1 Lëk 9 - JAM DE NHIALIC 2011

Kɔc ë Bɔ̈ Ciëën ë Pɛ̈cic

¹ Kɔc ke Yithriɛl kedhie acï ke gɔ̈ɔ̈r në täu de ɣöötken thook, ku kënë anu awereek ke meliik ke Yithriɛl yiic. Kɔc ke Juda acï keek bɛ̈n lɛɛr Babilon ke ye këtuc luiyë keek në biäk de awɛ̈ɛ̈cken.

² Kɔc ë kɔn röt puk ku lek ɣap ë pɛ̈ɛ̈nydïtkɛn thɛɛriic ee kɔc ke Yithriɛl, ku bäny ke kake Nhialic, ku Lebai, ku kɔc ee luui në Luaŋdïtic.

³ Kɔc ke dhiën de Juda, ku Benjamin, ku Eparaim, ku Manatha acïk lɔ rëër Jeruthalem.

⁴ Yuthai wën de Amiɣud, wën de Omri, wën de Yimeri, wën de Bani, në wɛ̈ɛ̈t ke Peredh wën de Juda.

⁵ Ku wɛ̈ɛ̈t ke Cilon, ee Athaya wëndɛn kɛ̈i kekë wɛ̈ɛ̈tke.

⁶ Ku wɛ̈ɛ̈t ke Dhera, ee Jewɛl ku kɔcken, ayek bot kadhetem ku thiërdhoŋuan 690.

^7-8 Ku wɛ̈ɛ̈t ke Benjamin, Thalu wën de Meculam, wën de Ɣodabia, wën de Ɣathenua. Ku Yibenia wën de Jeroɣam Ela wën de Yudhi, ku ee wën de Mikiri Meculam wën de Cepatia, wën de Rewel, wën de Yibnija.

⁹ Ku kɔcken cït man de kuënden ayek bot kadhoŋuan ku thiërdhïc ku dhetem 956. Keek kedhie ayek bäny ke ɣööt ke wärken thook.

Bäny ke kake Nhialic ë Rɛ̈ɛ̈r ë Jeruthalem

^10-12 Bäny ke kake Nhialic ë rɛ̈ɛ̈r ë Jeruthalem: ee Jedaya, ku Jeɣoyarip, ku Jakin. Ku Adharia wën de Ɣilikia, (bɛ̈ny de kake Luaŋdït) wën de yï Meculam ku Dhadok, ku Merayoth, ku Aɣitup bɛ̈ny tueŋ de ɣön ë Nhialic. Adaya wën de Jeroɣam wën de yï Pacur, ku Malikija, ku Mathai wën de Adiɛl, wën de yï Jadhera, wën de Meculam, wën de Mecilemith, wën de Yimer.

¹³ Ku kuën de bäny ke kake Nhialic, ee bäny ke ɣöötken thook ayek agum ku bot kadhorou ku thiërdhetem. Keek kedhie ayek atëët ke luɔi de ɣön ë Nhialic.

Kɔc ke Lebai Rɛ̈ɛ̈r ë Jeruthalem

^14-16 Kɔc ke Lebai ɣɔn rɛ̈ɛ̈r ë Jeruthalem Cemaya wën de Ɣacup, wën de Adhirkam, wën de Ɣacabia, wën de dhiën de Merari. Ku Bakbakar, ku Ɣerec, ku Galal, Matania wën de Maika, wën de Dhikiri, wën de Athap Obadaya wën de Cemaya, wën de Galal, wën de Jeduthun, Berekia wën de Atha, wën de Elekana, raan ɣɔn rɛ̈ɛ̈r ë bɛ̈i ke kɔc ke Netopa.

Kɔc tit Luaŋdït Rɛ̈ɛ̈r ë Jeruthalem

¹⁷ Kɔc ee Luaŋdït tiit, ɣɔn rɛ̈ɛ̈r ë Jeruthalem ee Calum, Akub, Talmon, ku Aɣiman, Calum yen e ye bɛ̈nyden.

¹⁸ Kɔc ke dhiënden kek acï keek bɛ̈n tääu ke ke ye kɔc ee kal de melik tiit thok ë biäk të lɔ aköl amiäk. Ku aake ye kɔc tït tɔ kääc ë kal thok biäk të lɔ wut baŋ de Lebai.

¹⁹ Calum wën de Kore, wën de wën ë Ebiathap, kedhie ë kɔc ke dhiën de Kɔra, yen Kore, yen aye bɛ̈ny de kɔc ee kal thoŋ të lɔ paany ë Bɛ̈nydït tiit, cït man wään ye kuarken, bäny ee Paany de Bɛ̈nydït tiit thok.

²⁰ Pineɣath wën de Eleyadhar, yen aaye bɛ̈ny de kɔc tit kal thok, ku Bɛ̈nydït aa tɔ̈u kekë yen.

²¹ Dhekaria wën de Mecelemia yen ee tïït në kal thoŋ ee lɔ në paany de mät thok.

²² Kedhie ayek bot kaarou ku thiëër ku rou de kɔc cï kuany, bïk kal thok ku athïïn aa tiit. Acï keek gɔ̈ɔ̈r ë täu de bɛ̈ikɛn rëër kek thïn. Ee melik Debid ku Thamwɛl monydaai yen ë tɛ̈ɛ̈u kuarken ke ke ye bäny në ee ɣäänkë yiic.

²³ Keek ë kuatden acïk bɛ̈n aa ŋoot ke ke ye kɛ̈l ke Luaŋdït tiit thook.

²⁴ Ku kɔc ee tïït anukï në thook kaŋuan, të lɔ aköl amiäk, ku të lɔ aköl athɛ̈i, ku të lɔ rut, ku të lɔ wöuwic.

²⁵ Kɔc ee tïïtkë aake ye kuɔny ë kɔc raan ë keek rɛ̈ɛ̈r ë bɛ̈iken yiic, ku ayek tiët wɛ̈ɛ̈r ë nïn kadhorou yiic.

²⁶ Bäny ee tïït kaŋuan ayek kɔc ke Lebai, ku kek ee bäny tɔ̈u ë riɛl ë kecin. Kek amuk ɣööt nu ë ɣön ë Nhialicic ku aye ka kɔɔr ëtɛ̈ɛ̈n gam.

²⁷ Ku aake ye rëër ɣön ë Nhialic lɔ̈ɔ̈m, në biäk yen luɔi cï gäm keek bïk aa tïït, ku bïk aa liep thok miäk rial.

Kɔc Kɔ̈k ke Lebai

²⁸ Lebai kɔ̈k acï ke gäm luɔi de kake läm. Ayek keek tïŋ të jɔt ë keek, ku bekï keek tïŋ të puk ë keek nïïm ciëën, tëde yen të cïï kɔc lɔ luui ë keek.

²⁹ Kɔ̈k acï ke gäm luɔi de ka ɣeriic cït aɣaar, ku mɔ̈u, ku miök, ku wal ŋïr.

³⁰ Ku raan de luɔi de liëëp de wal ŋïr, ee bɛ̈ny de kake Nhialic.

³¹ Raan de Lebai cɔl Matithia wën kɛ̈i de Calum, de dhiën ë Kɔra, yen acï gäm luɔi de guiɛɛr ë kuïn cï pam.

³² Kɔc ke dhiën de Koɣath acï ke gäm luɔi de kuïn cï pam ɣeric, ka ye tääu ë pam nɔm ë Luaŋdïtic, ke ee miɔ̈c gëmë Nhialic në akööl ke Thabath kedhie.

³³ Ɣööt kɔ̈k ke kɔc ke Lebai acï ke gäm luɔi de gun ë thoom, ku lɔ̈r, ku kɛŋ ë Luaŋdïtic. Bäny ke ɣööt ke Lebai kë, aake rëër ë ɣööt kɔ̈k ke Luaŋdït yiic, ku akënë keek gäm luɔi däŋ, në biäk ye kek lui aköl ku wäkɔ̈u.

³⁴ Kɔc cï lueel rin tueŋ kek aye bäny ke ɣööt ke Lebai thook, cït täu de kuarken. Kek aye bäny ë tɔ̈u në Jeruthalem.

Kuarken ku Käu de Melik Thaulo

³⁵ Jeyel ee yen ë keer pänydït de Gibiɔn ku rëër ëtɛ̈ɛ̈n. Tiiŋde acɔl. Maaka.

³⁶ Wën kɛ̈ide acɔl Abadon ku wɛ̈ɛ̈tkɛn kɔ̈k acɔl ke, Dhur, Kic, Baal, Ner, Nadap,

³⁷ Gedor, Aɣiyo, Dhekaria ku Mikiloth,

³⁸ ku Mikiloth ee wun Cimea. Kuatden aake rɛ̈ɛ̈r ë Jeruthalem të thiääk ke dhiënkɛn kɔ̈k.

³⁹ Ner ee yen ee wun Kic, ku Kic ee yen ee wun Thaulo. Ku Thaulo ade wɛ̈ɛ̈t kaŋuan yï: Jɔnathan, Malkicua, Abinadap ku Eecbaal.

⁴⁰ Jɔnathan yen aye wun Meribaal, ɣɔn ee wun Maika.

⁴¹ Maika ade wɛ̈ɛ̈t kaŋuan ee yï: Pithon, ku Melek, ku Taria, ku Aɣadh.

⁴² Ku Aɣadh yen aye wun Jara, ku Jara ee wun wɛ̈ɛ̈t kadiäk yï Alemeth, ku Adhimabeth, ku Dhimri. Ku Dhimri yen aye wun Modha

⁴³ Modha yen aye wun Bineya, Bineya de Repaya, Repaya de Eleyatha, Eleyatha de Adhel.

⁴⁴ Adhel ade wɛ̈ɛ̈t kadhetem: Adhirkam, ku Bokeru, ku Yicmiɛl ku Ciiria, ku Obadaya ku Ɣanan.