1 Jɔn 5 - JAM DE NHIALIC 2011

Tiëmda ë Pinynɔm

¹ Raan ëbɛ̈n raan ë Yecu gam, an, ee Kërtho, ka ye dhiëëth Nhialic, ku raan ëbɛ̈n raan nhiaar raan ë dhiëth meth ke nhiaar mɛnh ë dhiëëth aya.

² Të nhiɛɛr wok Nhialic, ku dötku lööŋke, yen aŋicku yen nɔn nhiɛɛr wok mïth ke Nhialic.

³ Nhiëër ë Nhialic kï, dön ee wok lööŋke döt: ku lööŋke acïkï ril.

⁴ Ku kë cï dhiëëth ë Nhialic ëbɛ̈n ee ka ke piny nɔm tiaam: ku gämda yen ee tiëm ee ka ke piny nɔm tiaam.

⁵ Ku eeŋa raan ë piny tiaam? Cie yen raan cï Yecu gam, an, ee Wën ë Nhialic?

Cäätɔ ë biäk de Yecu Kërtho

⁶ Kënë ee raan ë bɔ̈ në pïïu kekë riɛm, yen aye Yecu Kërtho, aa cïï bɔ̈ në pïïu kapäc, ee pïïu ku riɛm.

⁷ Ku Wëidït kek aye cäätɔ, luɔi ee kek yith kek Wëi. Ku cäätɔɔ nu paannhial ayek diäk, Wääda, ku Jam, ku Wëidït: ku diëŋkë ayek tök.

⁸ Ku cäätɔɔ anukï kadiäk ë piny nɔm, Wëidït, ku pïïu, ku riɛm: ku diëŋkë amɛ̈tkï ëtök.

⁹ Të ye wok kë lueel kɔc gam kɔc cï aa cäätɔɔ, ke kë lueel Nhialic yen adït ë kë lueel kɔc: ku kënë ee kë lueel Nhialic, ɣɔn cï en aa cäätɔ në këde Wënde.

¹⁰ Raan gam Wën ë Nhialic ke jam lueel cäätɔɔ acath kekë yen: raan reec Nhialic gam ka ye Nhialic tɔ ye alueeth, luɔi ë reec en jam lueel Nhialic në këde Wënde.

¹¹ Jam lueel cäätɔ kï: an, Nhialic acï wo gäm pïïr athɛɛr, ku pïïrë anu ë Wëndeyic.

¹² Raan cath ke Wënde ka cath ke pïïr, ku raan cïï cath ke Wën ë Nhialic ka cïï cath ke pïïr.

Pïïr Athɛɛr

¹³ Kakë acä ke gäär week, ke bäk ŋic nɔn cath wek në pïïr athɛɛr, wek kɔc cï rin ke Wën ë Nhialic gam.

¹⁴ Riɛl ee wo nyïïn riɛl ë yenɔm kï, an, Tëde en kë yok lip, kë rɔ̈ŋ ke këde yenpiɔ̈u, ka ye këda piŋ.

¹⁵ Ku të ŋic wok en nɔn ee yen këda piŋ, të de en kë yok lip, ka ŋicku nɔn ee wo käŋ yök ka yok lip tëde yen.

¹⁶ Na de raan tïŋ mɛnhkënë ke loi kërac, ku cie kërɛɛc ee thuɔɔu bɛ̈ɛ̈i, ke lip, ka bï gäm pïïr në këde kɔc loi kërɛɛc cïï thuɔɔu ee bɛ̈ɛ̈i. Kërɛɛc ee thuɔɔu bɛ̈ɛ̈i anu: acä luel nɔn bï en lɔ̈ŋ në këde.

¹⁷ Luɔi de kërac ëbɛ̈n ee kërac: ku kërɛɛc cïï thuɔɔu ee bɛ̈ɛ̈i anu.

¹⁸ Cöökë aŋicku, an, Raan ëbɛ̈n raan ë dhiëëth Nhialic acïï kërac ee looi, raan ë dhiëëth Nhialic ee rɔt döt, ke cïï jɔŋ rɛɛcë bï jak.

¹⁹ Aŋicku nɔn ee wok kɔc ke Nhialic, ku nɔn tɔ̈uwë piny nɔm ëbɛ̈n ë këracic.

²⁰ Ku aŋicku nɔn cï wën ë Nhialic bɛ̈n, bï ku gɛ̈m wook ŋïnydekäŋ, buk raan yic ŋic, ku wok tɔ̈u ë raan yicic, yen aye Wëndɛn Yecu Kërtho. Nhialic yic kï, ku pïïr athɛɛr ka.

²¹ Wek mïththiaakäŋ, yak röt tiit në yiëth, (ka ye lam ku cïkï ë Nhialic). Amiin.