1 Jɔn 4 - JAM DE NHIALIC 2011

Wëi Yic ku Wëi Lueth

¹ Wek kɔc nhiaar, duökï wëi gam kedhie, ku yak wëi them, nɔn ë bï kek tëde Nhialic: ade tït aluɛth juëc cï lɔ ë piny nɔm.

² Ŋïny ŋiɛc wek Wëidït ke Nhialic kï: an, wëi ëbɛ̈n wëi ee gam nɔn cï Yecu Kërtho bɛ̈n ke ye raan guöp, ka ye kë bɔ̈ tëde Nhialic.

³ Ku wëi ëbɛ̈n wëi cïï Yecu Kërtho gam, ka ye kë cïï bɔ̈ tëde Nhialic: wëi ke raan man Kërtho ka, raan cä we këde piŋ nɔn bï en bɛ̈n, ku ye kï ë guɔ nu ë piny nɔm.

⁴ Wek ee kɔc ke Nhialic, wek mïththiaakäŋ, ku acäk ke tiaam: luɔi dïïtë Raan nu ë weyiic awär raan nu ë piny nɔm.

⁵ Kɔckë ayek kɔc ke piny nɔm, yen a jiɛɛm kek në këde piny nɔm, ago kɔc ke piny nɔm këden piŋ.

⁶ Wok ee kɔc ke Nhialic: raan ŋic Nhialic ka ye këda piŋ, ku raan cie këde Nhialic ka cïï këda ee piŋ. Ŋïny ŋic wok wëi ke yic, ku wëi ke lueth kï.

Nhialic ee Nhiëër

⁷ Wek kɔc nhiaar, yok röt nhiaar: nhiëër yen aye këde Nhialic, ku raan ëbɛ̈n raan cath ke nhiëër ë Nhialic en ë dhiëth en, ku ŋic Nhialic.

⁸ Raan cïï cath ke nhiëër ka kuc Nhialic, Nhialic yen aye nhiëër.

⁹ Ëcöökë yen aa le nhiëër ë Nhialic dhek tëde wook, tuöc cï Nhialic Wëndɛn töŋ cï dhiëëth tuööc ë piny nɔm, luɔi bï wo pïïr në yen.

¹⁰ Nhiëër kï ee kënë, acie luɔi ë nhiɛɛr wo Nhialic, ee luɔi nhiɛɛr en wook, ago Wënde tuööc abï aa kë bï Nhialic luk në karɛc cuk looi.

¹¹ Wek kɔc nhiaar, të cï Nhialic wo nhiaar ë nhiëër cït ee kënë, ke wo duëër röt dhil nhiaar aya.

¹² Acïn raan cï Nhialic kɔn tïŋ anande: të nhiɛɛr wok röt, ke Nhialic arɛ̈ɛ̈r ë woyiic, go nhiëërde tɔ ye dikëdik ë woyiic:

¹³ Ŋïny ŋic wok en nɔn rëër wok ë yeyic, ku nɔn rëër en ë woyiic, kï, miɔ̈c cï en wo miɔɔc në Wëike.

¹⁴ Ku acuk tïŋ ku yok cäätɔɔ në tuöc cï Wääda Wënde tuööc bï aa Kony bï kɔc ke piny nɔm kony wëi.

¹⁵ Të de en raan luel gämde, an, Yecu yen aye Wën ë Nhialic, ke Nhialic arɛ̈ɛ̈r ë yeyic, ku rëër ë Nhialicic.

¹⁶ Ku nhiëër nhiɛɛrë Nhialic wook acuk ŋic ku acuk gam. Nhialic ee nhiëër, ku raan ee rëër ë nhiëëric ka ye rëër ë Nhialicic, ku rɛ̈ɛ̈r Nhialic ë yeyic.

¹⁷ Yen aye nhiëërda tɔ ye dikëdik, luɔi bï wo nyïïn riɛl ëkööl ë guiëërëlöŋ: luɔi tɔ̈u wok ë pinyë nɔm, acït man tɔ̈u en.

¹⁸ Riɔ̈ɔ̈c aliu ë nhiëëric: ku nhiëër cï dikëdik ee riɔ̈ɔ̈c ciɛɛc wei, në luɔi ee riɔ̈ɔ̈c raan cuil guöp, ku raan ee riɔ̈ɔ̈c aŋoot ke kënë tɔ ye dikëdik ë nhiëëric.

¹⁹ Nhiëër cï en wo kɔn nhiaar, en a nhiɛɛr wok en.

²⁰ Të lueelë raan en, an, Yɛn nhiaar Nhialic, ku mɛɛn mɛnhkënë, ka ye alueeth: raan cïï mɛnhkënë ee nhiaar raan cï tïŋ guöp, ke duëër Nhialic nhiaar adï, Raan kën tïŋ guöp?

²¹ Ku löŋë a yökku tëde yen an, Raan nhiaar Nhialic ke nhiaar mɛnhkënë aya.