1 Mel 14 - JAM DE NHIALIC 2011

Thon ë Wën ë Jerobowam

¹ Në ë aköölkë yiic, go juäi Abija wën ë melik Jerobowam dɔm.

² Go Jerobowam tiiŋde yɔ̈ɔ̈k an, “Kɔ̈cë rɔt ke cïn raan bï yï ŋic, ku lɔ Cilo, të rëër ë tiët ë Nhialic Aɣija thïn, raan ɣɔn luel en an bä aa melik de Yithriɛl.

³ Mɔ̈kë kuïn cï pam kathiëër ku gul ë miök ë kiëc, lɔ luɔpë në biäk de wënda, abï yï lɛ̈k kë bï rɔt looi tëde meth.”

⁴ Na wën ke tik ë lɔ tëde Aɣija baaide ë Cilo, ku dhiɔɔp acïï Aɣija tɔ cɔɔr.

⁵ Ku acï Bɛ̈nydït lɛ̈k en në luɔi bïï tiiŋ ë Jerobowam ke bïï bɛ̈n luɔp në luɔi bïï ë wëndɛn de guöp juäi tɔ̈u. Ku Bɛ̈nydït acï Aɣija lɛ̈k kë bï lɛ̈k tik. Na wën aa jɔ tiiŋ de Jerobowam bɛ̈n, ke köc rɔt ke ye tiiŋ däŋ.

⁶ Na wën piŋ ë Aɣija yecök ke bɔ̈ ɣöt thok, ke yöök an, “Bä ɣöt. Aŋiɛc ee yïn tiiŋ ë Jerobowam. Eeŋö ee yïn rɔt kɔ̈c an ye raan däŋ? Yɛn de thoŋ rac lɛ̈k yïn.

⁷ Lɔɔ lɛ̈kë Jerobowam kë cïï Bɛ̈nydït Nhialic de Yithriɛl lɛ̈k en an: ‘Yïn cä lɔc në kɔc yiic, ku ta yïn ë bɛ̈ny de kɔckiën ke Yithriɛl.

⁸ Yɛn cï ciɛɛŋ bɛ̈ɛ̈i bei në käu de Debid cin ku gäm yïn, ku yïn kën bɛ ciët Debid awundï ku döt lööŋkï, ku ye yic looi në Yanyin.

⁹ Yïn cï kërɛɛcdïït wär kërɛɛc ë kɔc ë cï kɔn aa bäny në yïnɔm tueŋ looi. Yïn ë Ya rɛɛc ku tɔ Ya göth në këde yanhduön cï looi, ku wënh cï thɔ̈ɔ̈th bä ya lam.

¹⁰ Në biäk de ee kënë, Yɛn bï kërac bɛ̈ɛ̈i paan ë Jerobowam, Yɛn bï moc ëbɛ̈n nɔ̈k baaide, dhuök, ku röördït ëbɛ̈n ë Yithriɛl. Ɣön ë Jerobowam thok abä riɔ̈ɔ̈r cït man ye mac wär cam abïk riäär.

¹¹ Kɔc ke baaidu bï thou ë pänydïtic, abï jɔ̈k ke cam, ku ka lɔ thou roor abï cuɔɔr ke ŋueet. Ee Yɛn Bɛ̈nydït Yɛn ë jam.’”

¹² Go Aɣija ŋoot ke lëk tiiŋ Jerobowam an, “Ënɔɔnë lɔɔr baaidu, të le yïn pänydït käc yic në yïcök, wëndu abï thou.

¹³ Kɔc ke Yithriɛl abïk dhiëëu ku tɔ̈ukï, në kë yen raan töŋ de baai de Jerobowam bï dhil tɔ̈ɔ̈u në biäk ee yen raan mitë Bɛ̈nydït Nhialic de Yithriɛl piɔ̈u ke yen.

¹⁴ Bɛ̈nydït abï rɔt dɔ̈m melik në Yithriɛl, ku abï baai de Jerobowam nu ee köölë riɔ̈ɔ̈k.

¹⁵ Bɛ̈nydït abï Yithriɛl luööi këtuc, ka abï ke lath cï apäth nu ë nyinic. Abï kɔc ke Yithriɛl nyuän thäär bei piny piɛth cï gäm kuarken, ku thëi ke piny në wɛ̈ɛ̈r ë Yuparat kɔ̈ɔ̈th ya, në kë cï kek Bɛ̈nydït tɔ göth, në biäk cï kek röt luöi yanh cɔl Acera.

¹⁶ Bɛ̈nydït abï Yithriɛl pɔ̈l në biäk cï Jerobowam wäc ku thel kɔc ke Yithriɛl në awäcic.”

¹⁷ Go tiiŋ ë Jerobowam rɔt pɔ̈k Tirdha. Të thiin jɔ yen lɔ ɣönde, ke meth ë thou.

¹⁸ Go kɔc ke Yithriɛl dhiëëu, agokï tɔ̈ɔ̈u, cït man ë kë cï Bɛ̈nydït lueel në awunde thok tiët Aɣija.

Thon de Jerobowam

¹⁹ Ku këriëëc ëbɛ̈n cï Jerobowam looi, thɔ̈ɔ̈rdɛn ë thɔ̈ɔ̈r en, ku mänydɛn ë mɛc en bääny, acï ke gɔ̈ɔ̈r në awerek de kathɛɛr ke meliik ke Yithriɛl yiic.

²⁰ Ku Jerobowam aa mac bääny në run kathiërrou ku rou. Go thou ku tɔ̈ɔ̈u, ago Nadap wënde lɔ në nyinde yic ke ye melik.

Reɣobowam melik de Juda

²¹ Reɣobowam wën ë Tholomon aaye run thiërŋuan ku rou, ɣɔn dɔm en bääny ke ye melik de Juda, ku muk bääny ë run kathiëër ku dhorou ë Jeruthalem, pänydït cï Bɛ̈nydït lɔc në dhiëën ke Yithriɛl yiic ëbɛ̈n, bï aa të bïï ë yen aa lam. Man Reɣobowam acɔl Naama nyan wun ë Ammon.

²² Kɔc ke Juda acïk awäc looi në Bɛ̈nydït nɔm, kënë ë Bɛ̈nydït tɔ göth ke keek, awär agönhde ke kuarken ɣɔn cï kek wäc.

²³ Acïk ɣään ye yiëth lam thïn yïk, ku tɛ̈ɛ̈ukï mëën ke kur nhial, ku kït bï yanh cɔl Acera, ku bï aa lam ë kur nïïm ku atïïp ke tiim thäär.

²⁴ Ku kërɛɛc dït arëët, ade röör akɔɔrdiäär, ku diäär akɔɔrröör, kɔc ee lui në ɣään ke läm de yiëth yiic. Kɔc ke Juda acïk kake ayäär looi ëbɛ̈n, ka ɣɔn ye jur ɣɔn cï Bɛ̈nydït cuɔp wei ë pinyic looi, ɣɔn kɔt kek ë Yithriɛl wään bïï kek.

²⁵ Na ye Reɣobowam run dhïc ë bäänyic, go Cicak melik de Rip Jeruthalem mak.

²⁶ Go ka de naamden tɔ̈u ë Luaŋdït jɔt ëbɛ̈n, ku jɔt ka cï tɔ̈ɔ̈u baai de melik, ayï kööt ke adhääp ɣɔn cï Tholomon ke looi.

²⁷ Ago melik Reɣobowam kööt ke maläŋ looi në nyindenic, ku gëm ke bäny ke rem de tɔŋ ee tïït, ke ke bï ɣön ë melik aa tiit.

²⁸ Ku të ye melik lɔ Luaŋdït, kɔc ee tïït aake ye kööt ɣääc, ku pukkï kenïïm ciëën ɣön de kɔc ee tïït.

²⁹ Ku këriëëc cï Reɣobowam looi ëbɛ̈n, acï ke gɔ̈ɔ̈r në awerek de kathɛɛr ke meliik ke Juda yiic.

³⁰ Ku në ye kaamë yic ëbɛ̈n tɔŋ aaye biök në kaam de Reɣobowam kekë Jerobowam ëceŋ.

³¹ Go Reɣobowam thou, go tɔ̈ɔ̈u ke wärken ë Pänydït de Debid në rɛ̈ŋ ke baai de melik, go Abijam wënde lɔ në nyinde yic ke ye melik.