1 Lëk 13 - JAM DE NHIALIC 2011

Athänduŋ de Mät Ajɔt ë Kiriath Jiriim

¹ Na ɣɔn ke melik Debid ë jam ke bäny ke rem de agum ku bäny ke rem de bɔt.

² Na wën cï jɔ thök ë mät ke keek ku jɔ lɛ̈k amatnɔm de Yithriɛl ëbɛ̈n an, “Na cäk gam, ku na ye këde Bɛ̈nydït Nhialicda piɔ̈u, ke wo duëër tuuc tooc, bïk kɔckuɔn kɔ̈k lɔ lɛ̈k, ku bäny ke kake Nhialic, ku kɔc ke Lebai ë wuötken yiic, ku bïk keek yɔ̈ɔ̈k bïk bɛ̈n mat ë wook ee tënë.

³ Ku wok bï jɔ lɔ buk Athänduŋ de män ë Nhialic lɔ bɛ̈ɛ̈i, kë wään cï tɔ cïn naamde wään ye Thaulo melik.”

⁴ Go amatnɔm ëbɛ̈n piɔ̈u miɛt në ee täŋë, agokï gam.

⁵ Go Debid kɔc ke Yithriɛl mat nïïm në baai yic ëbɛ̈n, gɔl në akenden ë Rip të lɔ wöuwic leer Ɣamath thok ë biäk të lɔ rut, në biäk bïï kek Athänduŋ de mät lɔ bɛ̈ɛ̈i Jeruthalem në Kiriath Jiriim.

⁶ Go Debid lɔ pänydït de Baala kekë kɔcke, të lɔ Kiriath Jiriim piny de Juda, bïk Athänduŋ de Män ë Nhialic lɔ bɛ̈ɛ̈i, kë de yic rin ke Bɛ̈nydït tɔ̈u ë thööc nɔm nhial ë Cerubiim nïïm.

⁷ Gokï lɔ baai de Abinadap ku bïïkï Athänduŋ de mät biic ku tɛ̈ɛ̈ukï ë abël ë piac ë looi yic. Ku jɔ Yudha ku Aɣiyo abël thel,

⁸ ku jɔ Debid ke kɔc kedhie cɔ̈ŋ ë riɛlden ëbɛ̈n ke ke dhuëŋ Nhialic guöp. Gokï ket ku thuëëckï, ke ke gut thoom, ku lɔ̈r, ku kɛŋ.

⁹ Na wën aa lek bɛ̈n të de yiɛɛu de Kidon, go miöör kɔ̈th, ago Yudha yeciin rïc ku dɔm athänduŋ de mät.

¹⁰ Go Bɛ̈nydït guɔ gɔ̈th ke Yudha, go nɔ̈k në biäk cï yen Athänduk jak. Go thou ëtɛ̈ɛ̈n ë Bɛ̈nydït nɔm.

¹¹ Go ëtɛ̈ɛ̈n cäk an Peredh Yudha, acɔl “Riääk de Yudha” ë thoŋ de Ɣeberuu. Go Debid piɔ̈u jiɛth në biäk cï Bɛ̈nydït Yudha luöi këtuc në agɔ̈th.

¹² Debid acï bɛ̈n riɔ̈ɔ̈c ë Nhialic ee köölë go thiëc an, “Bä Athänduŋ de Nhialic jɔ jɔt adï?”

¹³ Go Debid Athänduk pɔ̈l ke cïï leer Pänydït de Debid. Ago nyäŋ baai de Obed Edom, raan ë pänydït de Gath.

¹⁴ Go Athänduk tɔ̈u baai de Obed Edom, ë pɛ̈i kadiäk, go Bɛ̈nydït baaide thieei ku thieei kakɛn tɔ̈u ë yen.