1 Kor 10 - JAM DE NHIALIC 2011

Yöök në Biäk de Yiëth

¹ Ku ënɔɔnë, mïthëkɔckuɔ, yɛn kɔɔr luɔi bä wek cöökë ŋic an, Kuarkuɔ aake nu ë luät thar kedhie, ku acïk abäpdit teem kedhie.

² Ku acï ke baptith kedhie në këde Mothe ë luätic ku wɛ̈ɛ̈ric,

³ ku aake ye cam ë këcam töŋë këcam de wëi,

⁴ ku aake ye dek ë pïïu töŋë pïïu ke wëi: kuur ë wëiyë kuur ë ke kuany cök yen aaye kek dek ë ye: ku kuurë yen aye Kërtho.

⁵ Ku tëdït ë keek Nhialic aa cïï piɔ̈u mit ke keek: ku acïk bɛ̈n riäär ë jɔ̈ɔ̈ric.

⁶ Ku kake acï ke tɔ ye ka bï wo wɛ̈ɛ̈t, ke wo cïï bï aa kɔc cï ŋɔ̈ɔ̈ŋ de karɛc dɔm, cït man ɣɔn dɔmë ŋɔ̈ɔ̈ŋ keek.

⁷ Ku duökï röt tɔ ye kɔc ee yiëth lam aya, cït man ë kɔc kɔ̈k ë keek, acït man cï e gɔ̈ɔ̈r an, “Kɔc ayek nyuc ciëmkï ku dëkkï, na ëlë, ke ke jɔt röt lek thuëëc.”

⁸ Ku duku diäär ee kɔɔr, cït man ee kɔc kɔ̈k ë keyiic diäär kɔɔr, ago agum de kɔc kathiërrou ku diäk wïïk ëkööl tök.

⁹ Ku duku Kërtho them aya, cït man cï kɔc kɔ̈k ë keyiic e them, ago karɛc ke nɔ̈k.

¹⁰ Ku duökï ee dok ë weyäc aya, acït man cï kɔc kɔ̈k ë keyiic dok, ago ke nɔ̈k ë kë ye kɔc nɔ̈k.

¹¹ Ku ënɔɔnë, kakë kedhie aake yök keek, ke ke bï aa ka bï wo wɛ̈ɛ̈t, ku acï ke gɔ̈ɔ̈r në nën bï wo nen, wok kɔc cï thök de piny guɔ ɣëët tëde wook.

¹² Yen na de raan ŋic rɔt nɔn kɛ̈ɛ̈c en apiɛth, ke ye rɔt tiit ke cïï bï wïïk.

¹³ Acïn thëm cï we them pei, ee yen ë thëm töŋë jäŋ ëbɛ̈n. Ku Nhialic ee piɔ̈u adöt, acïï we bï pɔ̈l a them ë thëm cäkï duëër lëu ë guöm, ku abï kueer looi kekë thëm ëtök, kueer duɛ̈ɛ̈r wek ban thïn, luɔi bä wek e lëu në guöm.

¹⁴ Yen aa wek kat ë läm de yiëth, wek kɔckiën nhiaar.

¹⁵ Yɛn jam cït man ë ke jam wokë kɔc pelnïïm, yak thɔ̈ɔ̈ŋ ë wepiɔ̈ɔ̈th en kë luɛɛl.

¹⁶ Bïny de athiɛɛi, bïny yok thieei, cie män mɛt wok në riɛm de Kërtho? Kuïn cï pam kuïn yok wääkic, cï en ee män mɛt wok në guöp de Kërtho?

¹⁷ Ku wook, acakaa wok ë juëc, wok ee kuïn tök, ku yok guöp tök: në röm ee wok kuïn töŋë rɔm wodhie.

¹⁸ Wɔikï ciɛɛŋ de Yithriɛl, ciɛɛŋdɛn ë läm: kɔc ee cam në ka cï läm Nhialic cïkï ee kɔc rɔm yïïŋ de läm ëtök?

¹⁹ Eeŋö däŋ bä lueel? Yath de naamde? Ayï kë cï gäm yath lam, de naamde ayadäŋ?

²⁰ Ku aya lueel an, “Ka ye juöör thät, ee jɔɔk rac kek yek thät, ku acie Nhialic yen yek thät: ku yɛn cïn piɔ̈u luɔi bä wek aa kɔc mät në jɔɔk rac ëtök.

²¹ We cïï dëk bï lëu në bïny de Bɛ̈nydït kekë bïny de jɔɔk rac ëtök: we cïï duëër rɔm ëtök ë pam ee kɔc cam, pam ë Nhialic kekë pam ë jɔɔk rac.

²² Yok Bɛ̈nydït tɔ dɔm tiɛɛl ënɔɔnë? Rilku awärku yen?

²³ Käŋ kedhie acï ke päl ɛn, ku käŋ acïkï de piathden kedhie, käŋ acï ke päl ɛn kedhie, ku käŋ acïkï kɔc ee kueet kedhie.

²⁴ Ë cïn raan ë piathde kɔɔr etök, ë ŋɛk ë ye piath de ŋɛk kɔɔr.

²⁵ Ka cï ɣaac ë thuukic kedhie abäk ke cam, acïn kë bäk luɔp në biäk de kë cï raan yök ë yepiɔ̈u,

²⁶ në kë ye piny këde Bɛ̈nydït, ayï ka ye piny thiɔ̈ɔ̈ŋ, ee kake ayadäŋ.

²⁷ Ku na de raan cɔl week ë këde cäm, ku ye raan töŋ de kɔc kën gam, ku dɛkï piɔ̈ɔ̈th lɔ, ka cï tääu ë wenïïm jakï ke cam kedhie, ku duökï käŋ ee luɔp në biäk de jam bï raan yök ë yepiɔ̈u.

²⁸ Ku na de raan lëkë week an, “Kënë aa nɛ̈kë yath,” ke we duökï cäm ë ye, në biäk de raan ë nyuth e week, ku në biäk de jam bïï raan yök ë yepiɔ̈u: në kë ye piny këde Bɛ̈nydït, ayï ka ye piny thiɔ̈ɔ̈ŋ, ee kake ayadäŋ:

²⁹ ku acï në biäk de jam bä yök ë yïpiɔ̈u. “Ku eeŋö duëërë ya thiëëc në kë luɔɔi në yenhdï në jam cï raan däŋ yök ë yepiɔ̈u?

³⁰ Të cän thieithieei lueel të cäm ɛn, eeŋö lëkë kërac, në kë cän thieithieei lueel në ye?”

³¹ Yen na yak cam, ku yak dek, ayï të de yen kë bäk aa looi, yak käŋ looi kedhie ke Nhialic bï dhuëëŋ yök.

³² Yak tɔ̈u ke we cïï kɔc ee tɔ wäc käŋ, ayï Judai, ayï Girikii, ayï ɣööt ke Nhialic:

³³ acït man ë yɛn, yɛn ee kɔc tɔ mit piɔ̈ɔ̈th në këriëëcic ëbɛ̈n, yɛn cïï piathdï ee kɔɔr, ee piath de kɔc juëc en aa ya kɔɔr, luɔi bï ke kony wëi.