1 Kor 2 - JAM DE NHIALIC 2011

Jam në biäk de Kërtho cï Piäät

¹ Ku yɛn, mïthëkɔckuɔ, wään bän tëde week, yɛn aa cïï bɔ̈ wo ŋiëc jam ayï pɛlënɔm, wään guiëër ɛn week jam në këde Nhialic.

² Yɛn cï löŋ teem ë yapiɔ̈u an, acïn kë bä ŋic ë weyiic, ee Yecu Kërtho etök, ku piëët ë piëëtë yen ë tim cï rïïu nɔm kɔ̈u.

³ Ku yɛn aaye rëër ë weyiic ke ya kɔ̈c, ku riääc, ku lɛthë yɛn arëët.

⁴ Ku jamdï ayï guiëër ë ya yɛn guïïr aake cïn yiic wël ee kɔc wëŋ, wël ke pɛlënɔm de raan, aake ye cath në nyuuth ee Wëidït ke nyuɔɔth ayï riɛldɛndït,

⁵ ke gämdun cïï rɔt bï ŋɔ̈ɔ̈th në pɛl ë raan nɔm, abï rɔt ŋɔ̈ɔ̈th në riɛldïït ë Nhialic.

Pɛlënɔm de Nhialic

⁶ Ku wok ee jam de pɛlënɔm lueel wokë kɔc cï ŋuɛ̈ɛ̈n, ku acie pɛlënɔm ee pinyë ënɔɔnë, ku acie pɛlënɔm ë bänydït ke pinyë nɔm, bäny bï ciën naamden rial.

⁷ Wok ee pɛlënɔm de Nhialic lueel, pɛl cï yäl kɔ̈u bei, ee jam cï thiaan, jam cïï Nhialic kɔn lueel ë yepiɔ̈u të ŋootë piny ke liu an, bï aa këde dhuëëŋde.

⁸ Yen aye pɛlënɔm cïn raan töŋ de bäny ke pinyë nɔm ë cï e ŋic, tëë cïk ŋic, adï kënkï Bɛ̈nydïït de dhuëëŋ piäät ë tim cï rïïu nɔm kɔ̈u.

⁹ Ku acït man cï e gɔ̈ɔ̈r an: “Akënë ke tïŋ ë raan nyin, ku akënë ke piŋ ë raan yïc, ku akënkï lɔ ë raan piɔ̈u, Kek ka cïï Nhialic guik në këde kɔc nhiaar en.”

¹⁰ Ku wo cïï Nhialic nyuöth keek në Wëikɛndït: Wëidït ee käŋ kɔɔr yiic kedhie, yeka, ayï kathuth ke Nhialic.

¹¹ Ku ee raanou ŋic ka ke raan, ee piɔ̈n ë raan etök, piɔ̈n cath ke ye? Yen acït en nɔn cïn en raan ŋic ka ke Nhialic aya, ee Wëi ke Nhialic kapäc, kek aŋic keek.

¹² Ku wok aa cïï gɛ̈më wëi ke piny nɔm, ee wëi ë bɔ̈ tëde Nhialic kek aa gɛ̈më wook, luɔi bï wo käŋ ŋic ka cïï Nhialic gäm wook ëdhuëëŋ.

¹³ Kek ayok ke guiir në wël cï Wëidït ɣer wo wɛ̈ɛ̈t, ku cuku keek ee guiir në wël cï wo wɛ̈ɛ̈t ë pɛlënɔm de raan, ka ke Wëi ayok ke guiir në wël ke Wëi.

¹⁴ Ku raan ë yepiɔ̈u tuöm ka ke piny acïï ka ke Wëi ke Nhialic ee dɔm, aye keek tɔ ye kaɣäär yiic, ku acïï keek duëër ŋic, luɔi ye ke yök yiic në Wëi.

¹⁵ Ku raan ë yepiɔ̈u tuöm ka ke Wëi, yen aye käŋ yök yiic kedhie, ku yenguöp acïn raan bï ye yökic.

¹⁶ Cït man cï këcïgɔ̈ɔ̈r ye lueel an, “Ku eeŋa ë ŋic piɔ̈n ë Bɛ̈nydït? Eeŋa bï en Wɛ̈ɛ̈t?” Ku wok ee cath në piɔ̈n de Kërtho.