go bääny muk ë run kadiäk ë Jeruthalem. Man acɔl Maaka, nyan de Abthalom.

³ Acï karɛc cït karɛc ɣɔn ye wun kɔn looi ë yenɔm looi, ku acïï Bɛ̈nydït Nhialicde ee riëëu, cï kuɛɛrë Debid.

⁴ Ku në biäk de Debid, Bɛ̈nydït acï Abijam bɛ̈n gäm mɛwä bï lɔ̈ɔ̈k aa melik në nyinde yic në Jeruthalem, ke bï Jeruthalem gël.

⁵ Bɛ̈nydït aa loi ee kënë në luɔi cï Debid yen tɔ mit piɔ̈u, ku acïn löŋdɛn cï kɔn dhoŋ kɔ̈u, ee këde tiiŋ de Yuria yetök raan ë Ɣit.

⁶ Tɔŋ wään cï rɔt cak ë kaam de Reɣobowam kekë Jerobowam, acï bɛ̈n ŋoot ke thäär në pïïr de Abijam yic ëbɛ̈n.

⁷ Këriëëc ëbɛ̈n cï Abijam looi, ku ka cï looi ëbɛ̈n, acï ke gɔ̈ɔ̈r në awerek de kathɛɛr ke meliik ke Juda yiic.

⁸ Go Abijam thou, go tɔ̈ɔ̈u Pänydït de Debid, go Atha wënde lɔ në nyinde yic ke ye melik.

Melik Atha de Juda

⁹ Në ruöön ye Jerobowam run thiërrou ke ye melik në Yithriɛl, go Atha aa melik ë Juda,

¹⁰ ago bääny muk në run kathiërŋuan ku tök ë Jeruthalem. Kokke acɔl Maaka, nyan de Abthalom.

¹¹ Atha acï këpiɛth looi në Bɛ̈nydït nɔm, kë cït kë cï kuɛɛrë Debid looi.

¹² Acï röör akɔɔrdiäär ku diäär akɔɔrröör ee lui në ɣään ye yiëth lam thïn cop, ku nyiɛɛi yiëth ɣɔn cï meliik tueŋ looi.

¹³ Ku nyiɛɛi kokke Maaka në nyin ë tiiŋ melikic, në luɔi cï yen rɔt luöi yanh tik cɔl Acera, Yanh ee kɔc tɔ dhiëth. Go Atha yath jäp piny ku le nyop ë mac në Wak ë Kidronic.

¹⁴ Na cakaa nɔn kën ë Atha ɣään ke yiëth riɔ̈ɔ̈k kedhie, aaye ŋoot ke adöt tëde Bɛ̈nydït në pïïrde yic ëbɛ̈n.

¹⁵ Ku bïï wëu ɣɔn cï wun ke gäm Nhialic Luaŋdït, ku bïï adhääp ku ateek cï gäm Bɛ̈nydït.

¹⁶ Ku aa de tɔŋ në kaam de Atha melik de Juda, ku Baaca melik de Yithriɛl në akööl ɣɔn muk kek bääny.

¹⁷ Go Baaca melik de Yithriɛl tɔŋ lɛɛr Juda ku yïk Rama aril, ago kuɛɛr ee lɔ Juda ëbɛ̈n teem kɔ̈ɔ̈th,

¹⁸ Na wën ke Atha nöm atek ku adhɛ̈p ɣɔn cï döŋ ëbɛ̈n Luaŋdït, ku ɣön ë bääny, ku gëm ke bänyke bïk ke lɛɛr Damathko tëde Benɣadad melik de Thiriya wën ë Tabirimon, ku ee wën ë wën ë Ɣedhion ku lëk ee jamë an,

¹⁹ “Mɛ̈tku, cït man ɣɔn mɛ̈të wäär ke wuur. Atekkë kekë adhɛ̈p ayek miɔ̈cdiën ë dhuëëŋ gäm yïn. Ku ënɔɔnë, riäk mändu wekë Baaca melik de Yithriɛl, ke bï remdɛn ë tɔŋ nyaai në akendï nɔm.”

²⁰ Go melik Benɣadad gam në kë cï Atha thiëc en, ku tooc bɛ̈ny de remdɛn ë tɔŋ në wuöt ke Yithriɛliic ku peckï Yijon ku Dan ku Abel Beth Maaka, ku piny thiääk ke Baar ë Galili, ku aken ë Naptali.

²¹ Na wën aa lɔ melik Baaca ee kënë piŋ ke päl yïŋ de wun cɔl Rama ku le nyuc Tirdha.

²² Go melik Atha kɔc ke Juda ëbɛ̈n cɔɔl bïk kur ku tiim ɣɔn yïk ë Baaca ke Rama lɔ jɔt, go Atha Midhpa kekë Geba yïk ë keek, piny ë Benjamin.

²³ Këriëëc ëbɛ̈n cï melik Atha looi, luɔidɛn ë jööt, ku wuöt cï ke yïk, acï ke gɔ̈ɔ̈r në awerek de kathɛɛr ke meliik ke Juda yiic. Ku ɣɔn cï yen dhiɔp aaye kɔm, në këde jɔŋ cï ye dɔm cök.

²⁴ Go Atha thou, go tɔ̈ɔ̈u në rɛ̈ŋ ke baai de melik Pänydït de Debid, ago Jeɣocapat wënde lɔ në nyinde yic ke ye melik.

Nadap Melik de Yithriɛl

²⁵ Në ruöön ye Atha melik de Juda run rou ë bääny yic, go Nadap wën de Jerobowam bääny gɔl ke ee melik de Yithriɛl, ago bääny muk ë run kaarou.

²⁶ Acï kërac looi në Bɛ̈nydït nɔm cït wun, ago kɔc ke Yithriɛl tɔ wäc.

²⁷ Go Baaca wën de Aɣija, raan dhiën ë Yithakar Nadap buuth ku nɛ̈k, go Baaca Nadap nɔ̈k në Gibethon wun de Pilithiin, në biäk ë cï Nadap kekë rem de tɔŋ ë Yithriɛl Gibethon tuɔɔk.

²⁸ Kënë aa loi rɔt në ruöön ë diäk ye Atha melik de Juda. Go Baaca lɔ ë nyin ë Nadap yic, ke ye melik de Yithriɛl.

²⁹ Ago kɔc baai de Jerobowam gɔl ë nääk ëbɛ̈n. Cït man kë cï Bɛ̈nydït lueel në thoŋ de awunde, tiët Aɣija raan wun ë Cilo an, kɔc baai de Jerobowam acï ke nɔ̈k kedhie abïï ciɛ̈n raan töŋ dɔ̈ŋ ke pïïr.

³⁰ Kënë ë rɔt looi në biäk cï Jerobowam Bɛ̈nydït, Nhialic de Yithriɛl tɔ göth, në karɛc cï ke looi, ku tɔ Yithriɛl loi kërac.

³¹ Ku këriëëc ëbɛ̈n cï Nadap looi, ku ka cï looi ëbɛ̈n, acï ke gɔ̈ɔ̈r në Awerek de kathɛɛr ke meliik ke Yithriɛl yiic.

³² Ku aa de tɔŋ në kaam de Atha kekë Baaca melik de Yithriɛl në akööl ɣɔn muk kek bääny.

Baaca Melik de Yithriɛl

³³ Në ruöön ë diäk ye Atha melik ë Juda. Go Baaca wën Aɣija aa melik në Yithriɛl, go bääny muk ë run kathiërrou ku ŋuan ë Tirdha,

³⁴ Acï karɛc looi në Bɛ̈nydït nɔm cï melik Jerobowam, ago kɔc ke Yithriɛl tɔ wäc.