1 Kor 6 - JAM DE NHIALIC 2011

Gööny de Kɔc cï Gam

¹ Të de yen raan nu ë weyiic raan de nɔm gööny kekë raan däŋ, duëër dhil tɔ gööny ë kɔc rac nïïm, ku cïï lɔ gööny ë kɔc ɣerpiɔ̈ɔ̈th nïïm?

² Kuöckï kɔc ɣerpiɔ̈ɔ̈th nɔn bï kek löŋ de kɔc ke piny nɔm aa guiir? Duëër röŋ në guiëër bä wek lööŋ thiiakäŋ aa guiir?

³ Kuöckï nɔn bï wo löŋ de tuucnhial aa guiir? Ku na guiëër ë ka ke pinyë nɔm ënɔɔnë, cïï piɔl ee kënë arëët?

⁴ Ku ënɔɔnë, të dɛ wek nïïm gööny në ka ke pinyë ënɔɔnë, jakï kɔc tääu ë gööny nïïm kɔc cïn naamden ë ɣön ë Nhialic yic.

⁵ Ee yäär bä wek yäär, en a luɛɛl ɛn ee kënë. Ye guöp ka, cïn raan töŋ pelnɔm ë weyiic, raan duëër löŋ de raan kekë mɛnhkënë ŋiëc guiir?

⁶ Ku ënɔɔnë, raan ee lɔ gööny ke mɛnhkënë, acakaa ë kɔc reec gäm nïïm.

⁷ Yen aya wek këdäŋ jɔ wööc aläldïïtë, në gööny aa wek röt gaany wapäc. Eeŋö cä wek kërac ee guum tei? Eeŋö cä wek röt ee tɔ cam tei?

⁸ Ku we ye kɔc luöi kërac, ku yak kɔc cam, ayï kɔckun aya.

⁹ Kuöckï kɔc racpiɔ̈ɔ̈th nɔn cïï kek ciɛɛŋ de Nhialic bï lɔ̈ɔ̈k lak? Duökï röt ë tɔ mɛnhë: dhööm, ayï kɔc ee yiëth lam, ayï kɔc ee diëër lei kɔɔr, ayï diëër ee röör kɔɔr, ayï röör ee röt tɔ ye diäär, ayï röör ë niin ë röör,

¹⁰ ayï cuɛ̈ɛ̈r, ayï kɔc ee wëu nhiaar, ayï kɔc ye mɔ̈u wit, ayï kɔc ë kɔc läät, ayï kɔc ë kɔc rum, keek kedhie, acïkï ciɛɛŋ de Nhialic bï lɔ̈ɔ̈k lak.

¹¹ Ku kɔc kɔ̈k ë weyiic aake ye kɔc cït keek: ku ënɔɔnë we cï waak, we cï tɔ ɣerpiɔ̈ɔ̈th, we cï tɔ piɛthpiɔ̈ɔ̈th në rin ke Bɛ̈nydït Yecu Kërtho, ku në Wëidït ke Nhialicda.

Yak Gupkun tɔ ye këde Dhuëëŋ de Nhialic Piɔ̈u

¹² Käŋ kedhie acï ke pɛ̈l ɛn, ku käŋ acïkï ee dɛ piathden kedhie, käŋ kedhie acï ke päl ɛn, ku yɛn cï bï tuɛɛl ë këdäŋ cök bï a cieŋ.

¹³ Këcam ee këde yäc, ku yäc ee këde këcam, ku abï Nhialic keek riɔ̈ɔ̈k kedhie. Ku guöp de raan acie këde dhööm, ee këde Bɛ̈nydït, ku Bɛ̈nydït ee këde raan guöp.

¹⁴ Ku Nhialic ë Bɛ̈nydït jat nhial, ku abï wo jat nhial aya në riɛldïït ë yencin.

¹⁵ Kuöckï wegup, nɔn ee kek ka ke Kërtho? Ku bä ka ke Kërtho nööm, takï keek ee ka ke akɔɔrröör? Ei! Acïï bï aa yen!

¹⁶ Kuöckï ee cöökë an, Raan ë mat kekë akɔɔrröör, ke ye guöp tök kekë yen ëtök? Aa lueel, an, “Keek kaarou abïk aa guöp tök.”

¹⁷ Ku raan cï mat kekë Bɛ̈nydït kek aye wëi tök.

¹⁸ Yak kat në dhööm. Kërɛɛc ee raan looi anu ë raan guöp biic, ku raan dhööm ee guöpde luöi kërac.

¹⁹ Ku kuöckï guöpdun nɔn ee yen luaŋdïït ë Wëidït ɣer nu ë weyiic, Wëi cäk yök tëde Nhialic, ku wek cie cath ë naamdun?

²⁰ We cï ɣɔɔc ë ɣööc tuc: yen aa wek Nhialic tɔ yök dhuëëŋ në guöpdunic ayï wëikun yiic, kek ka ke Nhialic ka.