1 Jɔn 1 - JAM DE NHIALIC 2011

Jam de Pïïr

¹ Kë ë nu ɣɔn thɛɛr gɔlë käŋ. Kë cuk piŋ, kë cuk tïŋ ë wonyïïn, kë cuk woi, kë cuk dɔm ë wocin, këde jam de pïïr.

² Ku pïïr acï tïc ëgɔk, ka cuk tïŋ, ku yök cäätɔɔ në këde, agoku week aa guiëër pïïr athɛɛrë, pïïr ë nu ke Wääda, ku cï nyuöth wook.

³ Kë cuk tïŋ ku piŋku, en a guïïrku week, ke we bï abärɔ aa mat në wook ëtök ayadäŋ: ku ë yic abärɔdan yok mat yen aye abärɔ de Wääda kekë Wëndɛn Yecu Kërtho:

⁴ ku kakë kek agäärku, ke wo bï piɔ̈ɔ̈th miɛt abuk piɔ̈ɔ̈th ayum.

Nhialic ee Ɣɛɛr

⁵ Ku kënë ee thön cuk piŋ tëde yen, ku guïïrku week an, Nhialic ee ɣɛɛrëpiny, ku acïn cuɔl cath ke yen ëtaitai.

⁶ Na luelku an, yok abärɔ mat në yen, ku ciɛthku tëcol, ke wo ye lueth töör, ku cuku yic ee looi:

⁷ ku na ciɛthku tëɣer, cït man nu yen tëɣer, ke wok ee abärɔ mat wapäc, ago riɛm ë Yecu Kërtho Wënde wook aa waak në kërac ëbɛ̈n.

⁸ Të luel wok en, an, cïn kërɛɛc cath ke wook, ke wok ee röt math, ku acïn yic cath ke wook.

⁹ Ku na gamku awɛ̈ɛ̈ckuɔ, ke yen ee Raan adöt ku piɛthpiɔ̈u, ka bï wo päl karɛckuɔ, ku jɔ wo waak piɔ̈ɔ̈th në racdepiɔ̈u ëbɛ̈n.

¹⁰ Na luelku yen, an, cïn kërɛɛc cuk looi, ka cuk tɔ ye alueeth, ku jamde aliu tëde wook.