1 Kor 16 - JAM DE NHIALIC 2011

Juɛ̈ɛ̈r bïï Gäm Kɔc Ɣerpiɔ̈ɔ̈th

¹ Ku në këde juɛ̈ɛ̈r aa wek kɔc ɣerpiɔ̈ɔ̈th juɛ̈ɛ̈r käŋ, yak looi cït man cän e lɛ̈k ɣööt ke Nhialic ke Galatia.

² Ëkööl tueŋ ee kek dhorou ëbɛ̈n, week wedhie, ë ŋɛk ë ye käŋ tɔ̈ɔ̈u abï ke kueet, acït man cï Nhialic e tɔ yök käŋ, ku miäk të cän bɛ̈n, ka cïn juɛ̈ɛ̈rëkäŋ bï nu.

³ Ku miäk, të cän bɛ̈n, ke yɛn bï kɔc tooc, kɔc cäk tɔ ye kɔc piɛth në awereekkun yiic, bïk ka cäk gam ë dhuëëŋdun lɛɛr Jeruthalem.

⁴ Ku të cï jam röŋ, ke yɛn bï lɔ aya, aguɔ cath wo keek ëtök.

Kïït de Paulo

⁵ Ku yɛn bï lɔ tëde week, të cän Makedonia kɔn caathic, ku yɛn bï Makedonia dhil caathic.

⁶ Ku abï dɛ të bän rëër wo week, nɔn de yen të bän rut thöl wo week, aguɔkï ya ruac kueer, të de en të la yɛn thïn.

⁷ Yɛn cïn piɔ̈u luɔi bän week tïŋ ku baaric, ee luɔi bän yök ke ya rɛ̈ɛ̈r wo week yen akaar, të cï Bɛ̈nydït a pɔ̈l.

⁸ Ku yɛn bï rëër Epetho aɣet kööl ë Thiërdiäk.

⁹ Gökdïït ë kueer acï liëp ɛn, kueer duɛ̈ɛ̈r ɛn käŋ lëu ë ye, ku kɔc de ater ajuëckï.

¹⁰ Të cï Timotheo bɛ̈n, ke takï rɛ̈ɛ̈r kekë week ke cïn riɔ̈ɔ̈c, ee luɔi de Bɛ̈nydït looi acït man ë yɛn aya.

¹¹ Ë cïn raan biɔn en. Ku abäk ruac kueer apiɛth ke cïn kërac, ke bï bɛ̈n tëde yɛn: en a tiɛɛt kekë mïthëkɔckuɔ ëtök.

¹² Ku në këde Apolo mɛnhkënëda, acä yɔ̈ɔ̈k aläl nɔn bï en lɔ tëde week kekë mïthëkɔckuɔ ëtök: ku luɔi bï en lɔ ënɔɔnë a liu ë yepiɔ̈u, ku abï lɔ ëkööl cï rɔt yök.

Wël Ciëën

¹³ Yak röt tiit, kääckï apiɛth ë gämic, yak luui ë luɔi ë röör, yak riɛl.

¹⁴ Yak kakun tɔ loi kedhie ë nhiëër nhiaar wek röt.

¹⁵ Wek läŋ, wek mïthëkɔckuɔ (wek ŋic dhiën ë Thepana, nɔn ee kek kɔc cï kɔn gam ë Akaya, ku acïk röt gäm luɔi de kuny de kɔc ɣerpiɔ̈ɔ̈th),

¹⁶ wek läŋ, yak röt tääu ë kɔc cök kɔc cït keek, ayï kɔc lui ë luɔi ril në wook ëtök kedhie.

¹⁷ Ku yɛn mit piɔ̈u në bɛ̈n de Thepana ku Porunato ku Akayiko: ayek këduön cï dak thiɔ̈ɔ̈ŋ thok.

¹⁸ Acïk piɔ̈ndï tɔ yop ayï piɔ̈ɔ̈thkun: yen ŋiɛc wek kɔc cït keek abäk ke riëëu.

¹⁹ Wek thiëëc ɣööt ke Nhialic ke Athia. Wek thiëëc aläl ë Bɛ̈nydïtic Akula kekë Pirithila, ku ɣön ë Nhialic ee lɔ̈ŋ ɣönden.

²⁰ Wek thiëëc mïthëkɔckuɔ kedhie. Thiëckï röt wapäc në ciëm ɣeric.

²¹ Thiëcdï kï, ka cä gɔ̈ɔ̈r ë yacin yɛn Paulo.

²² Na de raan cïï Bɛ̈nydït Yecu Kërtho nhiaar, ka bï guöp dɛ aciɛɛn! Bɛ̈nydïïtda ka bɔ̈yë!

²³ Ë dhuëëŋ de Bɛ̈nydan Yecu Kërtho piɔ̈u ë tɔ̈u ke week.

²⁴ Ë nhiëërdï ë tɔ̈u ke week wedhie, nhiëër nu ë Kërtho Yecu yic. Amiin.