1 Lëk 23 - JAM DE NHIALIC 2011

¹ Na ɣɔn cï melik Debid jɔ dhiɔp, go Tholomon wënde tɔ ee melik de Yithriɛl.

Luɔi de Lebai

² Ago Debid röördït ke Yithriɛl, ku bäny ke kake Nhialic ku Lebai tɔ kut kenïïm.

³ Go kuën de röör ke Lebai nööm kedhie gɔl në raan ee run thiërdiäk (30) lee tueŋ. Keek kedhie ayek aguum kathiërdiäk ku bɛ̈t (38,000).

⁴ Go melik aguum kathiërrou ku ŋuan (24,000) de kɔc kuany bïk luɔi de yïŋ ë Luaŋdït muk, ku aguum kadhetem (6,000) de kɔc, bïk käŋ aa gɔ̈ɔ̈r ku yek lööŋ guiir.

⁵ Ku aguum kaŋuan ë kɔc ee tïït, ku aguum kaŋuan ë kɔc ke diɛt bïk Bɛ̈nydït aa leec në thom.

⁶ Go Debid Lebai tɛ̈ɛ̈kiic ë kuut kadiäk cït tän de dhiënken, Gercon, ku Koɣath, ku Merari.

⁷ Gercon, ade wɛ̈ɛ̈t kaarou, Ladan ku Cimei.

⁸ Ladan ade wɛ̈ɛ̈t kadiäk, Jeɣel, yen aye kɛ̈i, ku lɔ Dhetham ku Jowɛl.

⁹ Wɛ̈ɛ̈t ke Cimei ee yï Celomoth, ku Ɣadhiel, ku Ɣaran ayek diäk kedhie. Aake ye röördït ke dhiën de Ladan.

¹⁰ Ku wɛ̈ɛ̈t ke Cimei ee yï Joɣath, Dhidha, Jiyuc, ku Beriya. Keek kaŋuan ayek wɛ̈ɛ̈t ke Cimei.

¹¹ Jaɣadh aaye bɛ̈ny, ku Dhedha ee raan de rou, ku Jiyuc kekë Beriya acïnkï nïïm wɛ̈ɛ̈t juëc, ye ka cï kek bɛ̈n aa dhiën tök.

¹² Koɣath ade wɛ̈ɛ̈t kaŋuan: Amiram, ku Yidhar, ku Ɣebron, ku Yudhiɛl.

¹³ Ku wɛ̈ɛ̈t ke Amiram ee Aron ku Mothe. (Go Aron tɔ̈ɔ̈u pei bïï kaɣeriic aläl aa gäm Bɛ̈nydït, ku yen kekë wɛ̈ɛ̈tke abïk wal ŋïr aa nyop në Bɛ̈nydït nɔm aɣet athɛɛr, ku bïk aa luööi, ku yek athiɛɛi lueel ë rinke aɣet athɛɛr.

¹⁴ Ku wɛ̈ɛ̈t ke Mothe raan de Nhialic acï keek bɛ̈n mat ë kɔc ke Lebai yiic.)

¹⁵ Mothe ade wɛ̈ɛ̈t kaarou, Gercom ku Eliedher.

¹⁶ Raan ee bɛ̈ny ë wɛ̈ɛ̈t ke Gercom yiic ee Cebwɛl.

¹⁷ Eliedher ade wën tök Reɣabia, ku acïn nɔm wɛ̈ɛ̈t kɔ̈k, ku Reɣabia acï bɛ̈n dɛ kuat dït arëët.

¹⁸ Yidhar wën de rou ë Koɣath, ade wën töŋ cɔl Celomith yen ee bɛ̈ny de dhiën.

¹⁹ Ɣebron wën de diäk ë Koɣath, ade wɛ̈ɛ̈t kaŋuan: Jeria, ku Amaria, ku Jaɣadhiel ku Jekamiim,

²⁰ Yudhiɛl wën de ŋuan ë Koɣath, ade wɛ̈ɛ̈t kaarou, Maika, ku Yicia.

²¹ Merari ade wɛ̈ɛ̈t kaarou, Maɣali, ku Muci. Maɣali ade wɛ̈ɛ̈t kaarou Eleyadhar ku Kic,

²² ku Eleyadhar acï bɛ̈n thou ke cïn nɔm mɛwä, ee duet kapäc, ku duetke acï keek bɛ̈n thiaak ë wɛ̈ɛ̈t wuun, wɛ̈ɛ̈t ke Kic.

²³ Muci wën de rou ë Merari, ade wɛ̈ɛ̈t kadiäk: Maɣali, ku Eder, ku Jeremoth.

²⁴ Kakë ee kuat de ɣööt ke dhiën de Lebai, ŋɛk ë ke yiic acï gɔ̈ɔ̈r rin. Ŋɛk ke kuatden ëbɛ̈n, raan de run kathiërrou ku nɔn de nɔm run juëc, ade nɔm biäkde në luɔi de Luaŋdït yic.

²⁵ Go Debid lueel an, “Bɛ̈nydït Nhialic de Yithriɛl acï kɔcke gäm mät, ku yen guöp abï rɛ̈ɛ̈r ë Jeruthalem aɣet athɛɛr.

²⁶ Yen acïn kë be kɔc ke Lebai kɔɔr ë biäk de ɣɛ̈ɛ̈c de paany ë Bɛ̈nydït, ayï kake luɔi tëde läm.”

²⁷ Në biäk de löŋ cïï Debid lueel, go kɔc ke Lebai cï run kathiërrou cuööp aa gɔ̈ɔ̈r rin, në biäk bï kek lui,

²⁸ acï keek bɛ̈n aa gäm ee luɔiyë: Abïk bäny ke kake Nhialic kɔc dhiën de Aron ya kuɔny ë läm ɣön ë Nhialic, ku abïk kal aa guiir kekë ɣöötke, ku abïk kaɣeriic aa tiit ke ke cïï bïï dhiöök.

²⁹ Ku abïk kuïn cï pam cï gäm Bɛ̈nydït aa muk, ku aɣar cï gam ke ye miɔ̈c ë rap, ku bethkawith cïn yic luɔu, ku miɔ̈c de kuïn cï nyop, ku aɣar cï liääp, ku miök de olip, ku abïk miɔ̈c de ɣön ë Bɛ̈nydït aa them ku yek kiëët.

³⁰ Ku abïk Bɛ̈nydït aa piɔɔny ku leckï nɔm ë diɛt ke dhuëëŋ, miäk ku thëën aköölnyïïn kedhie,

³¹ ku tëde yen miɔ̈c ye nyop ëbɛ̈n gëmë Bɛ̈nydït ë kööl de thabath, ku dhuëëŋ de pɛɛi ë piac wil, ku dhuëŋ kɔ̈k. Lööŋ acï ke looi, lööŋ bï kuën de kɔc ke Lebai bï ee luɔiyë lɔ looi në ee kaamë yic ŋic. Kɔc ke Lebai acï ke gäm luɔi de läm ë Bɛ̈nydït aköölnyïïn kedhie.

³² Kɔc ke Lebai acï ke gäm luɔi bï kek paany de mät ku tëɣeric aa guiir në aköölnyïïn kedhie, ku bïk mïthëkɔcken wɛ̈ɛ̈t ke Aron aa kuɔny në luɔi tëde läm.