ROM 8 - DARA GADAIN N.T. with PSA and PRO (BSI)

Bese gathar ni hayu

¹ Odebani du ni phrang de Krista Jisu ha dongyarao ne khlai hi de musibo gajai giri kha.

² Bede thikhade, Krista Jisu ha hayu ni bese ni dara ha phap jang thiyaba ni dara ni phrang, bo ang khe sogo lang kha.

³ Saomang raoyaba ni khlai hi dara jang dang phuyayaba khe Madai ning bo khe dangphai kha. Bo jarni basa khe, phap ni bandai ne khlai hi, saomang phapi lai jahi bo hai ba, ode saomang ha phap dongyaba khe bo gajai ja riphai kha;

⁴ jing saomang ni dara gede thangya hi, bese ni dara gede thangyaba buthu ha, dara ni grao gibi japhu mani khlai hi.

⁵ Saomang ni dara ha thang hi dongyarao de saomang gede ni jinis buthu khe bonsi nangjao re, thikhabo bese ni dara ha thang hi dongyarao de, bese gede ni jinis buthu khe bonsi nangjao re.

⁶ Saomang gede ni jinis de thihlam se, thikhabo bese gede ni jinis khe nangjaoyaba de hayu jang santi se.

⁷ Saomang ni nangjaothai ha baoyaba de Madai jang nanglai ba se; bonsi Madai ni dara ha hapya, bonsi hapbo hap phuya.

⁸ Saomang ha dongyarao, Madai khe khaja ri phuya.

⁹ Madai ni bese nisi niha gibi jang dong kha de, saomang ha nisi dongya; bese ha se nisi dong ba. Sere niha Krista ni bese giri, bo boni subung niya.

¹⁰ Odehe, Krista nisi niha dong kha de, nisi ni saomang phap ni khlai hi thih lakha bo, dormo ni khlai hi nisi ni bese thang hi ning dong ma se.

¹¹ Subung githi ni phrang Krista Jisu baija phinyaba ni bese khe nisi niha dong kha de, subung githi ni phrang Krista Jisu khe baija phin riyaba ning nisi niha dong hi boni bese ni khlai hi nisi ni saomang thiphuyaba khe bo ning mathang ma se.

¹² Odebani, daphlungrao, jing lagai dong, saomang nangjaothai ha thanghi dong mani khlai hi saomang gede ha niya,

¹³ saomang gede nisi thanghi dong khade nisi thih ma se; thikhabo saomang khusi dangyaba buthu khe bese jang nisi sthai kha de, nisi hayu mai ma se.

¹⁴ Madai ni bese jang langsmai hi dongyarao khrip Madai ni basathu se.

¹⁵ Khin dada dongphin mani khlai hi leng jayaba bese khe nisi maiya, basa jaya bani bese khe se nisi mai ba; bo bese ni khlai hi se, Abba, Abai! thi hi jing jirik khao ba.

¹⁶ Bo bese jang ning jini bese jang masi jahi Madai ni basa jayaba gibi khe bo jing khe mithi pha ri du.

¹⁷ Boni basathu jing ja kha de, Madai ni don ni phantha mai ginyarao, Krista ni don khe phantha maipha ginyarao jing ning ja kha; Krista dukhu suguyaba ha jing masi yaowai kha de boni muima bo jing masi yaowai phalai ma se.

Muima dong phaiginyaba

¹⁸ Duhani bubli ha dukhu ja ginyaba buthu de jini ha muima phnu hi dong ginyaba jang de suhi thi phalai mani musibo niya kho.

¹⁹ Khrip jinis sangsaiyaba bo Madai ni basa thu nujao phaiyaba khe bonsi hamsi ning jonso phuya kha.

²⁰ Bo khrip sangsaiyaba buthu khe, haglai grao ni bakhla ha dong rihi bonsi dong kha; bonsi jarni nangjaoma habo dongba niya, bonsi khe dongriyaba ni nangjaothai jang se ja ba.

²¹ Asa deng hi, bo jinis sangsaiyaba buthu khe hamya ni leng ni phrang bonsi haigerjao nang, Madai ni basathu sadin ni muima ha bonsi hapginyaba se.

²² Jinis khrip sangsaiyaba buthu de duha sosibo sao gojenba ha sa jao hi hoi dada bonsi dong thihi jing tharmai du.

²³ Jinis sangsaiyaba buthu se ning niya hi, jing bese ni bathai sagang ha maiyarao ning, jing boni basathu jayaba, (jini saomang bubim jang khoyaba) khe jon hi jini khasu ha jing hoi ba.

²⁴ Ebo asama ha se sogojao hi dong ba. Thikhabo, nuhi se asa jayaba de asa niya. Bo nu hi ning dongyaba khe sere asa ja re?

²⁵ Thikhabo, jing nuyayaba khe jing asa khlai khade, jing jon hi ning dong ma se.

²⁶ Olei jasosi ning, bese de jing raoya jayaba buthu ha jingkhe bo juru du, bede thikhade, snadi balam khe jing bima nang du thihi mithiya, thikhabo, bese de hoima jang thiblaiya si bo jingkhe bi mane grao ri du.

²⁷ Odehe, khah khe naiyaba Madai ning, bese ni baothai khebo tharmai hi, bese ning Madai nangjaoba lai ning subung gatharrao ne khlai hi bo khainsu ri re.

²⁸ Madai khe hamjaoma dengyarao khe, bo ning bo saikhoba lai bo longyarao ne de, bonsi ham mane khlai hi khrip jadi khebo dang ri du thi hi jing tharmai du.

²⁹ Bede thikhade, sagang khna dayaba buthu de boni basa lai dong mani khlai hi sagang ha ning bo saikho da kha, boni basa se gabang daphlung ni bising ha basa sagra japhai phu mani khlai hi.

³⁰ Odehe, bo saikho dayarao khe long ba, bo longyarao khe dormobo ja ri ba, bo dormo ja riyarao khe bakhanbo khlai ba.

Krista Jisu ha Madai ni hamjaoma

³¹ Bo grao buthu ha la jing snadi thi nang kho? Jini gede Madai gaba kha la, sere jing jang nanglai phu ma?

³² Bo jarni basa khebo mathaoya hi jing khrip ne riyaba la, jinis gibin khrip khebo bo jinthane magna ri nang niya na somo?

³³ Madai subung saikhoyarao khe sere ning gajai khlai ma? Dormo ja riyaba de Madai se.

³⁴ Sere ning gajai ja ri ma? Bo thiyaba de Krista se. Jadu, subung githi ni phrang baija dao hi, Madai ni yaoda ha dong hi, jinthane thih riyababo bo ning.

³⁵ Krista ni hamjaoma ni phrang sere jing khe degao ri phuma? Dukhu ha ja thing, kha waimu ha ja thing, do jaoba ha ja thing, asari ha ja thing, sao ha rih giriyaba ha ja thing, khinyaba ha ja thing, niyakhala, seng jang ja thing bo jing khe degao ri phu nang?

³⁶ Madai ni laisi thiba lai, Nini khlai hi sainsong sthai hi ang dong re, Melma sthai jaoginyaba lai ang ja kha.

³⁷ Degaoya dou! Ebo khrip ha ning, bo jing khe hamjao bani khlai hi deyahrao thanebo jing dedao kha.

³⁸ Musi jangbo, thihyaba na hayu, na sorgo ni deglarao, na bisardarrao, na jinis dongyaba, na dongphai ginyaba, na raothai buthu,

³⁹ niyakha la juba, thuba, niyakha la jinis sangsaiyaba khrip ha bo musi jang bo jini Gabra Krista Jisu ha dongyaba Madai ni khasaoma ni phrang jingkhe degao ri phu nang niya thi hi ragao sisi ang tharmai du.