1 Lëk 17 - JAM DE NHIALIC 2011

Jam Lëk ë Nathan Debid

¹ Wään melik Debid aa rɛ̈ɛ̈r ɣönde. Na wën ke jɔ raan tuöc tiët Nathan ku lëk en an, “Yakï rɛ̈ɛ̈r ɣön cï yïk ë tiim ke thidar, ku Athänduŋ de män de Bɛ̈nydït atɔ̈u në paanyic.”

² Go Nathan bɛ̈ɛ̈r an, “Loi këriëëc nu ë yïpiɔ̈u ëbɛ̈n, në biäk tɔ̈u ë Nhialic ke yïn.”

³ Ku në ee wɛ̈ɛ̈rë yic ke jam de Bɛ̈nydït bɔ̈ tëde Nathan an,

⁴ “Lɔ lɛ̈kë awundiën Debid an, ‘Acie yïn bï Ya yiëk ɣön bän rɛ̈ɛ̈r thïn.

⁵ Të ɣɔn kuɔny Ɛn kɔc ke Yithriɛl në kɔc ke Rip cin, agut cï ënɔɔnë Yɛn cïn ɣön cän rëër thïn Yɛn aa rɛ̈ɛ̈r ë paany yic, Yɛn ee lɔ tɛ̈n ku la tɛ̈n.

⁶ Në cäthdï yic ëbɛ̈n wokë kɔc ke Yithriɛl, acïn bɛ̈ny töŋ cä kɔn thiëëc në bäny cä kuany an eeŋö kën kek Yɛn yiëk Luaŋdït ë tiim ke thidar.’

⁷ “Ka yen lɛ̈kë awundiën Debid an, Yɛn Bɛ̈nydït de rɛm alɛ̈k yen an, ‘Yïn cä jɔt të wään ee yïn tïn ë thök ë duumiic, ku bä yï bɛ̈n looi ke yï ye bɛ̈ny de kɔckiën ke Yithriɛl.

⁸ Yɛn aa ye tɔ̈u wo yïn ë ɣään ee yïn ke lɔ thïn ëbɛ̈n, ku ta yïn tɔ tiam kɔc ke aterdu kedhie në yïnɔm. Yïn bä tɔ de kɛk cït bänydït ke piny nɔm.

^9-10 Yɛn cï kɔckï lɔ̈c piny ku abä keek tɔ ɣäp ëtɛ̈ɛ̈n, të bïï kek rëër ke cïn raan bï ke bɛ yɔŋ. Gɔl ɣɔn të wään bïï kek ee pinyë acï keek bɛ̈n aa mak ë kɔc ke akuöörkuöör, ku kënë acïï rɔt bï bɛ nyɔk. Acä lueel nɔn bän kɔc ke aterdun tiaam kedhie, ku yïn bä gäm kuat.

¹¹ Na lɔ lɔ thou, ke yïn bï tɔ̈ɔ̈u wekë kuarkun, ku Yɛn bï wënduön tök në wɛ̈ɛ̈tku yiic tɔ ee melik ku Yɛn bï ciɛɛŋde muk aril.

¹² Ee yen bï Yɛn yiɛ̈k ɣöt, ku Yɛn bï thöönyde muk aɣet athɛɛr.

¹³ Yɛn bï aa wun, ku yen abï aa wëndï, ku Yɛn cï nhiëërdiën agɔk bï nyaai tëde yen, cït man ɣɔn cän ye kɔn nyaai tëde Thaulo, raan wään bä nyaai ago aa melik.

¹⁴ Ku yen abä tääu ë kɔckï nïïm ku ciɛɛŋdï nɔm aɣet athɛɛr. Ku thöönyde abï tɔ̈u aɣet athɛɛr.”’

¹⁵ Go Nathan ee wëlkë lɔ lɛ̈k Debid ëbɛ̈n, wël cïï Bɛ̈nydït ke lɛ̈k en.

Debid Alec Bɛ̈nydït në Lɔ̈ŋ

¹⁶ Na wën ke Debid ë lɔ në paany de Bɛ̈nydïtic, ku nyuuc ku lɛ̈ŋ lueel an, “Yɛn cïï rɔ̈ŋ we kë cï luöi yɛn, Bɛ̈nydït Nhialic, ayï baaida aya acïï rɔ̈ŋ ke kë cï looi.

¹⁷ Ayï ee nɔɔnë yïn ŋoot ke yï loi kajuëc, yïn cï gutguut looi në biäk de kuatdï ë run bï lɔ̈ɔ̈k bɛ̈n, ku yïn Bɛ̈nydït Nhialic yïn luui yɛn ë luɔi de raan dït.

¹⁸ Eeŋö däŋ bä bɛ lɛ̈k yïn! Yïn ŋic ɛn apiɛth, ku yïn ŋoot ke yï dhuëëŋ ɛn guöp, yɛn awundu.

¹⁹ Ee këde piɔ̈ndu ku täŋdu yen alui yïn yɛn ee kakë, ku bä yɛn nyuöth dïtdiën tɔ̈u tueŋ.

²⁰ Bɛ̈nydït acïn raan cït Yïn, ayok ŋic ë ceŋ nɔn ee Yïn Nhialic yïtök.

²¹ Acïn jur däŋ tɔ̈u ë piny nɔm cït Yithriɛl, kɔc cï keek wɛ̈ɛ̈r bei ë lïïmic bïk aa kɔcku. Göök ku kake gäi cï luöi keek, acï lɛcdu thiäi ë piny nɔm. Yïn cï kɔcku wɛ̈ɛ̈r bei ë Rip, ku cop juöör kɔ̈k wään lee ë kɔcku ke ke bɔ̈.

²² Yïn cï kɔc ke Yithriɛl looi ke ke ye kɔcku aɣet athɛɛr, ku Yïn Bɛ̈nydït Yïn cï aa Nhialicden.

²³ “Ku ënɔɔnë, Bɛ̈nydït, tɔ kakuön wään cï lueel kedhie, në biäkdï ku në biäk de kuatdï, tɔ ke loi röt cït man ë kë cï lueel.

²⁴ Kɛkdu abï dït, ku abï kɔc aa lueel aɣet athɛɛr an, ‘Bɛ̈nydït de rɛm, ee Yen ee Nhialic de Yithriɛl.’ Ku yïn bï kuatdï muk aköölnyïïn ëbɛ̈n.

²⁵ Yɛn cï piɔ̈u riɛl bä yïn lɔ̈ŋ ee lɔ̈ŋë, Nhialicdï, në biäk cïï yïn yɛn nyuöth ee kakë kedhie, yɛn awundu, ku Yïn cï yɛn yɔ̈ɔ̈k nɔn bï yïn kuatdï tɔ ee meliik.

²⁶ Yïn Bɛ̈nydït, Yïn ee Nhialic, ku Yïn cï yɛn luöi ee gutguut piɛthë,

²⁷ Yïn bä thiëc bä kuatdï thieei, në biäk bïï kek ŋoot ke ke yök piathdu. Acï keek thieei Bɛ̈nydït, ku athiɛɛidu abï tɔ̈u ke keek aɣet athɛɛr.”