1 Jɔn 3 - JAM DE NHIALIC 2011

Mïth ke Nhialic

¹ Tiëŋkï nhiëër dïït cïï Wääda wo nhiaar, bï wo ya cɔɔl mïth ke Nhialic, ku ee wook. Yen a kucë kɔc ke piny nɔm wook, luɔi ë kuc kek en.

² We kɔc nhiaar, wok ee mïth ke Nhialic ënɔɔnë, ku täudan bï wok tɔ̈u rial akën guɔ tïc. Ku aŋicku nɔn bï wo ciët en, kööl bï en tuöl, në tïŋ bï wok e tïŋ täu tɔ̈u en.

³ Ku raan ëbɛ̈n raan cath ke aŋäthë aŋäth ŋɛ̈ɛ̈th en en, ee yepiɔ̈u tɔ lɔ wai cït man le en piɔ̈u wai.

⁴ Raan ëbɛ̈n raan ee kërac looi ka ye löŋ dhɔ̈ŋic aya: kërac yen aye dhäŋ de löŋic.

⁵ Ku aŋiɛckï nɔn cï en tuöl bï karɛckuɔ bɛ̈n nyaai, ku acïn kërɛɛc cath kekë yen.

⁶ Raan ë tɔ̈u ë yeyic, ka cïï kërac ee looi: ku raan ee kërac looi, ka kën tïŋ, ku cïï ŋic aya.

⁷ Wek mïththiaakäŋ, duökï röt ee tɔ mɛthë raan: raan ee këde piathëpiɔ̈u looi, ka piɛthpiɔ̈u, cït man piɛth en piɔ̈u:

⁸ Raan ee kërac looi, ka ye këde jɔŋdït rac, jɔŋdït rac yen aa gɔl luɔi ë kërac ɣɔn ciɛkë käŋ. Yen aa tulë Wën ë Nhialic, bï luɔi de jɔŋdït rac bɛ̈n riɔ̈ɔ̈k.

⁹ Raan cï dhiëëth ë Nhialic acïï kërac ee looi, luɔi tɔ̈uwë käu de wun ë yeyic: ku acïï kërac duëër aa looi, në dhiënh cï Nhialic e dhiëëth.

¹⁰ Kën ee mïth ke Nhialic lɔ dhek kï, ku lɔ mïth ke jɔŋdït rac dhek: raan cïï këde piathëpiɔ̈u ee looi, ka cie këde Nhialic, ayï raan cïï mɛnhkënë ee nhiaar.

Nhiaarkï Röt

¹¹ Ku kënë ee thoŋ cäk piŋ të ɣɔn gɔlë jam an, buk röt aa nhiaar.

¹² Ku cuku bï ciët Kain, raan ë bɔ̈ tëde jɔŋdïït rɛɛcë, raan cï mɛnhkënë nɔ̈k. Ku eeŋö ë nɛ̈k en? E luɔi rɛɛcë luɔide, ku piɛth luɔi de mɛnhkënë.

¹³ Duökï ee gäi, wek mïthëkɔckuɔ, të mɛɛnë kɔc ke piny nɔm week.

¹⁴ Aŋicku nɔn cï wok bɛ̈n bei ë thuɔɔuwic lok të nu pïïr, në nhiëër nhiɛɛr wok mïthëkɔckuɔ. Raan cïï kɔc ee nhiaar, ka tɔ̈u ë thuɔɔuwic.

¹⁵ Raan ëbɛ̈n raan man mɛnhkënë, ka ye raan ee kɔc nɔ̈k: ku aŋicku, an, acïn raan ee kɔc nɔ̈k cath ke pïïr athɛɛr.

¹⁶ Kë ŋicku nhiëër kï, gɛm cï en wëike gaam në biäkda: ku wo duëër wëikuɔ dhil gaam në biäk de mïthëkɔckuɔ.

¹⁷ Ku na de raan cath ke ka pïïrë kɔc ke, ke jɔ mɛnhkënë tïŋ acï käŋ dak, go yic riɛl ke ye, ke nhiëër ë Nhialic cath ke yen adï?

¹⁸ Wek mïththiaakäŋ, duökï kɔc ë nhiaar në jam tei, ku në liep tei, yok kɔc nhiaar në luɔi ku në yic.

Ŋeeny ë Nhialic Nɔm

¹⁹ Këë ŋic wok en nɔn rɛɛn wok në yic kï, ku yen abï wok wopiɔ̈ɔ̈th päl piny ë yenɔm.

²⁰ Të de en ke jiëënyë piɔ̈ɔ̈thkuɔ wook, luɔi dïïtë Nhialic awär piɔ̈ɔ̈thkuɔ, ku aŋic käŋ kedhie.

²¹ Wek kɔc nhiaar, të kën ë piɔ̈ɔ̈thkuɔ wo jɔ̈ɔ̈ny, ke wo duëër nyïïn riɛl ë Nhialic nɔm.

²² Ku të de en kë lipku, ka yok yök tëde yen, luɔi ee wo lööŋke döt, ku yok kamit ë yepiɔ̈u looi.

²³ Ku löŋde kï, gäm bï wo rin ke Wëndɛn Yecu Kërtho gam, ku nhiëër bï wok röt aa nhiaar, cït man cï en wo yiɛ̈n löŋ.

²⁴ Ku raan ë lööŋke döt, ka ye rëër ë yeyic, ku yen ë yeyic. Ku Wëidït cï gäm wook, yen aŋic wok en nɔn rëër en ë woyiic.