1 Lëk 18 - JAM DE NHIALIC 2011

Tiëm de Debid ë Tɔɔŋ Yiic

¹ Na ɣɔn aacï nïn lɔ, go melik Debid Pilithiin bɛ mak ku tiɛɛm keek. Go pänydït de Gath ë mɛckï peec kekë bɛ̈i thiääk ë yen.

² Acï kɔc ke Mowap tiaam aya, ago keek cieŋ ku yek yen kuöt athölbö.

³ Na lee rɔt nyɔk ke Debid ë mɛk Ɣadadedher melik de Athiriya de piny cɔl Dhoba, athiääk ke piny de Ɣamath, në baŋ ë kɔɔr Ɣadadedher bï biäk nhial të lɔ wɛ̈ɛ̈r ë Yuparat nööm.

⁴ Go Debid agum 1000 de abëëlkɛn ke tɔŋ peec, ku peec aguum kadhorou 7,000 ke kɔc ke jöŋgöör, ku peec aguum kathiërrou 20,000 ke rem de tɔŋ cath piny. Go rɔt muɔ̈k joŋgöör juëc bïk bɔt de abëël ke tɔŋ aa lɔ thel, ku dhuuŋ kakë cök kedhie.

⁵ Na ɣɔn aa lɔ kɔc ke Thiriya tɔ̈u ë Damathko rem de tɔŋ tooc bïk Melik Ɣadadedher lɔ kony, go ë Debid keek mak ku nɛ̈k aguum kathiërrou ku rou 22,000 de kɔc.

⁶ Na wën ke tɛ̈ɛ̈u pɛɛny ke rem de tɔŋ piny de Thiriya, go keek cieŋ ku yek yen kuöt athölbö. Go Bɛ̈nydït Debid tɔ tiëm ë ɣään yiic kedhie.

⁷ Ago Debid kööt ke adhääp ye bäny ke melik Ɣadadedher ɣɛ̈ɛ̈c peec, ku leer keek Jeruthalem.

⁸ Ku jɔt malɔ̈ɔ̈ŋ juëc aya në Tibiɣath ku Kun, pɛ̈ɛ̈nydït cieŋ ë melik Ɣadadedher keek. (Acï Tholomon ke lɔ̈ɔ̈rdït ë pïïu, ku wai, ku aduuk ke Luaŋdït bɛ̈n looi në ee malɔ̈ɔ̈ŋkë).

⁹ Na ɣɔn aa lɔ Tou melik de Ɣamath ye piŋ luɔi cï Debid rem de melik Ɣadadedher tiaam ëbɛ̈n.

¹⁰ Go wëndɛn Joram tuöc melik Debid, bï lɔ riit piɔ̈u në biäk cïï yen Ɣadadedher tiaam, raan ɣɔn ee cool ë thäär kekë Tou. Joram acï miɔ̈c yiɛ̈n melik Debid, miɔ̈c de adhääp, ku atek, ku maläŋ.

¹¹ Go melik Debid ke gam ke ke ye kake luɔi tëde läm, ku mɛt keek në atek ku adhɛ̈p wään cï ke peec tëde juöör yï: Edom, ku Mowap, ku Ammon, ku Pilithiin, ku Amalek.

¹² Go Abicai wën de tiiŋ cɔl Dheruia kɔc ke Edom tiaam ë Wak de Amilɔ yic, ku nɛ̈k aguum kathiëër ku bɛ̈t 18,000 ë ke yiic.

¹³ Ku piɛ̈ɛ̈t pɛɛny ke rem de tɔŋ piny de Edom ëbɛ̈n, go Debid kɔc nu ëtɛ̈ɛ̈n cieŋ. Go Bɛ̈nydït Debid tɔ tiëm ë ɣään yiic kedhie.

¹⁴ Go Debid aa bɛ̈ny ceŋ kɔc ke Yithriɛl ëbɛ̈n, ku jɔ löŋ looi luɔi bï ë kɔcke aa luööi apiɛth ku ye löŋ ŋiëc guiir.

¹⁵ Ku Jowap wën de Dheruia mänhë Abicai aaye bɛ̈ny ë rem de tɔŋ, ku Jeɣocapat wën de Aɣilud ee raan ee käŋ gɔ̈ɔ̈r.

¹⁶ Dhadok wën de Aɣitup ku Aɣimelek wën de Abiathar kek ee bäny ke kake Nhialic, ku Cabica ee raan ee kake ke luɔk gɔ̈ɔ̈r,

¹⁷ Benaya wën de Jeɣoyada yen aye bɛ̈ny de Kereth ku Peleth rem de tɔŋ ë kɔc ee Debid tiit, ku jɔ wɛ̈ɛ̈t ke melik Debid ɣään ke bääny dït muk ë luɔide yic.