1 Lëk 19 - JAM DE NHIALIC 2011

Debid Atiam Kɔc ke Amon ku Kɔc ke Thiriya

¹ Na ɣɔn aacï nïn lɔ, go Naɣac melik de kɔc ke Ammon thou, go Ɣanun wënde lɔ në nyinde yic ke ye melik,

² Go melik Debid lueel an, “Yɛn bï Määthdï dhil nyuöth Ɣanun cït man ɣɔn cïï wun Naɣac määthde nyuöth ɛn.” Go Debid kɔc tuöc Ɣanun bï lɔ riit piɔ̈u ë këde thon de wun.

³ Ago bäny ke Ammon lɛ̈k melik Ɣanun an, “Ye tak Debid ë dhuëŋ wuur guöp, yen ë tuuc en ee kɔckë, bïk yïn bɛ̈n riitpiɔ̈u? Acie yen, aa tuuc ee kɔckë ke ke ye nëëm, bïk piny bɛ̈n ŋic, në biäk bï kek baai bɛ̈n peec!”

⁴ Go Ɣanun tuuc ke Debid dɔm ku muut kethook, ku tem lupɔɔken ë ke ɣöi, ku tɔ keek puk röt ciëën.

⁵ Gokï gup riɔ̈ɔ̈c ë luɔi bï kek röt pɔ̈k ciëën, na wën aa lɔ Debid kë cï lɔ tuöl tëde tuucke piŋ, go thok tuöc keek bïk rëër ë Jeriko, agut të bï nhïm bɛ cil ë kethook.

⁶ Ago melik Ɣanun ku kɔc ke Ammon jɔ ŋic nɔn cï kek Debid tɔ ee raan de aterden, gokï aguum kathiërdiäk ku ŋuan 34,000 de kilɔɔ ke atek gam, riɔp kek abëël ke tɔŋ, ku kɔc ee jöŋgöör kuaath, në Methopotamia, ku tëde piiny ke Athiriya yï: Maaka, ku Dhoba.

⁷ Acïk aguum kathiërdiäk ku rou 32,000 ke abëël ke tɔŋ riɔp, go rem de tɔŋ de melik de Maaka bɛ̈n ku nyuckï të thiääk ke Medeba. Ku bɔ̈ kɔc ke Ammon bei kedhie aya ë pɛ̈ɛ̈nydïtken yiic, bïk bɛ̈n rëër ke ke tit tɔŋ.

⁸ Na wën lɔ Debid kë loi rɔt piŋ, go Jowap tuɔɔc biic kekë rem de tɔŋ ëbɛ̈n.

⁹ Go kɔc ke Ammon bɛ̈n biic ku tekkï tuŋken ë kueer lɔ Raba, pänydïïtden, ku bɔ̈ meliik wën bï ke bɛ̈n kuɔny, ku tekkï tuŋken ë wut thok biic.

¹⁰ Na wën cï Jowap ye tïŋ ke tɔŋ bɔ̈ ë yenɔm tueŋ ku kënë ë yekɔ̈u ciëën, Go wɛ̈ɛ̈t piɛth cï wɛ̈ɛ̈t ë tɔŋ de Yithriɛl kuany, ku tɛ̈ɛ̈u keek ë tuŋ thook ke ke wël kenïïm rem de tɔŋ de Athiriya.

¹¹ Ku jɔ biäk de rem tɔŋ gäm mänhë Abicai, go keek nyuööc ë tuŋ thok, ke ke wël kenïïm rem de tɔŋ de Ammon.

¹² Go Jowap lɛ̈k en an, “Na lɔ rem de tɔŋ de Athiriya tïŋ ke tiam ɛn ke yï bɔ̈, bä yɛn bɛ̈n kony, ku na lɔ rem de tɔŋ de Ammon yïn lɔ tiam ke yïn bä bɛ̈n kony.

¹³ Riit yïpiɔ̈u, piɔ̈tku ë riɛl në biäk de kɔckuɔ, ku në biäk de pɛ̈ɛ̈nydït ke Nhialicda. Ku në këde piɔ̈n ë Bɛ̈nydït ë loi.”

¹⁴ Go rem de Jowap lɔ thïn ke ke mɛk rem de tɔŋ de Thiriya, gokï kat.

¹⁵ Na wën aa lɔ rem de tɔŋ de Ammon rem de Thiriya tïŋ ke cï kat, gokï kat në Abicai ku pukkï röt ë pänydïtic. Go Jowap rɔt pɔ̈k Jeruthalem.

¹⁶ Na wën cï Thiriya ye tïŋ nɔn cï ë kɔc ke Yithriɛl keek tiaam, gokï rem de tɔŋ däŋ lɔ bɛ̈ɛ̈i ë wuöt ke Thiriya tɔ̈u ë biäk të lɔ aköl amiäk de wɛ̈ɛ̈r ë Yuparat, ku tɛ̈ɛ̈ukï keek ë Bɛ̈ny de rem de tɔŋ cɔl Cobak cök, bɛ̈ny ë rem de tɔŋ de Melik Ɣadadedher de Dhoba.

¹⁷ Na lɔ Debid ye piŋ, go rem de tɔŋ de Yithriɛl määtiic, ku temkï Kiir de Jordan, ku tɔ ke wël kenïïm rem de tɔŋ de Thiriya. Go tɔŋ jɔ rɔ̈m,

¹⁸ ago rem de tɔŋ de Yithriɛl, rem de tɔŋ de Thiriya cuɔp ciëën. Ago Debid kekë rem de tɔŋde aguum kadhorou 7,000 nɔ̈k në rem de tɔŋ de abëël ke tɔŋ, ku nɛ̈k aguum kathiërŋuan 40,000 de rem de tɔŋ ee cath piny. Acïk Cobak bɛ̈ny ë rem de tɔŋ de Thiriya nɔ̈k.

¹⁹ Na ɣɔn aa lɔ meliik ɣɔn tɔ̈u ë melik Ɣadadedher cök ye ŋic nɔn cï ë Yithriɛl keek tiaam ë tɔŋ, gokï mät looi ë melik Debid, ku jɔkï tɔ̈u ë ciɛɛŋ de melik Debid yic. Akën ë kɔc ke Thiriya bɛ̈n bɛ tak nɔn bï kek kɔc ke Ammon kony.