1 Lëk 21 - JAM DE NHIALIC 2011

Debid Akuen Kɔc

¹ Catan akɔɔr bï kɔc ke Yithriɛl yiɛ̈n nuɛɛn, go Debid tɔ kuen kɔc.

² Go Debid Jowap yɔ̈ɔ̈k kekë bäny ke remdɛn ke tɔŋ an, “Lakï piny de Yithriɛl ëbɛ̈n, gɔl ë Biirceba ale guööt ë Dan, gäärkï raan ëbɛ̈n, ku pɔ̈kkï yanɔm thok ke ya bï kuën de kɔc Yithriɛl ŋic.”

³ Go Jowap puk nɔm, an, “Bɛ̈nydït Nhialic de Yithriɛl abï kɔc ke Yithriɛl tɔ ŋuak röt raan bɔt awär ee kuëndɛn ee nɔɔnë! Yïn bɛ̈ny, ayek awuutku kedhie. Eeŋö kɔɔr bä luöi kë cït ee kënë, kɔɔr bä jur ëbɛ̈n tääu awäcic?”

⁴ Go melik Debid, Jowap yɔ̈ɔ̈k bï löŋde gam, go Jowap lɔ biic, ke ciɛɛth piny de Yithriɛl ëbɛ̈n, ku bïï ciëën Jeruthalem.

⁵ Go bɛ̈n ku lëk melik Debid kuën de kɔc cï lɔ yök. Kɔc ke Yithriɛl lëu luɔi de tɔŋ ayek 1,100,000, ku kɔc ke Juda lëu luɔi de tɔŋ ayek 470,000.

⁶ Ku në biäk cïï ë Jowap piɔ̈u mit kekë kë looi ë melik, akën kuën de dhiën de Lebai, ku dhiën de Benjamin nööm.

⁷ Nhialic akën piɔ̈u miɛt kekë kë cï loi, go kɔc ke Yithriɛl luöi këtuc.

⁸ Go Debid lɛ̈k Nhialic, an, “Yɛn cï wäc arëët në kë cän ee kënë looi! Pälë yɛn awänydï. Yɛn cï kuöc luui ë ciën piɔ̈u.”

⁹ Go Nhialic Gad yɔ̈ɔ̈k, monydaai de Debid,

¹⁰ An, “Lɔ lɛ̈k ë Debid an, yïn cä gäm käŋ kadiäk bï yïn ke tök kuany thïn, ku töŋ bï kuany yen abä looi.”

¹¹ Go Gad lɔ tëde Debid ku lueel kë cïï Bɛ̈nydït lɛ̈k en, ku thiëëc an, “Ee kënou bï bɛ̈n ee kakë yiic?

¹² Run kadiäk ke cɔk? Ku nɔn ee pɛ̈i kadiäk, bïï kɔc ke riŋ ë rem de tɔŋ de kɔckuön ke ater? Ku nɔn ee nïn kadiäk bï Bɛ̈nydït kɔc riɔ̈ɔ̈k, bïï we mak në abätäude, ku tuc we jɔɔk ee kɔc thöl pinydun, ku tunynhial ë Bɛ̈nydït abï thuɔɔu bɛ̈ɛ̈i piny de Yithriɛl ëbɛ̈n, ee thoŋ ou yen bä pɔ̈k nɔm Bɛ̈nydït bä lɔ lɛ̈k en?”

¹³ Go Debid pɔ̈k nɔm Gad an, “Yɛn tɔ̈u ë nuandït yic! Ku acä kɔɔr bï kɔc ya luöi këtuc. Tɔ ee Bɛ̈nydït yen bï ya luöi këtuc ë yen, në biäk ee yen piɔ̈u kok.”

¹⁴ Go Bɛ̈nydït kɔc ke Yithriɛl tuöc jɔk, go aguum kathiërdhorou 70,000 thou.

¹⁵ Go Nhialic tunynhial tooc bï Jeruthalem lɔ riɔ̈ɔ̈k, go yenɔm waar ku yɔ̈ɔ̈k tunynhial an, “Kääcë! Kënë ë loi!” Ku tunynhial ë Bɛ̈nydït aa kääc tëthiääk ke yiɛɛu de Arauna raan ë Jebuth.

¹⁶ Go Debid tunynhial ë Bɛ̈nydït tïŋ ke kääc e kaam de të nhial ku piny, ke muk abätäu ë yeciin, ke cï rɔt coc bï Jeruthalem riɔ̈ɔ̈k. Go Debid ku bänyke ke ke ceŋ lupɔɔ ke cual ë kekɔ̈ɔ̈th, gokï kenïïm guöt piny abïk piny jak ë kenïïm.

¹⁷ Go ë Debid lɛ̈k Nhialic an, “Nhialic, ee yɛn ë loi kërac. Ee yɛn ë tɔ kɔc kuen. Eeŋö cï ee kɔc kuany nyïïnkë looi? Bɛ̈nydït Nhialicdï, luöiyë ë yɛn këtuc wok ë baaidï ku päl kɔcku.”

¹⁸ Go tunynhial ë Bɛ̈nydït lɛ̈k Gad, bï Debid yɔ̈ɔ̈k bï yïïŋ de Bɛ̈nydït lɔ yïk ë yiɛɛu de Arauna yic.

¹⁹ Go Debid jam de Bɛ̈nydït gam, go lɔ looi cït man cïï ë Gad ye lɛ̈k en

²⁰ Ëtɛ̈ɛ̈n Arauna aake käm agamɔ kekë wɛ̈ɛ̈tke kaŋuan, na wën aa lek tunynhial tïŋ, gokï kat ku lek thiaan.

²¹ Ee tëthiinë ke Arauna tïŋ melik Debid ke bɔ̈ tëde yiɛɛu, go yiɛɛu nyääŋ piny, ku loor melik nɔm ku gut yenɔm piny abï piny jak ë yenɔm.

²² Go melik Debid lɛ̈k en an, “Ɣɔ̈cë yɛn ë yiɛɛudu bä yɛn yïïŋ de Bɛ̈nydït yïk, ke bï ee jɔŋë tɔ kääc. Ku yïn bä gäm kuëndu ëbɛ̈n.”

²³ Go ë Arauna lɛ̈k Debid an, “Nöm bɛ̈ny lɔ loi këduön kɔɔr në yïpiɔ̈u. Ku yɛn cï miöör gäm ke ke ye miɔ̈c ye nyop ëbɛ̈n, ku nöm tiim ke käm ke ke bïï ë mac dɛ̈ɛ̈p, ku agamɔ ke ye miɔ̈c ë rap, acä ke gäm yïn kedhie.”

²⁴ Go ë melik bɛ̈ɛ̈r an, “Ei, yïn bä gäm kuën de ɣööc ëbɛ̈n. Yɛn cïï Bɛ̈nydït bï gäm miɔ̈c ye nyop ëbɛ̈n ë këdu, kë cïn kuën cä cuat piny.”

²⁵ Ago Arauna gäm bot kadhetem de wëu ke adhääp ke ye ɣööc de yiɛɛu.

²⁶ Go yïïŋ de Bɛ̈nydït yïk ëtɛ̈ɛ̈n, ku gɛm miɔ̈c ye nyop ëbɛ̈n, ku miɔ̈c de mät. Ago lɔ̈ŋ, go Bɛ̈nydït lɔ̈ŋde bɛ̈ɛ̈r ku tɔ mac tɔ bɔ̈ paannhial bïï miɔ̈c bɛ̈n nyop ë yïk nɔm.

²⁷ Go Bɛ̈nydït lɛ̈k tunynhial bï abätäude tääu piny, go tunynhial jam lueel ë Bɛ̈nydït gam.

²⁸ Go Debid ye tïŋ nɔn cï Bɛ̈nydït lɔ̈ŋde piŋ ë yic, ëtɛ̈ɛ̈n go Bɛ̈nydït gäm miɔ̈c ë yïk nɔm, yïïŋ nu ë yiɛɛu de Arauna yic.

²⁹ Në ye aköölkë yiic, paany de män de Bɛ̈nydït, wään bï ë Mothe looi ë jɔ̈ɔ̈r yic, ku yïïŋ de miɔ̈c ye nyop ëbɛ̈n, aake ŋoot ke ke nu të de läm ë Gibiɔn.

³⁰ Ku Debid akën lɔ ëtɛ̈ɛ̈n bï lɔ lam, në biäk ë riɔ̈ɔ̈c en në abätäu de tunynhial ë Bɛ̈nydït.