1 Kor 12 - JAM DE NHIALIC 2011

Miɔ̈c de Wëidït

¹ Jam de ka ke Wëi, wek Mïthëkɔckuɔ, yɛn cïn piɔ̈u luɔi bä wek e kuc.

² Aŋiɛckï nɔn ee ya wek Juöör ɣɔn, kɔc ë cï thɛl roor ë yiëth cök, yiëth cïn kethook të ye jam, acït man ee we cool ë thelë we.

³ En ata yɛn we ŋic cöökë, yen acïn raan jam ke cath ke Wëndït ɣer ke Nhialic raan bï e lueel an, “Yecu ade guöp aciɛɛn!” Ku acïn raan duëër e lueel an, “Yecu ee Bɛ̈nydït,” të cïï en cath ke Wëidït.

⁴ Ku miɔ̈c akithic, ku Wëidït ee tök.

⁵ Ku luɔi ee kɔc kony akithic, ku Bɛ̈nydït ee tök.

⁶ Ku luɔi ee kɔc looi akithic, ku yen Nhialic töŋ manë yen ee këriëëc looi ëbɛ̈n ë kɔc yiic kedhie.

⁷ Ku tïc ee Wëidït tïc aye gäm raan ëbɛ̈n, luɔi bï kɔc këpiɛth aa yök thïn kedhie.

⁸ Ŋɛk aye Wëidït miɔɔc në jam ë pɛlënɔm, ku miɔɔc ŋɛk në jam de ŋïnydekäŋ, në Wëi manë gup.

⁹ Ku miɔɔc ŋɛk në gäm, në Wëi manë gup, ŋɛk aye miɔɔc ë riɛl bï en kɔc tök tɔ dem, në Wëi manë gup,

¹⁰ ŋɛk aye miɔɔc ë kë bï en luɔi ril aa looi, ku miɔɔc ŋɛk ë guiëër bï en wël ŋiëc aa guiir, ku ŋɛk në pɛ̈ɛ̈k duëër en wëi pääk, ku ŋɛk në jam ë thoŋ kithic, ku ŋɛk në ŋïny bï en thok aa puk yiic.

¹¹ Ku kake kedhie aye Wëidït töŋ manë ke looi, ago raan ëbɛ̈n tɛ̈k käŋ, ŋɛk ke këde pei, ku ŋɛk ke këde pei, acït man nu en ë yepiɔ̈u.

Guöp Tök ku Ade Yic Kajuëc

¹² Acït man ee guöp de raan tök, ku ka nu thïn ajuëckï, ku ka nu ë guöp töŋë yic, na cakaa kek ë juëc, keek ayek guöp tök tei, yen acït Kërtho aya.

¹³ Wook wodhie, wo cï baptith ë guöp tökic në Wëidït töŋë, nɔn ee wok Judai, ku nɔn ee wok Girikii, nɔn ee wok lïïm, ku nɔn ee wok kɔc ee cath ë këde yenhden, ku wo cï tɔ dëk në Wëidït töŋë wodhie.

¹⁴ Ku raan guöp acïï yic ee tök, ade yic ka juëc.

¹⁵ Të lueelë cöök de raan en an, “Luɔi cän ee ciin, ke yɛn cie kë de guöp,” yen cie kë de guöp?

¹⁶ Ku yïc, të lueel en en an, “Luɔi cän ee nyin, ke yɛn cie kë de guöp,” yen cïï en ee kë de guöp?

¹⁷ Raan guöp ëbɛ̈n, të ee yen nyin etök, ke pïŋ bï raan käŋ aa piŋ nu nou? Ku raan guöp ëbɛ̈n, të ee yen piŋ tei, ke kë bï raan aa ŋör adï nu nou?

¹⁸ Ku ënɔɔnë, Nhialic acï käŋ tääu ë raan guöp kedhie, acït nɔn nu yen ë yepiɔ̈u.

¹⁹ Ku të ee yen kë töŋë tei, ke raan guöp adï nu nou?

²⁰ Ku ënɔɔnë, ka nu ë guöpic acïk juëc, ku guöp ee tök tei.

²¹ Ku nyin acïï ciin duëër yɔ̈ɔ̈k an, “Yïn cä kɔɔr!” Ayï nɔm, acïï cök duëër yɔ̈ɔ̈k an, “We cä ke kɔɔr!”

²² Acie yen, ku ka nu ë raan guöp ka yok tɔ ye ka kɔ̈c, keek adhilkï nu aläldït:

²³ ku ka yok tɔ ye ka cïn dhuëëŋ, kek ka nu ë wogup, kake ayok ke gäm dhuëëŋ awärkï kɔ̈k, ago ka nu ë wogup, ka cïn läkden, agokï dɛ piathden abïk kɔ̈k wöör.

²⁴ Ku ka ke wogup ka cï läkëläk acïn të dak ë ke: ku Nhialic acï guöp matic ëbɛ̈n, ago baŋ dɛk ë käŋ go jɔ ŋuak ë dhuëëŋ.

²⁵ Ke ater cïï bï nu ë guöpic, ku bï ka nu ë guöpic röt tak akït kapäc.

²⁶ Ku të töök ë kë töŋ ë raan guöp, ke ka ke guöp kedhie ke ke jɔ töök në yen ëtök, ku të bï kë tök ë raan guöp gäm dhuëëŋ, ke ka ke guöp kedhie ke ke jɔ piɔ̈ɔ̈th miɛt në yen ëtök.

²⁷ Ku wek ee guöp de Kërtho, ku yak ka nu ë guöpde yic, ŋɛk ee kë töŋë ku ŋɛk ee kë töŋë.

²⁸ Ku Nhialic aye kɔc kɔ̈k tääu ë ɣön ë Nhialic yic, kɔc tueŋ kek aye tuuc, kɔc lɔ ë kecök, kek aye kɔc ee wël guiir, ku lɔ kɔc ee wëët, ku lɔ luɔi ril, ku riɛl bï kɔc aa tɔ dem, ku kuny konyë kɔc röt, ku ciɛɛŋ, ku thook mɛɛn pei.

²⁹ Yek tuuc kedhie? Yek kɔc ee wël guiir kedhie? Yek kɔc ë wëët kedhie? Cath kɔc në luɔi ril kedhie?

³⁰ Ŋickï kɔc tök tɔ waar kedhie? Yek jam ë thook mɛɛn kedhie? Ŋickï thok puk kedhie?

³¹ Jakï ka dït ë piathden aa kɔɔr, ka bï gäm week. Ku wek aa nyuöth kueer ënɔɔnë kueer piɛth aläl awär këriëëc.