1 Lëk 22 - JAM DE NHIALIC 2011

¹ Ago ë Debid lueel an, “Tënë yen abï Luaŋdïït de Bɛ̈nydït Nhialic yïk thïn. Tënë yen aye yïïŋ bï kɔc ke Yithriɛl miɔ̈c ye nyop ëbɛ̈n gam thïn.”

Guiëër de Yïŋ de Luaŋdït

² Ago melik Debid löŋ tääu piny, bï alɛi tɔ̈u paan de Yithriɛl ke yiic määt kedhie, ago keek gäm luɔi. Go kɔc kɔ̈k kur guaŋ bïï ke ɣön ë Nhialic yïk.

³ Go wëth juëc bɛ̈ɛ̈i bï ë wiɛth looi, wiɛth bïï bɛɛp ke tiim ke kɛ̈l thook piäät, ku bïï malɔ̈ɔ̈ŋ juëc cïn raan lëu keek ëthëm.

⁴ Go kɔc ke Tayer ku Thidon kiëët, bïk mën ke tiim ke thidar juëc lɔ bɛ̈ɛ̈i.

⁵ Go Debid lueel an, “Luaŋdït bï ë wëndï Tholomon lɔ̈ɔ̈k yïk abï dhil dik ku lec ë pinynɔm ëbɛ̈n. Ku Tholomon akoor ku akuc käŋ, ka yen bï käŋ dhil guiir ë biäkde.” Go Debid kajuëc bɛ̈ɛ̈i ɣɔn kën en kɔn thou.

⁶ Go Debid thok tuöc Tholomon wënde, ku yöök bïï Luaŋdïït de Nhialic de Yithriɛl yïk.

⁷ Go ë Debid lɛ̈k en an, “Wëndï, yɛn aa kɔɔr bä Luaŋdït yïk, bä yɛn Bɛ̈nydït Nhialicdï dhuëëŋ guöp.

⁸ Go jam de Bɛ̈nydït bɛ̈n tëde yɛn an cä kɔc juëc nɔ̈k, ku yɛn cï tɔɔŋ juëc thɔ̈ɔ̈r, yɛn cïï ɣöt bï yïk në rinke. Ku në biäk cän kɔc juëc nɔ̈k ë yenɔm ë piny nɔm, acï jaai bä ɣönde yïk.

⁹ Ku acï ya lɛ̈k gutguut. Acï lueel an, “Yïn bï mɛwä dhiëëth, wën bï bääny muk ë mätic, abä gäm mät tëde kɔc ke aterde nu në yelɔ̈ɔ̈m ëbɛ̈n. Ku abïï cɔl rin Tholomon, ku yɛn bï Yithriɛl gäm mät ku rɛ̈ɛ̈r lɔ dïu në aköölkë yiic.

¹⁰ Yen abï ɣöt yïk në rinkï. Abï aa wëndï, ku Yɛn bï aa wun, ku Yɛn bï thööny de bäänyde döt në Yithriɛl aɣet athɛɛr.”

¹¹ Ku lueel ë Debid an, “Ënɔɔnë mɛnhdï Bɛ̈nydït Nhialicdu abï tɔ̈u ke yïn, ku abï gutguutde döt, ku bä Luaŋdïït de Nhialicdu yïk, cït man ë kë cï lueel.

¹² Yïn bï Nhialic Bɛ̈nydïïtdu gäm ŋïny de käŋ ku pɛlënɔm, ago kɔc ke Yithriɛl wat cït man de löŋde.

¹³ Të le yïn lööŋ cï Bɛ̈nydït gäm Mothe në baŋ de kɔc ke Yithriɛl lɔ riëëu kedhie, yïn bï tiam ë luɔidu yic. Riit yïpiɔ̈u ku tɔ rɔ ril, ku du riɔ̈c.

¹⁴ Ku në biäk de Luaŋdït yɛn cï aguum kadiäk ku bot kaŋuan (3,400) ke tɔn ke adhääp kueet, ku aguum kathiërdiäk ku ŋuan de (34,000) ke tɔn ke atek määt yiic, bï ke Luaŋdït yïk. Ku kake yïk juëc arëët, yï malɔ̈ɔ̈ŋ, ku wëëth, ku tiim, ku kur cï guiir, ayï kɔc bï luɔi looi, ku yïn bï kɔ̈k dhil bɛ̈ɛ̈i.

¹⁵ Yïn de nɔm kɔc juëc bï lui. Ade kɔc bï kur tueŋ, ku ade kɔc ee wëth tɛm, ku kɔc ee tiim guaŋ, ku ade atëët juëc ee ka kithiic looi ëbɛ̈n,

¹⁶ kake adhääp, ku ateek, ku maläŋ, ku wëëth. Jɔ luɔi gɔl ënɔɔnë, ku Bɛ̈nydït abï tɔ̈u ke yïn.”

¹⁷ Go Debid bäny ke Yithriɛl yɔ̈ɔ̈k ëbɛ̈n bïk Tholomon wënde kuɔny.

¹⁸ Ku lëk keek an, “Bɛ̈nydït Nhialinydun aa tɔ̈u ke week, ku acï week gäm mät në ɣään yiic kedhie. Në biäk cï yen yɛn tɔ peec kɔc wään ceŋ ee pinyë kedhie, ku ënɔɔnë ayek kaku ku ayek kake Bɛ̈nydït.

¹⁹ Ënɔɔnë luööiyë Bɛ̈nydït Nhialinydu në piɔ̈ndu ëbɛ̈n, ku wëiku ëbɛ̈n. Gɔl yïŋ de tëɣeric, ke yï bï Athänduŋ de män de Bɛ̈nydït tääu thïn, ku lɔ ka kɔ̈k ɣer yiic ye kɔc ke läm looi.”