1 Jɔn 2 - JAM DE NHIALIC 2011

Kërtho Konyda

¹ Wek mïthkiën thiikë, kakë a gäär ke week, ke we cïï kërac bï aa looi. Ku na de raan loi kërac, ke wo de Raan ë këda kuɔny ë guiëër ë Wääda nɔm, yen aye Yecu Kërtho raan piɛthpiɔ̈u.

² Ku yen aye kë cï Nhialic luk në baŋ de karɛckuɔ, ku acie karɛckuɔ wapäc, ee karɛc ke piny nɔm ëbɛ̈n ayadäŋ.

³ Ku dön ee wo lööŋke döt, en aŋic wok en nɔn cï wok e ŋic.

⁴ Raan luel en, an, ŋic, ku cïï lööŋke ee döt, ka ye alueeth, ku yic aliu tëde yen:

⁵ ku na de raan ee jamde döt, ka nhiëër ë Nhialic acï tɔ ye dikëdik ëyic ë yeyic. Yen aŋicku ye nɔn nu wok ë yeyic:

⁶ raan luel en an, rëër ë yeyic, abï dhil tɔ̈u ë täu man ɣɔn ee yen tɔ̈u.

Löŋ cï Piac Mac

⁷ We kɔc nhiaar, acïn löŋ cï piac cak löŋ gäär week, ee löŋ thɛɛr löŋ ë cath ke week ɣɔn gɔlë jam: löŋ thɛɛr en aye jam cäk piŋ ɣɔn thɛɛr gɔlë jam.

⁸ Ku ye löŋ ë piac cak ayadäŋ en gäär week, löŋ yic ë yeyic ku weyiic, luɔi kɔɔr cuɔlëpiny jäl, ku jɔ ɣɛɛr yic de piny guɔ riau.

⁹ Raan lueel en, an, tɔ̈u tëɣer, ku mɛɛn mɛnhkënë, ka tɔ̈u tëcol aɣët cï ënɔɔnë.

¹⁰ Raan nhiaar mɛnhkënë, ka rɛ̈ɛ̈r tëɣer, ku acïn kë cath ke ye kë bï ye tɔ kɔ̈th.

¹¹ Ku raan man mɛnhkënë, ka tɔ̈u tëcol, ku ciɛth tëcol, ke kuc të le yen thïn, ë luɔi cï cuɔlëpiny ye tɔ cɔɔr.

¹² Wek gäär, wek mïththiaakäŋ, ë luɔi cï karɛckun päl week në baŋ de rinke.

¹³ Wek gäär, wek wärken ë mïth, luɔi cä wek Raan ŋic Raan ë nu të ɣɔn gɔlë käŋ. Wek gäär, wek dhuök, ë luɔi cä wek raan rɛɛcë tiaam. Acä gäär week, wek mïththiaakäŋ, ë luɔi ŋiɛc wek Wääda.

¹⁴ Acä gäär week, wek wärken ë mïth, ë luɔi ŋiɛc wek Raan ë nu të ɣɔn gɔlë käŋ. Acä gäär week, wek dhuök, luɔi riɛl wek, ku luɔi tɔ̈uwë jam ë Nhialic ë weyiic, ku cäk raan rɛɛcë tiaam.

¹⁵ Duökï piny nɔm nhiaar, ayï ka nu thïn duökï ke nhiaar. Na de raan nhiaar piny nɔm, ke nhiëër ë Nhialic acïï cath ke ye.

¹⁶ Këriëëc nu ë piny nɔm, yï ŋɔ̈ɔ̈ŋ de guöp, ku ŋɔ̈ɔ̈ŋ de nyin, ku lɛc ye raan rɔt leec në ka ke pïïr, acïkï ë ka ke Wääda, ayek ka ke piny nɔm.

¹⁷ Ku piny nɔm akɔɔr jäl, ayï ŋɔ̈ɔ̈ŋde aya: ku raan ee këde piɔ̈n ë Nhialic looi ee tɔ̈u athɛɛr.

Kɔc de Ater në Kërtho

¹⁸ Wek mïththiaakäŋ, thaar ë thök de piny kï: ku acït man cä wek e kɔn piŋ nɔn bï raan man Kërtho bɛ̈n, en a cï kɔc juëc man Kërtho röt guɔ yök ënɔɔnë, ku yen a ŋicku ye nɔn ee yen thaar ë thök de piny.

¹⁹ Aake jël ë woyiic, ku aake cïï raan në wook: të ë ke raan në wook, adï ŋootkï ke ke rɛ̈ɛ̈r në wook: ë luɔi bï kek lɔ gɔk nɔn ë cïï kek raan në wook keek kedhie, en aa jël kek.

²⁰ Ku we de töny cï we tɔc, töny ë bɔ̈ tëde Raan Ɣeric, ku we ŋic käŋ kedhie.

²¹ Acie kuny kuöc wek yic, yen ë gäär ɛn week, ee luɔi ŋiɛc wek yic, ku aŋiɛckï nɔn cïn en luenh ee bɛ̈n tëde yic.

²² Eeŋa ye alueeth? Cie raan ee jai, an, cïï Yecu ee Kërtho? Raan man Kërtho ka, raan ee jai ë Wääda kekë Wënde.

²³ Raan ëbɛ̈n raan jai ë Wënde, ka Wääda acïï cath ke yen aya: ku raan gam Wënde, ka cath ke Wääda aya.

²⁴ Ku na week, kë cäk kɔn piŋ të ɣɔn gɔlë jam, takï tɔ̈u ë weyiic. Na tɔ̈u kë cäk kɔn piŋ të ɣɔn gɔlë jam, na tɔ̈u ë weyiic, ke we bï tɔ̈u ë Wëndeyic, ku täukï ë Wäädayic aya.

²⁵ Ku kënë ee kë cï kɔn lueel, an, bï gäm wook, yen pïïr athɛɛr.

²⁶ Ku kakë acä ke gäär week në këde kɔc ee week math.

²⁷ Ku na week, töny cäk yök tëde yen atɔ̈u ë weyiic, ku acïn raan däŋ kaarkï raan duëër we wɛ̈ɛ̈t, ku acït man ee töny manë we wɛ̈ɛ̈t në këriëëc ëbɛ̈n, ku ye yic, ku cie lueth, ke we bï tɔ̈u ë yeyic, cït man ë wëët en week.

²⁸ Ku ënɔɔnë, we mïththiaakäŋ, yak tɔ̈u ë yeyic, na miäk, cï tuöl, ke wo duëër nyïïn riɛl, ku cuku yäär ë yenɔm ë bɛ̈nde.

²⁹ Të ŋiɛc wek en nɔn piɛth en piɔ̈u, ka ŋiɛckï aya nɔn ee yen ë dhiëth raan ëbɛ̈n raan ë këde piathëpiɔ̈u looi.