1 Lëk 20 - JAM DE NHIALIC 2011

Debid Apec Raba

¹ Na ɣɔn yaak, të ye melik tɔŋ dap lɔ thɔ̈ɔ̈r, go Jowap rem de tɔŋ lɛɛr tɔŋ ku peec piny de Ammon, ku melik Debid aa rɛ̈ɛ̈r ë Jeruthalem. Gokï pänydït de Raba gɛɛu cil, ku mɛkï ku riäkkï.

² Kɔc ke Ammon adekï yanhdɛn cɔl Molek, ku melik de kɔc ke Ammon ade nɔm göl de adhääp ye thëmde kilɔɔ kathiërdiäk ku ŋuan, ku ade yic kɔi tuc ë ɣööcden, go ë Debid nööm ku tɛ̈ɛ̈u ë gölde yic ku tɛ̈ɛ̈u ë yenɔm. Go kajuëc arëët peec ë pänydïtic.

³ Acï kɔc ke pänydït nööm, ku tɔ keek guaŋ tiim, ku loikï pur, ku yiëëp në wëëth. Ku luui kɔc juëc tɔ̈u ë wuöt ke Ammon yiic kë cït ee kënë. Go rɔt jɔ pɔ̈k Jeruthalem kekë kɔcke.

Tɔŋ në Kɔc Dït Kɔ̈ɔ̈th ke Pilithiin

⁴ Na ɣɔn ke tɔŋ ë be rɔt nyɔk kekë kɔc ke Pilithiin ë Gedher. Ee të wään cï Thibekai raan wun ë Ɣuca, raan dït kɔ̈u cɔl Thipai nɔ̈k, ago kɔc ke Pilithiin tiaam.

⁵ Go tɔŋ däŋ rɔt nyɔk në kɔc ke Pilithiin, ago Elanan wën de Jayir Laɣimi mänhë Goliath nɔ̈k, ee raan wun ë Gath, aa de nɔm tɔŋ de wai dïït cït luny de cuɛ̈c ë lupɔɔ.

⁶ Ku be tɔŋ däŋ rɔt nyɔk ë Gath, të tɔ̈u raandïït de riöp kadhetem ë ciin tök ku riöp kadhetem ë cökiic kedhie. Aa ye kuat de röördït thɛɛr.

⁷ Go kɔc ke Yithriɛl riɔ̈ɔ̈k gup, ago Jɔnathan wën de Cama mänhë ë Debid ye nɔ̈k.

⁸ Kek ee kɔc kadiäk cï Debid keek nɔ̈k kekë kɔcke, aake ye kuat de röördït thɛɛr ke Gath.