1 Kor 7 - JAM DE NHIALIC 2011

Thiëc në biäk de Thiëëk

¹ Ku në këde ka cäk gäär ɛn an: Apiɛth tëde moc të cïï en tik jak.

² Ku në biäk de bal, ë moc ëbɛ̈n ë ye dɛ tiiŋ de yenguöp.

³ Ku moc ë ye tiiŋde luööi apiɛth, ku ye tik monyde luööi apiɛth aya.

⁴ Tik acïn nɔm riɛl ë yenguöp, ee moc en ade nɔm riɛl: ayï moc aya, acïn nɔm riɛl ë yeguöp, ee tik en ade nɔm riɛl.

⁵ Ë ŋɛk cïï rɔt ee pɛ̈n ŋɛk, ë röm bä wek thook röm tei bäk röt pɔ̈l ë aköölkë, ke we bï cök ë läŋ läŋ wek Nhialic, ku jakï röt bɛ mat ëtök, ke we cïï Catan bï them, në kuny kuöc wek röt muk.

⁶ Ku kënë a luɛɛl në päl ë pɛ̈lë yɛn luɛɛl, acïn liem cï yiɛ̈n ɛn. Ë yapiɔ̈u tei adï tɔ̈u kɔc kedhie cït man ë yɛn.

⁷ Ku raan ëbɛ̈n acath ke kë cï Nhialic gäm en, ŋɛk ke këde, ku ŋɛk ke këde.

⁸ Ku yɛn yöök kɔc kën thiëëk, ayï diëër cïn nïïm röör an, Apiɛth tëde keek të rëër kek cït man ë yɛn.

⁹ Ku na dhɛl keek në muŋ bï kek röt muk, ë ke thiëk: thiëëk aŋuän në luɔi bï ŋɔ̈ɔ̈ŋ ke nɔ̈k.

¹⁰ Ku kɔc cï thiëëk kek ayɔ̈ɔ̈k, ku acie yɛn, ee Bɛ̈nydït en a yöök keek, an, ë tik cïï pɔ̈k kekë monyde,

¹¹ (ku të pɔ̈k kek, tɔ rɛ̈ɛ̈r ke cïn nɔm moc, ku na cïn piɔ̈u ee kënë, ke tɔ mät kekë monyde), ku moc, ë cïï tiiŋde ciec.

¹² Ku kɔc kɔ̈k kek a yɔ̈ɔ̈k, acie Bɛ̈nydït, ee yɛn ë yöök keek an: Na de mɛnhkënëda, raan de nɔm tiiŋ kën gam, ku tik agam rëër kekë yen, ke du tɔ cieec.

¹³ Ayï tiiŋ de monydɛn kën gam, ku gɛm rëër kekë yen, ke du tɔ jël ë yelɔ̈ɔ̈m.

¹⁴ Mony kën gam aye tɔ ɣeric në tik, ku tiiŋ kën gam aye tɔ ɣeric në moc: tëë cie yen, ke mïthkun adï kënkï yiic ɣɛɛr, ku acïk yiic ɣɛɛr ënɔɔnë.

¹⁵ Ku raan kën gam, të jël en, ke lɔ: na loi yen aya, ke raan cï gam, nɔn ee yen moc ku nɔn ee yen tik, acïn kë cï e mac, cït man ë lïm: ku Nhialic acï wo cɔɔl në këde mät.

¹⁶ Ku ŋic wudï, yïn tik, nɔn bï yïn monydu kony? Ayï yïn, yïn moc, ŋic wudï nɔn bï yïn tiiŋdu kony?

Rɛ̈ɛ̈rë cït Man cï Nhialic yï Cɔɔl

¹⁷ Ë ŋɛk ë rɛ̈ɛ̈r tei, cït man cï Nhialic käŋ tɛ̈k raan ëbɛ̈n, ku cït cɔ̈t cï Bɛ̈nydït raan cɔɔl ëbɛ̈n. Ku yen a yɔ̈ɔ̈k ɛn kɔc ë ɣööt ke Nhialic yiic ëbɛ̈n.

¹⁸ De raan cï cɔɔl ke ye aŋuɛl? Ë cïï rɔt tɔ ye raan cie aŋuɛl. Ee raan cï cɔɔl ke cie aŋuɛl? Ë cïï rɔt tɔ ye aŋuɛl.

¹⁹ Cuɛ̈l acïn naamde, ku luɔi kënë raan cueel acïn nɔm, ee muŋ ë raan lööŋ ke Nhialic muk, en ade naamde.

²⁰ Ë raan ëbɛ̈n ë tɔ̈u ë täudɛn ë tɔ̈u en të wään cɔɔlë ye.

²¹ Ë yï cɔl, ke yï ë lïm? Du diɛɛr ë yïpiɔ̈u: ku na de tën an, lony yï, ke yï tɔ rɔt lony tei.

²² Ku raan cï cɔɔl ë Bɛ̈nydïtic, ke ye lïm, yen aye raanden ë Bɛ̈nydït raan ee cath ë këde yenhde: ayï raan cï cɔɔl ke ye raan ee cath ë këde yenhde, yen aye lïm de Kërtho.

²³ We cï ɣɔɔc ë ɣööc tuc, duökï röt bï tɔ ye lïïm ke kɔc.

²⁴ Wek mïthëkɔckuɔ, ë ŋɛk ë tɔ̈u kekë Nhialic ë täudɛn ë yen tɔ̈u të wään cɔɔlë ye.

Thiëc në Biäk de Kɔc kën Thiëëk ku Thuööm

²⁵ Ku na këde dhueec, acïn liem cïï Bɛ̈nydït yiɛ̈n ɛn: ku löŋdï yen a luɛɛl tei, ke ya ye raan cï kokëpiɔ̈u yök tëde Bɛ̈nydït, bän aa raan adöt.

²⁶ Aluɛɛl ë yapiɔ̈u, në baŋ de riääk de piny ënɔɔnë an: Apiɛth të de raan të tɔ̈u en aya.

²⁷ Cï yï duööt ë tik kɔ̈u? Du luny ee kɔɔr. Cï yï lony ë tik kɔ̈u? Du tik ee kɔɔr.

²⁸ Ku të thiëëk yïn, acïn kërɛɛc cï wööc, ayï dhuec, të thiɛɛkë ye, acïn kërɛɛc cï wööc. Ku kɔckë abïk kë dhal keek yök ë kegup: ku yɛn de piɔ̈u luɔi päl ɛn week.

²⁹ Ku aluɛɛl alëyɔ̈ɔ̈, wek mïthëkɔckuɔ an, piny athiɔ̈k, ku ë akööl cï döŋ, ke kɔc de diëërken ë ke tɔ̈u cït man ë ka cïn nïïm diäär,

³⁰ ayï kɔc ë dhiau, ë ke tɔ̈u cït man ë ka cïï dhiau, ayï kɔc ë piɔ̈ɔ̈th miɛt, ë ke tɔ̈u cït man ë ka cïï piɔ̈ɔ̈th mit, ayï kɔc ë ɣööc, cït man ë ka cïn nïïm käŋ,

³¹ ayï kɔc ë ka ke pinyë nɔm looi, ë ke ye käŋ looi ku cïkï kepiɔ̈ɔ̈th tum keek: täu de piny nɔm ënɔɔnë akɔɔr luɔi bï en jäl.

³² Ku yɛn de piɔ̈u nɔn bä wek tɔ̈u ke we cie diɛɛr. Raan kën thiëëk ee diɛɛr ë ka ke Bɛ̈nydït, luɔi bï en Bɛ̈nydït tɔ mit piɔ̈u:

³³ ku raan cï thiëëk ee diɛɛr ë ka ke piny nɔm, luɔi bï en tiiŋde tɔ mit piɔ̈u.

³⁴ Ayï tik ku dhuec acïk keyiic tek. Nyan kënë thiaak ee diɛɛr ë ka ke Bɛ̈nydït, luɔi bï en yic ɣɛɛr ayï yepiɔ̈u ayï wëike: ku nyan cï thiaak ee diɛɛr ë ka ke piny nɔm, luɔi bï en monyde tɔ mit piɔ̈u.

³⁵ Ku kënë aluɛɛl në këde piathdun, acie pɛ̈n pɛ̈n ɛn week käŋ, ee këpiɛth en kaar, ke we bï Bɛ̈nydït aa luööi apiɛth, ke cïn kë bï week gɔ̈ɔ̈u.

³⁶ Ku na de raan luel en an: cï nyan bï thiaak wäc këdäŋ, në nyɔk cï en nyɔk, ku na ŋuän thiëëk, ke tɔ loi kë nu ë yepiɔ̈u, acïn kërɛɛc cï wööc, tɔ ke thiak röt.

³⁷ Ku raan ë ye piɔ̈nde kɔ̈ɔ̈c aril, acïn kë dhal en, ku ee raan ë rɔt ŋiëc muk, ku cï löŋ teem ë yepiɔ̈u, an, bï nyan bï thiaak tɔ̈u aya, yen aye këpiɛth looi.

³⁸ Yen aye tëde, raan ë tiiŋde thiaak acï këpiɛth looi, ku raan cïï thiëk, ka cï këpiɛth looi arëët.

³⁹ Tik aye mac ë löŋ anande të pïïrë monyde, ku të thouwë monyde, ka cï lony, aduëërë raan thiaak raan nu ë yepiɔ̈u, të ee yen raan cï Bɛ̈nydït gam tei.

⁴⁰ Ku në löŋdï, të tɔ̈u en aya, yen aduëër en athiɛɛi dït yök: ku aluɛɛl, an, cuk piɔ̈ɔ̈th rɔ̈m wokë Wëi ke Nhialic aya.