1 Lëk 15 - JAM DE NHIALIC 2011

Kɔc Acïk Röt Guiir Bïk Athänduŋ de Mät lɔ Jɔt

¹ Na biäk de luɔide, go Debid ɣööt yïk ë pänydït de Debid yic. Ku jɔ piny guiir bï yen Athänduŋ de män ë Nhialic tääu thïn, ku jɔ luöi paany.

² Na ɣɔn ke lueel an, “Ee kɔc ke Lebai kapäc kek abï Athänduŋ de mät aa ɣääc, në biäk cï Bɛ̈nydït ke lɔc bïk aa ɣääc, ku bïk Bɛ̈nydït aa luöi aɣet athɛɛr.

³ Go Debid kɔc ke Yithriɛl cɔɔl kedhie bïk lɔ Jeruthalem, në biäk bï kek Athänduŋ de mät lɔ bɛ̈ɛ̈i të ɣɔn cï guiir bïï ë yen tääu thïn.

⁴ Na wën ke tɔ kuat de Aron, ku kɔc ke Lebai tɔ cɔl.

⁵ Dhiën de Lebai de Koɣath acï Yuriel bɛ̈ɛ̈i ke ye bɛ̈ny tɔ̈u ë bɔt ku thiërrou ë kɔc nïïm.

⁶ Dhiën de Merari acï Athaya bɛ̈ɛ̈i ke ee bɛ̈ny tɔ̈u ë bot kaarou ku thiërrou ë kɔc nïïm.

⁷ Dhiën de Gercon acï Jowɛl bɛ̈ɛ̈i ke ee bɛ̈ny tɔ̈u ë bɔt ku thiërdiäk ë kɔc nïïm

⁸ Dhiën de Elidhapan, acï Cemaya bɛ̈ɛ̈i ke ee bɛ̈ny ë bot kaarou ë kɔc nïïm,

⁹ Dhiën de Ɣebron, acï Eliel bɛ̈ɛ̈i ke ee bɛ̈ny tɔ̈u ë kɔc kathiërbɛ̈t nïïm.

¹⁰ Ku në dhiën de Yudhiɛl, acï Aminadab bɛ̈ɛ̈i ke ee bɛ̈ny tɔ̈u ë bɔt ku thiëër ku rou ë kɔc nïïm.

¹¹ Go Debid bäny ke kake Nhialic cɔɔl yï Dhadok, ku Abiathar ku kɔc ke Lebai kadhetem yï Yuriel, Athaya, Jowɛl, Cemaya, Eliel, ku Aminadab.

¹² Ku lëk kɔc ke Lebai an, “Wek ee bäny ke dhiën de Lebai. Wakï röt në kɔckuön ke Lebai, ke we bï Athänduŋ de män de Bɛ̈nydït, Nhialic de Yithriɛl lɔ bɛ̈ɛ̈i të cä guiir bïï ë yen tääu thïn.

¹³ Në biäk ɣɔn liɛɛu wek aguɔkï ɣääc akööl ɣɔn tueŋ. Bɛ̈nydït Nhialicda acï wook luöi këtuc në biäk kën wok en lam në kueer ye ye looi.

¹⁴ Ago bäny ke kake Nhialic ku Lebai röt tɔ piɛth, ke ke bï Athänduŋ de män de Bɛ̈nydït Nhialic de Yithriɛl lɔ bɛ̈ɛ̈i.

¹⁵ Go kɔc ke Lebai athänduŋ de Nhialic ɣääc ë ke kët ë wai, cït man cïï Bɛ̈nydït ye lɛ̈k Mothe.

¹⁶ Go Debid bäny ke Lebai yɔ̈ɔ̈k bïk kɔc ke Lebai kuany, kɔc bï diɛt läk ket ë thoom, ku lɔ̈r.

¹⁷ Go dhiën de Lebai Ɣeman wën de Jowɛl kuany kekë mïthëkɔcken, Athap wën de Berekia, ku wɛ̈ɛ̈t ke mïthëkɔcken Merari, ku Ethan wën de Kucaya.

¹⁸ Ku mïthëkɔcken ë tɔ̈u në keek, kuut de biäk de rou, ee Dhekaria, ku Jaadhiel, ku Cemiramoth, ku Jeyel, ku Yuni, ku Eliap, ku Benaya, ku Maathia, ku Matithia, ku Elipelelu, ku Mikenia, ku kɔc ee kal tiit thok Obed Edom ku Jeyel.

¹⁹ Ku kɔc ee ket ee, Ɣeman, ku Athap, ku Ethan, ee kek ee kaaŋ ë maläŋ kooth.

²⁰ Ku Dhekaria, ku Adhiel, ku Cemiramoth, ku Jeɣel, ku Yuni, ku Eliap, ku Maathia, ku Benaya ee kek ee thom gut.

²¹ Ku Matithia, ku Elipelelu, ku Mikenia, ku Obed Edom, ku Jeyel, ku Adhadhia, ee kek aruöör kooth cït man de Ceminith.

²² Ku Kenania, bɛ̈ny de kiët ë Lebai, ee yen ee diɛt wat, në biäk ŋic yen keek.

²³ Berekia ku Elekana ee kek ee kal de athänduŋ de mät tiit thok.

²⁴ Ku Cebania, ku Jocapat, ku Nethaniɛl, ku Amathai, ku Dhekaria, ku Benaya, ku Eliedher, bɛ̈ny de kake Nhialic, ee yen bï kaaŋ aa kooth në athänduŋ de män ë Nhialic nɔm. Ku Obed Edom, ku Jeɣia keek aya abïk aa kɔc ee tïït në kal de Athänduŋ de mät thok.

Athänduŋ de Mät Aleerë Jeruthalem

²⁵ Go melik Debid bäny ke Yithriɛl ku bäny ke rɛm ke tɔŋ lɔ paan de Obed Edom bïk Athänduŋ de mät lɔ bɛ̈ɛ̈i, agokï dhuëëŋ dït looi.

²⁶ Acïk miöör kadhorou ku amɛ̈l kadhorou nɔ̈k, ke ye miɔ̈c, kë bï kek en ŋic nɔn bï ë Nhialic kɔc ke Lebai ɣɛ̈ɛ̈c Athänduŋ de mät kony.

²⁷ Debid aa ceŋ alulut cï cuëëc në linɔn, ku yen ee tän de kɔc ee ket, ku Kenania bɛ̈nyden, ku kɔc ke Lebai ɣɛ̈ɛ̈c Athänduk. Ku Debid aa ceŋ ajïpɔ de lupɔ piɛth lɔ mot aya.

²⁸ Go kɔc ke Yithriɛl kedhie lɔ në Athänduŋ de män ë Bɛ̈nydït Jeruthalem, ke ke loi awuɔɔu ë miɛt de piɔ̈u, ku kothkï kɛŋ, ku tuŋ, ku aruöör, ku gutkï thoom.

²⁹ Na wën ja Athänduŋ de mät bɛ̈ɛ̈i ë pänydït de Debid yic, go Mical nyan de Thaulo luïït ë awëërnyin, ago Debid tïŋ ke cɔ̈ŋ, ke ye kɛɛc nhial ë miɛt ë piɔ̈u, go dɔl guöp ë yepiɔ̈u.