1 Kor 5 - JAM DE NHIALIC 2011

Dhööm Ɣön ë Nhialic

¹ Aye lueel ë raan ëbɛ̈n an, nu dhööm ë weyiic, ku dhööm yïnya aliu acakaa juöör yiic aliu an, ye raan tiiŋ de wun nööm!

² Ku we ë nïïm dham, ku kɛ̈nkï dhiau, ke raan cï ee kënë looi bï jɔt ë weyiic.

³ Ku yɛn, raan liu guöp ë weyiic, ku nuö në wëikï, yɛn cï löŋ de raan cï ee kënë looi guɔ teem, cït man ë kë ë nu,

⁴ an, në rin ke Bɛ̈nydan Yecu Kërtho, të cä wek guëër ëtök, week në wëikï, ku në riɛldïït ë Bɛ̈nydït Yecu Kërtho,

⁵ ke we bï ee raanë yiɛ̈n Catan le riɔ̈ɔ̈k guöp, ke bï kony wëi ë kööl ë Bɛ̈nydït Yecu.

⁶ Lɛc aa wek röt leec acïï piɛth. Kuöckï luɔu thiinakäŋ nɔn ee yen awany dït tɔ piɔ̈ɔ̈r ëbɛ̈n?

⁷ Yen waak wek luɔu thɛɛr wei, ke we bï aa awany ë piɛc nuaai, cït man wään ciën wek yiic luɔu. Nyɔɔŋdan amääl de Winythok ee guɔ nɔ̈k në baŋda, yen Kërtho.

⁸ Yen ciɛm wok kuïn ë dhuëëŋ, kuïn cïnic luɔu thɛɛr, ku cïnic luɔu de anyääk, ku rɛ̈ɛ̈cdepiɔ̈u, yok cam ë kuïn cïnic luɔu ë piɔ̈n yic a gɔk.

⁹ Acä gäär week wään ë awerekic an: Duökï ee mat në dhööm ëtök,

¹⁰ ku akɛ̈n lueel an, bäk pɔ̈k ëtaiwei wekë dhööm ke piny nɔm, ayï röördït piɔ̈ɔ̈th, ayï cuɛ̈ɛ̈r, ayï kɔc ee yiëth lam, yen aduɛ̈ɛ̈r wek dhil jäl ë piny nɔm.

¹¹ Ku ënɔɔnë, acä gäär week an: Duökï ee mat ëtök në raan cï tɔ ye mɛnhkënëda, të ee yen dhööm, ku nɔn ee yen raan dït piɔ̈u, ku nɔn ee yen raan ë yiëth lam, ayï raan ee kɔc läät, ayï raan ee rɔt tɔ wit ë mɔu, ayï cuɛ̈ɛ̈r, raan cït ee kënë, acakaa këcam, ke we duökï rɔ̈m në yen.

¹² Guiëër ë löŋ ë kɔc tɔ̈u biic eeŋödï thïn? Cie këdun an, bäk löŋ de kɔc nu ɣön ë Nhialic yic guiir?

¹³ Ku kɔc ë tɔ̈u biic löŋden abïï Nhialic guiir. Cït man cï këcïgɔ̈ɔ̈r ye lueel an, “Jakï raan rɛɛcë bɛ̈ɛ̈i bei ë weyiic.”