1 Kor 11 - JAM DE NHIALIC 2011

¹ Yak täudï dɔmic, cït man aa yɛn täu de Kërtho dɔmic.

Kum de Nɔm ë Lämic

² Ënɔɔnë, wek mïthëkɔckuɔ, wek lɛɛc nɔn aa wek a tak ë këriëëc ëbɛ̈n, ku nɔn aa wek jam cï yiɛ̈n week döt, acït man cän e gäm week.

³ Ku yɛn de piɔ̈u luɔi bä wek e ŋic, nɔn ee yen Kërtho yen ee nɔm de moc ëbɛ̈n, ku nɔm de tik yen aye moc, ku nɔm de Kërtho yen aye Nhialic.

⁴ Moc ëbɛ̈n, të lɛ̈ŋ en ayï të guiir en wël, ke kuöm nɔm, ka ye yenɔm tɔ yäär.

⁵ Ku tik ëbɛ̈n, të lɛ̈ŋ en ayï të guiir en wël, ke cïï nɔm kuöm, ka ye yenɔm ta yäär: yen akït kekë kë cï muut nɔm.

⁶ Ku tik, të cïï en nɔm kuöm, tɔ tem nɔm aya: ku të ee yen ayäär tëde tik të temë yenɔm ayï të muutë yenɔm, ke tɔ kuöm nɔm.

⁷ Acïï piɛth ëyic tëde moc të kum en enɔm, luɔi cït en Nhialic në täude ku ye dhuëëŋde: ku tik yen aye dhuëëŋ de moc.

⁸ Moc aa cïï bɔ̈ në tik: tik en aa bɔ̈ në moc.

⁹ Ku moc ayadäŋ aa cïï cak në biäk de tik, tik en aa cak në biäk de moc.

¹⁰ Yen a duëërë tik dhil dɛ këdäŋ ë yenɔm, ke bï riɛl cath ke monyde nyuɔɔth, në biäk de tuucnhial.

¹¹ Ku moc acie rëër të cïn tik, ayï tik acie rëër të cïn moc ë Bɛ̈nydïtic.

¹² Ku acït man ë bï tik në moc, ayï moc aya abɔ̈ në tik, ku bɔ̈ käŋ kedhie tëde Nhialic.

¹³ Thɔ̈ɔ̈ŋkï wapäc: piɛth tëde tik të lɛ̈ŋ en Nhialic ke cïï nɔm kuöm?

¹⁴ Acakaa piny guöp kën week wɛ̈ɛ̈t, nɔn ee yen ayäär tëde moc, të ciɛth en ke nhïm bär?

¹⁵ Ku tik të ciɛth en ke nhïm bär, ka ye dhuëëŋ tëde yen: nhïm bär acï ke gäm en në kum bï en rɔt kum.

¹⁶ Ku na de raan kɔɔr teer, ke wo cïn ciɛɛŋ cït ee kënë, acakaa ɣööt ke Nhialic yiic ayadäŋ, aliu tëde keek.

Këcam Thëën de Bɛ̈nydït

¹⁷ Ku në cöökë cöök bä lɛ̈k week ënɔɔnë, we cä lec, ënɔn ë ya wek guëër, acie piathdun, ee rac en aya wek guëër.

¹⁸ Cöök tueŋ, ënɔn ë ya wek guëër ë ɣön ë Nhialic yic, acä piŋ nɔn aa wek weyiic tek, ku acä gam ë biäk tök.

¹⁹ Tëŋ ee kɔc ke yiic tek abï dhil nu ë weyiic, ke kɔc cï tɔ ye kɔc piɛth ke ke bï tïc ëgɔk ë we yiic.

²⁰ Ënɔn ë ya wek guëër tëtöŋë, acie cäm bä wek këcam thëën ë Bɛ̈nydït aa cam en aya wek guëër.

²¹ Raan ëbɛ̈n ee këcam de yenguöp nööm ku ciɛm, ku ŋɛk acï cɔk nɔ̈k, ku wit ŋɛk ë mɔ̈u.

²² Ee käŋö? Cïn ɣöötkuön nu, ɣööt bä wek aa cam thïn, ku dɛ̈kkï? Ku yak ɣön ë Nhialic biɔɔn, ku yak kɔc cïn kaken yɔ̈ɔ̈r? Bä week lɛ̈k ŋö? Bä week lɛc nïïm në baŋ de kënë? We cä lec nïïm.

²³ Ku yɛn ë löŋ yök tëde Bɛ̈nydït, löŋ cä gäm week aya an: Bɛ̈nydït Yecu, wɛ̈ɛ̈rwakɔ̈u bï e nyiɛɛn thïnë, ke nöm kuïn cï pam,

²⁴ ku të cï en thieithieei lueel, ke wɛ̈kic, lueel an, “Ŋäkï, camkï, kënë ee guöpdiën cï dhuööŋ në baŋdun: yak kënë looi në täŋ bä wek ɛn aa tak.”

²⁵ Ku yen ee nɔ̈m nööm en bïny aya, të cï kɔc thök ë cäm, ku lueel an, “Bïnyë ee löŋ cï piac mac ë riɛmdï yic: yak kënë looi, të de yen të dɛ̈k wek ë ye, në täŋ bä wek ɛn aa tak.”

²⁶ Ku të de yen të cäm wek ee kuïnë ku dɛ̈kkï ee bïnyë, ke thon ë Bɛ̈nydït en nyuɔɔthkï aɣet të bï en bɛ̈n.

²⁷ Yen raan ëbɛ̈n raan ee kuïnë kuöc cam, ku kuc dëk ee bïny ë Bɛ̈nydïïtë, ka ye yeyeth dɛ̈ɛ̈r guöp de Bɛ̈nydït ayï riɛmde.

²⁸ Ë raan kɔn rɔt thiëëc, ku bï jɔ cam ee kuïnë, ku dëk ee bïnyë.

²⁹ Ku raan ee kuöc cam ku kuc dek, ka ye rɔt cäm jäny bï e jɔ̈ɔ̈ny ku dëk rɔt jäny, në kuny kuc en guöp de Bɛ̈nydït nɔn nu yen thïn.

³⁰ Yen aye kɔc juëc ë weyiic gup kɔ̈c, ku cïn kë riɛl, ku cï kɔc juëc thou.

³¹ Ku tëë wo ye röt ŋiëc jɔ̈ɔ̈ny, adï cïï wo ye jɔ̈ɔ̈ny.

³² Ku të jiëënyë wo, ke wok ee Nhialic wɛ̈ɛ̈t cït man ë mïthke, ke wo cïï bï yiëk yiëth gääk në kɔc ke piny nɔm ëtök.

³³ Yen aye tëde, wek mïthëkɔckuɔ, të ya wek guëër bäk bɛ̈n cam, ke we ye röt tiit.

³⁴ Ku na de raan cï cɔk nɔ̈k, ke cäm paanden, ke we cïï bï jɔ̈ɔ̈ny ë guëërduön ë ya wek guëër. Ku cök kɔ̈k abä ke bɛ̈n guiir apiɛth miäk cän bɛ̈n.