1 Kor 4 - JAM DE NHIALIC 2011

Tuny de Kërtho

¹ Tɔ lueel raan në këde wook nɔn ye wok kɔc ee ka ke Kërtho looi, kɔc cïï ka ke Nhialic tääu ë kecin, kacïmoony ɣɔn.

² Ku ënɔɔnë, raan cïï käŋ tääu ë yecin, abï dhil aa raan adöt.

³ Ku në yɛn, ee kë cïn naamde nɔn bä wek a thiëëc në ka cä looi, ku nɔn bï kɔc a thiëëc aya: yeka, ayïk ɛn guöp, yɛn cïï rɔt ee thiëëc.

⁴ Acïn kë ŋiëc rɔt, ku acie kënë yen a tɔ yɛn ë raan piɛthpiɔ̈u: Raan ë ya thiëëc, en aye Bɛ̈nydït.

⁵ Yen cïn en kë yak jɔ̈ɔ̈ny të ŋoot akööl dït wei, të ŋootë Bɛ̈nydït ke kën bɛ̈n, raan bï ka cï thiaan tëcol bɛ̈ɛ̈i tëɣer, ku bï lööŋ ee lueel ë kɔc piɔ̈ɔ̈th tɔ tiëc, ee köölë yen abïï raan ëbɛ̈n lɛc yök tëde Nhialic.

⁶ Ku kakë, wek mïthëkɔckuɔ, acä ke lueel në këdï wokë Apolo në baŋdun week, luɔi bän week wɛ̈ɛ̈t an: Duökï kɔc ee riëëu awär këcïgɔ̈ɔ̈r, ku ë cïn raan ë dït ë ŋɛk tɛɛr, an, dïït awär ŋɛk.

⁷ Eeŋa ë yï tɔ tɔ̈u pei? Ku eeŋö cath ke yïn kë kënë gäm yïn? Ku na cï gäm yïn, ka eeŋö ee yïn rɔt leec, acït man ë kë kënë gäm yïn?

⁸ We ë guɔ kuɛth ëtaiwei, wek juëc ë kakun ënɔɔnë, wek ë piny cieŋ cït man ë bäny, ke wok liu thïn: ku adï ya piɔ̈u miɛt, tëë we ceŋ piny ë yic, ke wo duëër piny ceŋ në week ëtök.

⁹ Ku në yapiɔ̈u, wo cïï Nhialic tääu ciëën wok tuuc, cït man ë kɔc cï gäm thuɔɔu: wo cï tɔ ye kë bï aa woi piny nɔm, bï tuucnhial aa woi, ayï kɔc.

¹⁰ Wok ee dhän në baŋ de Kërtho, ku wek ee kɔc pelnïïm ë Kërtho yic! Wok kɔ̈c gup, ku wek ril! Wok cïn naamda, ku wek de nïïm dhuëëŋ!

¹¹ Aɣet cï ënɔɔnë, wok ee cɔk nɔ̈k ayï rou, ku cïnku kɔ̈ɔ̈th lupɔɔ, ku biëkkë wook ë kɔc cïn, wok ee tai, wo cïn nïïm wut,

¹² wok ee cool ë loi luɔi ë wocin: lat wo, ke luelku, an, thieithieei, yɔŋ wo, ke gumku,

¹³ lëkë wo kërac, ke wo läŋ kɔc: wo cï tɔ ye nuöön ë piny nɔm, ku tɔ wook ee ayil ë käŋ kedhie aɣet cï ee köölë.

¹⁴ Yɛn cïï kake gäär luɔi bän we tɔ yäär, ku wek a nen cït man ë mïthkiën nhiaar gup.

¹⁵ Ku na cäk dɛ agum de kɔc kathiëër nu, kɔc ee week wɛ̈ɛ̈t ë ka ke Kërtho, ku acïn wärkun juëc nu: we cä dhiëëth ë Kërtho yic në guiëër ë wëlpiɛth.

¹⁶ Yen a yɔ̈ɔ̈k ɛn week, an: Yak täudï dɔmic.

¹⁷ Yen aa tuöc ɛn Timotheo week, ee wëndiën nhiaar ku ee raan adöt ë ka ke Bɛ̈nydït, en abï week tɔ tak wenïïm në täu aa yen tɔ̈u ë Kërtho yic, acït man wɛ̈ɛ̈t ɛn baai ëbɛ̈n në ɣööt ke Nhialic yiic ëbɛ̈n.

¹⁸ Ku kɔc kɔ̈k ë weyiic acïk nïïm dham, ayek lueel, an, cä bï bɛ̈n tëde week.

¹⁹ Ku yɛn bï dap bɛ̈n tëde week, të nu en ë Bɛ̈nydït piɔ̈u, aguɔ riɛl ë kɔckë ŋic, kɔc wën cï nïïm dham, acie jamden tei.

²⁰ Ciɛɛŋ de Nhialic acie jam tei, ee riɛldït.

²¹ E wepiɔ̈ɔ̈th wäkdï? Bä bɛ̈n tëde week ke ya muk thieny duöi ɛn week, ku bä bɛ̈n wokë nhiëër ku piɔ̈n ril.