1 Lëk 10 - JAM DE NHIALIC 2011

Thon de Melik Thaulo

¹ Go kɔc ke Pilithiin piɔ̈t ë kɔc ke Yithriɛl ë kuur ë Gilbowa nɔm. Ago kɔc juëc ke Yithriɛl nɔ̈k ëtɛ̈ɛ̈n, ku kɔt kɔc ayï melik Thaulo kekë wɛ̈ɛ̈tke.

² Na wën ke ke gïth ë Pilithiin kueer, gokï wɛ̈ɛ̈t ke Thaulo kadiäk nɔ̈k yï: Jɔnathan, ku Abinadap, ku Malkicua.

³ Ku tɔŋ aa dït ë melik Thaulo lɔ̈ɔ̈m, go melik moc ë dhaŋ cï yiëk bɔ̈t dït.

⁴ Go dhuŋ ee kakɛn ë tɔŋ muk yɔ̈ɔ̈k an, “Bɛ̈ɛ̈iyë abätäudu bei, ku näk ɛn, ke ya cïï Pilithiin bï nɔ̈k ke ke leeŋ ɛn. Go dhuŋ ee kakɛn ë tɔŋ riɔ̈ɔ̈c bï nɔ̈k. Go Thaulo abätäude nööm ku deeny rɔt ë yethok.

⁵ Na wën aacï dhuŋ ee kakɛn ë tɔŋ muk e tïŋ nɔn cï Thaulo thou, go rɔt dɛɛny në tɔŋde thok aya ku thou.

⁶ Go Thaulo kekë wɛ̈ɛ̈tke kadiäk thou ëtök, ku acïn raan töŋ de kuatde cï bääny bɛ̈n muk.

⁷ Na wën, aa lɔ kɔc ke Yithriɛl ɣɔn rɛ̈ɛ̈r në jɔ̈ɔ̈r de Jedhreel ye piŋ, nɔn cï rem de tɔŋ kat, ku cï Thaulo kekë wɛ̈ɛ̈tke thou, gokï wuötken nyääŋ piny ku kɔtkï, go kɔc ke Pilithiin lɔ̈ɔ̈k bɛ̈n ku ɣapkï keek.

⁸ Na ɣɔn në kööl däŋ ë tɔŋ cök, go kɔc ke Pilithiin bɛ̈n ku yakkï gup ke kɔc cï thou, gokï gup ke Thaulo kekë wɛ̈ɛ̈tke yök ke ke dal në kuur ë Gilbowa nɔm.

⁹ Gokï Thaulo tɛ̈ɛ̈m nɔm bei, ku temkï cin ku jɔkï kakɛn ë tɔŋ ku toockï tuc në wuöt ke Pilithiin yiic kedhie, bïk yiëthken, ku kɔcken lɔ lɛ̈k thoŋ piɛth.

¹⁰ Gokï kakɛn ë tɔŋ tääu luaŋ töŋ de yanhdenic, ku nökkï nɔm de Thaulo ë luaŋ de Dagon yanhden kɔ̈u.

¹¹ Na ɣɔn aa lɔ kɔc ke Jabec rɛ̈ɛ̈r ë Giliyad ye piŋ, yen kë cïï kɔc ke Pilithiin luöi Thaulo,

¹² go röör jööt röt kuany, bïk gup ke Thaulo ku wɛ̈ɛ̈tke lɔ bɛ̈ɛ̈i Jabec. Gokï keek lɔ tɔ̈ɔ̈u ëtɛ̈ɛ̈n ë tim de ɣok thar, ku jɔkï thek ë nïn kadhorou.

¹³ Thaulo acï thou në biäk cïï yen piɔ̈u adöt tëde Bɛ̈nydït. Akën lööŋ ke Bɛ̈nydït riëëu, aaye kɔɔr bïï käŋ ŋic në luɔi yen jam ke tït ke yiëth,

¹⁴ ku cïï jam ke Bɛ̈nydït. Go Bɛ̈nydït nɔ̈k ku gëm bääny de ciɛɛŋ Debid wën de Jethe.