1 Lëk 16 - JAM DE NHIALIC 2011

¹ Gokï Athänduŋ de Nhialic bɛ̈ɛ̈i, ku tɛ̈ɛ̈ukï në paany yic, paany ɣɔn cïï Debid luöi yen, agokï miɔ̈c ye nyop ëbɛ̈n gam ku gɛmkï miɔ̈c de mät ë Nhialic nɔm.

² Na wën aacï Debid miɔ̈c ye nyop ëbɛ̈n thöl ë gɛm ku gɛm miɔ̈c de mät, ke jɔ kɔc thieei në rin ke Bɛ̈nydït.

³ Ku jɔ kɔc tɛ̈k kacaam kedhie. Ee moc ku tik paan de Yithriɛl gäm kuïn cï pam ku rïŋ cï nyop, ku kuïn de thön cï pam, ku kalik ke rap.

⁴ Go Debid kɔc ke Lebai kuany bïk Bɛ̈nydït, Nhialic de Yithriɛl aa luööi në athänduŋ de mät nɔm, ku bïk aa lam, ku yek leec, ku bïk Bɛ̈nydït, Nhialic de Yithriɛl aa piɔɔny.

⁵ Go Athap kuany ke ee bɛ̈ny ku lɔ Dhekaria ë yecök. Ku Jeyel, ku Cemiramoth, ku Jeɣel, ku Matithia, ku Eliap, ku Benaya, ku Obed Edom, ku Jeyel yen ee raan ee thom gut ku aruöör, ku koth Athap tuŋ.

⁶ Ku bäny ke kake Nhialic kaarou Benaya ku Jaɣadhiel, ee kek bï kɛŋ aa kooth aköölnyïïn, në athänduŋ de mät nɔm.

⁷ Yen ëtɛ̈ɛ̈n yen acïï Debid, Athap bɛ̈n gäm luɔi tueŋ kekë kɔckɛn ke Lebai, bïk Bɛ̈nydït aa lɛ̈k thieithieei ë kiët ë diɛt.

Diɛt ke Piɔ̈ny

⁸ Lɛckï Bɛ̈nydït, luɛɛlkï dïtde, lɛ̈kkï juöör ka cï ke looi,

⁹ kɛ̈tkï Bɛ̈nydït diɛt ke piɔ̈ny, luɛlkï kake gäi cï ke looi,

¹⁰ Miɛtkï piɔ̈ɔ̈th ë dhuëëŋ de rinkɛn ɣeriic, takï kɔc ee Bɛ̈nydït lam mitpiɔ̈ɔ̈th.

¹¹ Lakï të nu Bɛ̈nydït ke bï we kony, ku yakkï lam ëceŋ.

¹² Wek kuat de Jakop, lïïm ke Nhialic, wek kuat de Yithriɛl, kɔc cïï Nhialic ke lɔc,

¹³ Yak kake gäi cïï Nhialic ke looi tak, ku guëër de löŋ cï looi.

¹⁴ Bɛ̈nydït ee Nhialicda, lööŋke ayek kake pinynɔm ëbɛ̈n,

¹⁵ Duökï nïïm mär në löŋ cï mac, löŋ bï tɔ̈u aɣet athɛɛr,

¹⁶ Löŋdɛn cï mac kekë Abraɣam, ku gutguutdɛn cï looi kekë Yithaak.

¹⁷ Bɛ̈nydït acï amat looi kekë Jakop, löŋ bï tɔ̈u athɛɛr kekë Yithriɛl.

¹⁸ Yïn bä gäm piny de Kanaan, ku lueel an, “Abï aa këdu.”

¹⁹ Kɔc ke Nhialic aake lik ë kuɛ̈n, kamaan nu piny de Kanaan,

²⁰ Ayek tai, ke ke lɔ jurë ku lekkï jurë yic, ku në ciɛɛŋë yic lekkï të däŋ.

²¹ Ku akën ë Nhialic keek tɔ yɔŋ ë raan, në luɔi gël en keek, go meliik yɔ̈ɔ̈k,

²² Duökï kɔckiën cä lɔc lui kërac, duökï tïtkï jak,

²³ Kɛ̈tkï Bɛ̈nydït diɛt, wek kɔc ke piny nɔm, yakkï wëlpiɛth cï yen wo kony luɛɛl aköölnyïïn kedhie.

²⁴ Luɛlkï dhuëëŋde në juöör yiic ëbɛ̈n, ku lɛ̈kkï kɔc göök cï looi kedhie.

²⁵ Nhialic adït ku yen abï ya piɔny, yen abï aa dhuëëŋ guöp awär yiëth kedhie.

²⁶ Yiëth ke kɔc kɔ̈k ayek yiëth tei, ku Bɛ̈nydït yen aa cak paannhial.

²⁷ Dhuëëŋ ku riëëu acïk ye gɛɛu cil, ku riɛl ku miɛtëpiɔ̈u acïk Luaŋdït thiɔ̈ɔ̈ŋ.

²⁸ Pianykï Bɛ̈nydït wek kɔc ke piny nɔm ëbɛ̈n, pianykï dhuëëŋ ku riɛl dïïtde.

²⁹ Pianykï dhuëëŋ de rin ke Bɛ̈nydït, bɛ̈ɛ̈ikï miɔ̈c, ku bäkï Luaŋdït, Lamkï Bɛ̈nydït ɣeric, të cï yen tïc,

³⁰ takï röt lɛthë ë yenɔm, wek kɔc ke piny nɔm! Piny nɔm acï riɛɛt piny ku acïï duëërë nyaai.

³¹ Miɛtkï piɔ̈ɔ̈th wek yï paannhial wekë piny! Lɛ̈kkï juöör an, Bɛ̈nydït ee Melik!

³² Takï wɛ̈ɛ̈r wuur, ku këriëëc cï cak nu ë yï yïc ëbɛ̈n, Miɛtkï piɔ̈ɔ̈th, wek duum, ku këriëëc nu ë yï yic.

³³ Tiim tɔ̈u ë rooriic abïk wuou ë miɛt de piɔ̈u, të lee Bɛ̈nydït bɛ̈n bï piny bɛ̈n cieŋ.

³⁴ Gamkï Bɛ̈nydït lɛc, në biäk de piathde, ku nhiëërdɛn agɔk atɔ̈u athɛɛr.

³⁵ Lɛ̈kkï yen an, “Kony wook, Nhialic Konyda, ku määt ë wo yiic, ku kony wook në juöör, agoku yïn aa leec, ku lecku rinkuön ɣeriic.

³⁶ Pianykï Bɛ̈nydït, Nhialic de Yithriɛl! Lɛckï nɔm ënɔɔnë ku aɣet thɛɛr! Ku abïï kɔc kedhie lueel an, “Amiin”, ku piɔnykï Bɛ̈nydït.

Läm ë Jeruthalem ku Gibiɔn

³⁷ Melik Debid acï Athap ku kɔckɛn ke Lebai tɔ̈u ë yecök gäm luɔi ë läm ë ceŋ, bïk aa looi të cï Athänduŋ de mät tääu thïn. Ku abïk luɔiden aa wɛ̈ɛ̈r, ŋɛk ee luɔide gam ë köölë ku be ŋɛk bɛ luui ë kööldäŋë.

³⁸ Obed Edom wën de Jeduthun kekë wɛ̈ɛ̈t dhiënden kathiërdhetem ku bɛ̈t, abïk keek kuɔny. Ku Ɣotha ku Obed Edom ee kek ee bäny ee kɛ̈l tiit thook.

³⁹ Dhadok bɛ̈ny de kake Nhialic ku kɔckɛn ke Lebai, acï keek gäm luɔi de paany de Bɛ̈nydït tëde läm nu ë Gibiɔn.

⁴⁰ Ayek miɔ̈c ye nyop ëbɛ̈n gam miäk ku thëën ë yïk nɔm, cït man ë kë cï gɔ̈ɔ̈r ë löŋ cï Bɛ̈nydït gäm kɔc ke Yithriɛl.

⁴¹ Ku aake lui ë Ɣeman ku Jeduthun, ku kɔc kɔ̈k cï kuany, bïk Bɛ̈nydït aa leec ë diɛt, në biäk ye nhiëërdɛn agɔk tɔ̈u athɛɛr.

⁴² Ɣeman ku Jeduthun aake ye bäny ee kɛŋ ku thoom muk, ku lɔ ka kɔ̈k ke kët, ka ye diɛt ke piɔ̈ny kiit. Ku kɔc ke dhiën de Jeduthun acï ke tɔ ee kɔc ee kal tiit thok.

⁴³ Go raan ëbɛ̈n jäl, ŋɛk ee rɔt pɔ̈k paande, go Debid rɔt pɔ̈k paande, bïï baaide lɔ thieei.