1 Lëk 11 - JAM DE NHIALIC 2011

Debid acï aa Meliŋ de Yithriɛl ku Juda

¹ Na ɣɔn ke kɔc ke Yithriɛl ë ke lɔ tëde Debid kedhie, ku yöökkï an, “Wok ee rïïŋdu ku riɛmdu.

² Wään thɛɛr ŋoot ë Thaulo ke ee meliŋda, yïn cï kɔc ke Yithriɛl bɛ̈n wat ë tɔŋic, ku yïn cïï Nhialic Bɛ̈nydïïtdu bɛ̈n thɔn, nɔn bï yïn kɔc ke wat, ku bä aa bɛ̈nyden.”

³ Ago bäny ke Yithriɛl kedhie lɔ tëde melik Debid ë Ɣebron. Gokï mät looi ë yen, ku jɔkï tɔc ë miök cït man ë kë cï Bɛ̈nydït lueel në Thamwɛl thok.

⁴ Ago melik Debid ke kɔc ke Yithriɛl kedhie jäl, ku mɛkkï pänydït de Jeruthalem. Aa ye cɔl Jebuth ɣɔn, ku kɔc ke Jebuth ɣɔn ceŋ piny, aake ŋoot ke ke nu ëtɛ̈ɛ̈n.

⁵ Go kɔc ke Jebuth Debid yɔ̈ɔ̈k an cïï bï lɔ ë pänydïtic, go Debid päny cï gël de Dhiɔn dɔm, ago aa cɔl “Pänydït de Debid.”

⁶ Go Debid lueel an, “Raan tueŋ bï raan ë Jebuth kɔn nɔ̈k, yen abï aa bɛ̈ny ë rem de tɔŋ!” Go Jowap wën de tiiŋ cɔl Dheruia rem de tɔŋ wat lek tɔŋ mak, ku yen acï bɛ̈n aa bɛ̈ny ë rem de tɔŋ.

⁷ Në biäk cï ë Debid lɔ rëër ë päny cï gëlic, go aa cɔl “Pänydït de Debid.”

⁸ Go Debid pänydït nyɔk ë yïk, gɔl të ɣɔn cï yïk ë biäk të lɔ aköl amiäk de kur, ku jɔ Jowap biäk de pänydït looi.

⁹ Go Debid jɔ lɔ ke ril, në biäk tɔ̈u ë Bɛ̈nydït de rɛm ke yen.

Rem de Tɔŋ ë Debid cï Leec

¹⁰ Kakë ee rin ke rem de tɔŋ ë Debid cï leec. Ëtök në kɔc kɔ̈k ke Yithriɛl, acïk en kony bï bɛ̈n ke ee melik, cït man ë kë cïï Bɛ̈nydït lueel, ku tɔkï muk ciɛɛŋde aril.

¹¹ Raan tueŋ ee Jacobiim de dhiën de Ɣakimon, bɛ̈ny de diäk. Acï piɔ̈t ke bɔt kadiäk (300) ë kɔc ke muk tɔŋ, ku nɛ̈k keek kedhie ë tɔŋ tökic.

¹² Raan däŋ lɔ në yecök në kɔc ril yiic kadiäk ee Eleyadhar wën de Dodo, raan dhiën de Aɣoya.

¹³ Aa thäär ë biäk de Debid ke kɔc ke Pilithiin në Path Damim. Aa rëër në dom de barli yic ɣɔn bï kɔc ke Yithriɛl kat.

¹⁴ Acï tɔŋ bɛ̈n dɔm kekë kɔcke në domic cil ëtɛ̈ɛ̈n, ku piɔ̈t ke kɔc ke Pilithiin. Go Bɛ̈nydït yen tɔ tiam kɔc ke Pilithiin.

¹⁵ Wään ë kööl tök go bäny ril ke rem de tɔŋ kathiërdiäk lɔ të ceŋ ë Debid ë kuur nɔm të thiääk ke köŋ de Adulam, ku rem de tɔŋ de Pilithiin aake cï nyuc ë Wak de Repaimic.

¹⁶ Ku ee kaamë yic Debid aa rɛ̈ɛ̈r ë kuur cï gël nɔm, ku kuut ë Pilithiin acïk Betheleɣem nööm.

¹⁷ Ku Debid acï baai tak, go lueel an, “Anhiaar adï jɔ raan a yiɛ̈n pïïu dɛk ë yinh nu ë kal ë Betheleɣem thok!”

¹⁸ Go wɛ̈ɛ̈t ril ke rem de tɔŋ kadiäk röt kuany, ku dhilkï tëëk ë pɛɛny ke rem ë tɔŋ de Pilithiin yiic. Gokï pïïu lɔ gem ë yith yic, ku yïnkï pïïu Debid. Ku akën pïïu bɛ̈n dek, acï ke bɛ̈n wäl piny ke ee miɔ̈c gëm Bɛ̈nydït

¹⁹ ku lueel an, “Yɛn cï duëër dek ee pïïukë! Yɛn duëër ciët kë cï riɛm de ee kɔckë dek, kɔc cï wëiken kuɔɔn!” Go jaai cï ke dek. Kek luɔi de jööt de rem de ril kadiäk ka.

²⁰ Ku Abicai mänhë Jowap ee yen bɛ̈ny de wɛ̈ɛ̈t “Cï Leec Kathiërdiäk.” Acï thɔ̈ɔ̈r ke bot kadiäk de kɔc në tɔŋde go keek nɔ̈k, ago jɔ leec në ke yiic “Kathiërdiäk.”

²¹ Ee yen cï leec aläl në ke yiic kathiërdiäk. Ago bɛ̈n aa bɛ̈nyden, ku aa kënë leec aläl cït man de “Diäk.”

²² Benaya wën de Jeɣoyada, raan wun ë Kabedhiil aaye raan cï wɛ̈ɛ̈t ë tɔŋ aläl, acï kake riɛl juëc looi, acï kɔc ril ke tɔŋ de kɔc ke Mowap nɔ̈k, go lɔ ɣön ë köör në kööl tueny ë deŋ kɔi ku teem köör röl.

²³ Ku acï raan de Rip kɔn nɔ̈k, raandïït bäär ye bɛ̈ɛ̈rde mitïïr kaarou ke muk tɔŋ dït. Go Benaya ye mak ke muk thieec, ku nɛ̈ɛ̈i tɔŋ bei ë yeciin ku nɛ̈k en en.

²⁴ Kakë ayek kake riɛl cïï Benaya ke looi, ke ye raan töŋ de wäthii kathiërdiäk, acïn raan kït ke yen ë wɛ̈ɛ̈t kathiërdiäk yiic.

²⁵ Ku yen acïï jɔ ciët wɛ̈ɛ̈t kadiäk go Debid tääu ke ye bɛ̈ny de kɔc ee ye tiit.

^26-47 Kake ayek kɔc ril kɔ̈k ke rem de tɔŋ, Athaɣel mänhë Jowap, ku Elanan wën de Dodo raan ë Betheleɣem, Ku Camoth ë Ɣarod, ku Ɣeledh de Pelet. Ku Yira wën de Yikec ë Tekowa, ku Abiedher de Anathoth. Ku Thibekai raan de Ɣuca, ku Yilai raan de Aɣoya. Ku Maɣarai de Netopa, ku Ɣeled wën de Baana de Netopa. Ku Yitai wën de Ribai ë Gibia dhiën de Benjamin, ku Benaya ë Pirathon, Ɣurai ë Wak thiääk ke Gaac, Abiel raan de Arbath, Adhimabeth de Baɣuum, Eliaba ë Caalbon, Ɣacem raan de Gidhon, ku Jɔnathan wën de Cagee, raan de Ɣarar, ku Aɣiam wën de Thakar, raan de Ɣarar, ku Elipal wën de Ur, ku Ɣeper raan de Mecera, ku Aɣija raan de Pelon, ku Ɣedhro raan de Karmel, ku Naarai wën de Edhebai, ku Jowɛl mänhë Nathan, ku Mibaɣar wën de Ɣagiri, ku Dhelek raan de Ammon, ku Naɣarai raan de Beeroth, ku ye raan ee ka ke tɔŋ ke Jowap wën de Dheruia muk, ku Yira ku Garep kɔc ke Jatir. Yuria raan de Ɣit, ku Dhabad wën de Aɣilai, ku Adina wën de Cidha, ee raan dhiën de Ruben, ku ye bɛ̈ny de dhiën ë Ruben, ku ee raan töŋ de kɔc kathiërdiäk. Ɣanan wën de Maaka, ku Jocapat raan de Mithan. Ku Yudhia raan de Acetera, ku Camma ku Jeyel wɛ̈ɛ̈t ke Ɣotham raan de Aroyer. Ku Jadiil ku Joɣa wɛ̈ɛ̈t ke Cimiri, kɔc ke Tidh. Ku Eliel raan de Maɣaba, ku Jeribai, ku Jocabia, wɛ̈ɛ̈t ke Elenaam, ku Yithma raan de Mowap. Ku Eliel, ku Obed, ku Jaathiel kɔc ke Dhoba.