ROM 7 - DARA GADAIN N.T. with PSA and PRO (BSI)

Disingyaba ni phrang daogari

¹ Daphlungrao, dara de subung bo thang hi dong bani bising ha se ning boni basao ha hukhum dongba thihi nisi tharmaiya na somo? Dara tharmaiyarao niha ning ang thiba se thi.

² Olei jasosi ning, basai mai hi masainjik de boni basai thanghi dongdu si, dara ha boni basai jang khajao du; thikhabo boni basai thih khade, boni basai jang khajaoyaba ni phrang bo haiger jao re.

³ Boni basai thanghi dongba ha ning malai jang noh jakha de gaori bonsi thijao ma se. Thikhabo basai thih khade, bo dara ni phrang ragao kha, malai jang noh ja lakhabo, bo gaori niya kha.

⁴ Olei jasosi ning, ani daphlungrao, nisibo Krista ni saomang dara jang dara gede de nisi thih kha, gibin subung, subung githi ni gejer ni phrang baijayaba nisi ja kha, Madai ne bathai thaiyaba jing ja kha.

⁵ Jing subung ni hayu dongthai ha jing dongkhali de, jing dara ni phap nangjaoma ha smao phaiyarao, jini saomang bedeb buthu ha khusi danghi, thihlam ha so riyaba bathai khe thai ri re.

⁶ Thikhabo duha de jingkhe leng ne remyaba khe jing thih kha, dara ni phrang jing haiger jao kha; odebani dara gajam ha reb ba lai niya hi, bese ni hayu gadain ha jing khusi dang la kha.

Dara ar phap

⁷ Jing snadi thi nang kho? Dara la phap se na? Ode niya! Bede thikhade, dara ha jing khe tharmai riya kha de, phap khe jing tharmai nang niya. Dara jang, Da libi thiya khade, libima khe tharmai nang niya.

⁸ Thikhabo, ebo grao riyaba khe, phap jang hajora yaowai hi, khrip libima ani bising ha bo baigo ri du. Dara giri khade, phap githi se.

⁹ Boni sagang hade dara giri hi ang thang hi dong ba, thikhabo grao riyaba dong phai hi, phap smao phai ba,

¹⁰ boha ang de thih kha. Hayu ni grao riyaba grao gibi de, anthane khlai hi thihlam se japhai kha.

¹¹ Phap de grao riyaba khe hajora nai hi yaowai dada bo jing khe thokhi hi grao riyaba khe yaowai hi bo jing khe sthai kha.

¹² Odebani dara de gathar se, ode bo grao riyababo gathar se, bo gibi jang hamba se.

¹³ Thikhabo, hamba jinis ani ha thihlam habo ang khe so ri nang niya? Ode niya! Phap jang se ja ba; phap de phap gibi khe nuphu mani khlai hi, hamba jinis khe yaowai hi ani ha thihlam khe so ri ba; odebani bo grao riyaba ni khlai hi phap gmang thaosisiyaba khe phnu kha.

Subung bising ni jbah

¹⁴ Dara de bese gede ni jinis se thihi jing tharmai du; thikhabo ang de saomang ni subung, phap ni leng ha phain jaoyaba se.

¹⁵ Ani dongthai buthu khe ang jar ning bujilaya, ang nangjaoyaba khebo ang dangya, ang nangjaoyayaba khe se ang dangdao re.

¹⁶ Duha nangjaoyayaba khe ang dang kha de, dara de hambi thihi ang thi du.

¹⁷ Odebani bokhe dangyaba de ang niya, ani ha dongyaba se bokhe dang ba.

¹⁸ Bede thikhade, bokhe ani saomang ha se ang thi ba, hamba jinis musibo giri thihi ang tharmai du. Hamba khusi khe dang ma ang nangjao du, thikhabo, ang dang phuyaba ani ha giri.

¹⁹ Hamba khusi dangma nangjaoyaba khe ang dangya hi, ang nangjaoyayaba khusi khe se ang dang du.

²⁰ Ang dangma nangjaoyayaba khe dang re thikhade, bokhe dangyaba de ang de niya, ani ha dongyaba phap se bokhe dang ba.

²¹ Odebani, ebo jinis dongthai edese thihi ang tharmai so kha: hamba khusi dangma bao kha ning, phap ani ha dongphai du.

²² Ani khasu gibiyaba ha Madai ni dara khe ang khaja la du,

²³ thikhabo, ani saomang ni bedeb buthu ha, dara gibin ja kha thihi ang tharmai kha, bo se ani khasu ha hamba dongyaba jang nanglai hi, ani saomang ni bedeb buthu ha dongyaba phap ni leng habo ang khe slam du.

²⁴ Ang hamsi ning dukhu ni subung ja kha dou! Ebo thihlam ni saomang ni phrang sere ang khe sogo nang kho?

²⁵ Jini Gabra Jisu Krista ni khlai hi Madai niha khajama dong thing. Odebani ang ning gibi jang khasu ha Madai ni dara ha ang khusi dang ba, thikhabo ani saomang de phap ni dara habo khusi dang re.