1 Lëk 14 - JAM DE NHIALIC 2011

Luɔi de Debid ë Jeruthalem

¹ Na ɣɔn ke melik Ɣiram de Tayer ë tuc Debid kɔc ë käŋ ɣaac, aɣɛ̈ɛ̈ckï tiim ke thidar, ku kur, ku atëët ee guaŋ bïk ɣönde lɔ yïk.

² Ago Debid jɔ ŋic nɔn cïï Bɛ̈nydït ye lɔc ke ye melik de Yithriɛl nɔm ëbɛ̈n, ku atɔ ciɛɛŋde tɔ kueth në baŋ de kɔc ke Yithriɛl.

³ Wään tɔ̈u ë Debid ë Jeruthalem, acï bɛ̈n thiëëk ë diäär kɔ̈k, ago bɛ̈n dɛ wɛ̈ɛ̈t juëc ku duet juëc.

⁴ Kake ayek mïthkɛn ë dhiëëth keek ë Jeruthalem: Camua, Cobab, Nathan, Tholomon,

⁵ Yibiɣar, Elicua, Elepelet,

⁶ Noga, Nepek, Japia,

⁷ Elicama, Beliada ku Elipelet.

Tiëm cï Kɔc ke Pilithiin Tiaam

⁸ Na ɣɔn aa lɔ kɔc ke Pilithiin ye piŋ nɔn cïï Debid looi ke ye Melik ë paan de Yithriɛl ëbɛ̈n, gokï remdɛn de tɔ lɔ biic, bïk lɔ dɔm. Ago Debid lɔ biic kekë remdɛn de tɔŋ bïï lɔ rɔ̈m ke keek.

⁹ Na wën aa lɔ rem de Pilithiin ɣet ë Wak de Repaim yic, gokï käŋ rum ëtɛ̈ɛ̈n.

¹⁰ Go Debid Nhialic thiëëc an, “Bä kɔc ke Pilithiin mak? Ku bä yɛn tɔ tiëm?” Go Bɛ̈nydït puk nɔm an, “Ɣɛɛ, makë keek ku yïn bä tɔ tiëm!”

¹¹ Go Debid keek lɔ mak ë Baal Peradhim ku tiɛɛm keek. Go lueel an, “Nhialic acï yɛn tɔ thur kɔc ke ater yiic cït amool.” Yen acï ëtɛ̈ɛ̈n bɛ̈n cäk Baal Peradhim.

¹² Na wën cïï ë kɔc ke Pilithiin kat, acïk yiëthken nyääŋ piny, go Debid löŋ tääu piny bï keek nyop.

¹³ Ee tëthiinë go rem de Pilithiin bɛ lɔ bɛ̈n ciëën ë wakic ku bekï käŋ rum.

¹⁴ Go Debid Nhialic nyɔk ë thiëc, go lɛ̈k en an, “Du keek be mak eetënë, yïn bï lɔ tëëkë kekɔ̈ɔ̈th ë biäk tui, të thiääk ke tiim ke baltham.

¹⁵ Na lɔ awuööu de cök piŋ ke cath ë tiim ke baltham nïïm, ke jɔ keek mak, yɛn bï cath ë yïnɔm tueŋ ke ya bï rem de tɔŋ de Pilithiin lɔ tiaam.”

¹⁶ Go Debid kë cïï Nhialic lɛ̈k en looi, go rem de Pilithiin pɔ̈k nɔm ciëën ëtɛ̈ɛ̈n, gɔl ë Gibiɔn abï ke ɣɛɛt ë kueer de Gedheric.

¹⁷ Ago kɛk de Debid bɛ̈n thiäi ë ɣään yiic ëbɛ̈n, go Bɛ̈nydït juöör kedhie tɔ riɔ̈c ë yen.