1 Kor 9 - JAM DE NHIALIC 2011

Yic ku Luɔi de Tuuc

¹ Cä ye tuc? Cä ye cath ë këde yenhdï? Kɛ̈n Yecu Kërtho Bɛ̈nydïïtda tïŋ? Week, cäkï ë luɔidï ë Bɛ̈nydïtic?

² Acakaa yɛn ë cie tuc tëde kɔc kɔ̈k, ku tëde week yɛn dhil aa tuc: kë ë ŋiëc yen nɔn a yɛn tuc ee täu täu wek ë Bɛ̈nydïtic.

³ Bëër bän e pɔ̈k nɔm kɔc thiëc ɛn, kï an:

⁴ Cuku nïïm de riɛl bï wok cam ku dëk wok?

⁵ Cuku nïïm de riɛl bï wok cath në tik, nyankënëda, acït man ë tuuc kɔ̈k aya, ayï wɛ̈ɛ̈tamäthken ë Bɛ̈nydït, ayï Kepath?

⁶ Ku wo wapäc, wook wokë Baranaba, cuku nïïm de riɛl bï wo luɔi pɔ̈l?

⁷ Alathkërou ee lɔ tɔŋ, ku jɔ aa cam ë wëu ke yenguöp? Eeŋa ee dom com ë tiim, ku cie cam ë ka cï luɔk? Ku eeŋa ye thök tiit ku cie cam ë ciɛk ke thök?

⁸ Luɛɛl kake cït man ë raan tei? Ku cïï löŋ kakë lueel ayadäŋ?

⁹ Acï gɔ̈ɔ̈r ë löŋ de Mothe, an, “Du awalɔ ee tääu ë thɔn thok thɔn ee rap kɔ̈ɔ̈m.” Ee thön kek ee Nhialic diɛɛr?

¹⁰ Ku cie baŋda wook en ë lueel en en? Yeka, ee baŋda wook en aa gɛ̈ɛ̈rë ye: ke raan pur ke bï pur ë ŋäth ŋɛ̈ɛ̈th en käŋ, ayï raan käm, ke ŋäth käŋ, ka bï këdɛn ë ŋɛ̈ɛ̈th yök.

¹¹ Të cï wok ka ke wëi cuöm week, duɛ̈ɛ̈rkï tɔ ye këdït, të tem wok kakuön ë piny nɔm?

¹² Na cath kɔc kɔ̈k në riɛl bï we cieŋ aya, ke wook, cuku ke wär? Ku riɛlë aa cukë ye kɔɔr, wok ee këriëëc guum, ke wo cïï wëlpiɛth ke Kërtho bï aa pɛ̈n cäthden.

¹³ Kuöckï kɔc ë ka ke Luaŋdït looi, nɔn ciëm kek ë ka ke Luaŋdït? Ayï kɔc ë këde yïïŋ ee läm looi, kuöckï nɔn ye kek ka ke yïïŋ de läm rɔm?

¹⁴ Yen acït luɛl cï Bɛ̈nydït e lueel an, bï kɔc ë wëlpiɛth guiir aa pïïr ë wëlpiɛth.

¹⁵ Ku yɛn, yɛn kɛ̈n kakë kɔɔr anandï: ku yɛn kën kakë gɔ̈ɔ̈r ë luɔi bï e luöi yɛn aya: luɔi bän thou en aŋuän në luɔi bï raan lɛc lɛɛc ɛn rɔt tɔ ye ɣɔ̈ric.

¹⁶ Na ya cak wëlpiɛth aa guiir, ke yɛn cïn nɔm ke bän rɔt leec, yɛn cï mac thok, an, bä wëlpiɛth dhil aa guiir, yeka, amawoou në yɛn, të cän wëlpiɛth ee guiir.

¹⁷ Ku të luɔɔi ɛn ee kënë në piɔ̈n mit, ke yɛn cath wo ariöpdï: ku të luɔɔi ɛn en ke ya diu piɔ̈u, ke yɛn cï gäm thön bä döt thön ë wëlpiɛth.

¹⁸ Ariöpdï jɔ aa ŋö? Ariöpdï kï, an, “Tën aa yɛn wëlpiɛth guiir, ke yɛn bï wëlpiɛth ke Kërtho aa guiir youyou tei, ke yɛn cïï bɛ̈ɛ̈nydï bï kuöc muk, bɛ̈ɛ̈ny cï gäm ɛn ë wëlpiɛth yiic.

¹⁹ Acakaa yɛn ë cath ë këde yenhdï ë kɔc yiic kedhie, ke yɛn cï rɔt tɔ ye lïm de kɔc kedhie, luɔi bän kɔc juëc dɔm.

²⁰ Tëde Judai yɛn cï rɔt tɔ ye Judai, luɔi bän Judai dɔm: ku tëde kɔc rɛ̈ɛ̈r ë löŋic, aguɔ rɔt tɔ ye raan rɛ̈ɛ̈r ë löŋic, luɔi bän kɔc rɛ̈ɛ̈r ë löŋic dɔm,

²¹ tëde kɔc cïn löŋ, yɛn cï rɔt tɔ ye raan cït kë cïn löŋ, luɔi bän kɔc cïn löŋ dɔm, ku yɛn cïï tɔ̈u ke ya cïn löŋ tëde Nhialic, yɛn nu ë löŋic tëde Kërtho.

²² Tëde kɔc kɔ̈c, yɛn ë cï ciët raan kɔ̈c, luɔi bän kɔc kɔ̈c dɔm: yɛn cï tɔ ye käŋ kedhie tëde kɔc kedhie, luɔi bän kɔc kɔ̈k kony në këriëëc cä looi.

²³ Ku yɛn ee kënë looi në baŋ de wëlpiɛth, ke yɛn bï dɛ këdï thïn.

²⁴ Ku na kɔc ë wöör, kuöckï keek nɔn wɛ̈ɛ̈r kek kedhie, ku raan tök en aye miɔɔc ë këdäŋ? Yen aa wek wöör wäkya, ke we bï miɔɔc.

²⁵ Ku raan ëbɛ̈n raan ee rɔt tiit ë luɔi bï en kɔc wöör, ee rɔt ŋiëc muk ë këriëëc ëbɛ̈n. Ku keek ayek luui aya ke ke bï göl bï riääk yök, ku wo bï göl cïï bï riääk yök.

²⁶ Yen aya yɛn riŋ aya, ku acïï cït ke cïn naamde, ku yɛn ee biök aya, ku acït nɔn aa yɛn pëëric biɔ̈ɔ̈k tei:

²⁷ ku yɛn ee yaguöp dui, ku ta ye lïmdï, ke ya cïï bï cuat wei, ya ka ye raan ë wël kɔn guiëër kɔc kɔ̈kkë.