ROM 6 - DARA GADAIN N.T. with PSA and PRO (BSI)

Phap gede thihhi Krista ha hayu

¹ Jing sum bedehe thi nang kho? Khasaoma bara dao phin mani khlai hi jing phap khusi danghi ning dongma na?

² Ode niya dou! Jini phap thih blai bani yaohon ha bedehe jing phap jang thanghi dong ma?

³ Jing Krista Jisu ha baptisma layarao khripbo bo thihyaba ha baptisma mai kha thihi nisi tharmaiya na?

⁴ Odebani, bo thihyaba ha jing baptisma jahi bo jang baosi jing phip jao kha; Bupha ni muima jang subung githi ni phrang Krista mathang ba lai, jingbo hayu gadain ha jing daobai phu mani khlai hi.

⁵ Jingbo bo jang baosi masi jahi, bo thih ba lai ning jingbo thihpha kha de, bo baija phin ba lai ning bo jang baosi masi jahi jingbo baija phinpha ma se.

⁶ Phap ni leng jahi jing dongya mani, phap ni saomang bubim khe sthai hi dong phu mani khlai hi, jini subung gajam khe bo jang baosi dikpha kha thihi jing tharmai du.

⁷ Bede thikhade sere thih kha bo phap ni phrang sadin mai kha.

⁸ Krista jang baosi jing thih khade, bo jang baosi hayubo maima se thihi jing lon du.

⁹ Krista subung githi ni phrang baijaphin kha, ar bo thihphin nang niya kha thihi jing tharmai du; thihyaba de boni basao ha hukhum giri kha.

¹⁰ Bo thihyaba de, phinsi jang thihthar hi, phap gede ha thih songyaba khe se thih ba, boni hayu de Madai ni gede thang hi dongsongyaba khe se thi ba.

¹¹ Olei jasosi ning nisibo phap gede thih hi, Madai ni gede Krista Jisu ha se thang hi dongba thi hi nisi bao lah.

Phap ni phrang hayu maiyaba

¹² Odebani, nisi saomang ni mijingma khe smaiyarao khe nisi mani ri mani khlai hi nisi ni saomang thih phuyaba ha phap jang bisar da khlai thing.

¹³ Nisi ni saomang bedeb buthu khebo hamyayarao ni yaodi ne khlai hi phap niha da ri lah; thikhabo, thihyaba ni phrang hayu ha labu hi dongyarao lai, Madai niha yaopha hi, nisi ni saomang bedeb buthu khe dormo ni yaodi ne khlai hi Madai niha se ri lah.

¹⁴ Phap jang nisi ni basao ha hukhum giri kha bani, dara ni bakhla ha nisi dongyaba niya kha, khasaoma ni bakhla ha se nisi dong ba.

Dormo ni lengrao

¹⁵ Bedehe jama kho? Dara ni hukhum ni bakhla ha dongya hi khasaoma ni bakhla ha se jing dong kha bani jing phapi ja phalang ma na? Ode niya!

¹⁶ Asaba nihabo, boni grao khe mani mane jarkhe nisi nepha khade, nisi grao maniyaba leng ja kha; phap ni leng se nisi jakha de thihlam se, grao maniya bani leng se ja ba thikhade gajai giri ri jaoma se thi hi nisi tharmaiya na?

¹⁷ Thikhabo, Madai niha ning khajama ni grao dong la thing. Phap ni leng ja lakhabo, nisi niha bonsi nisi ne bojom khlai riyaba slingrithai hamba khe khasu ni gibi ha nisi mani kha bani,

¹⁸ phap ni phrang nisi haigerjao kha ode dormo ni lengrao nisi ja kha.

¹⁹ Nisi ni saomang raoya bani, subung ni grao khe baihi ang sainthi du. Boni sagang ha nisi ni saomang bedeb buthu khe gusu jang hamya khlai ba niha nisi leng ne riba lai, duha de nisi ni saomang ni bedeb buthu khe gathar khlai hi bonsi dongpha lang phu mani khlai hi dormo ni leng ne nisi ri la ga.

²⁰ Nisi phap ni leng jahi dongba ha dormo gede nisi ragao bi.

²¹ Duha nisi laji kha, bo bubli ha nisi khusi dangyaba buthu ni phrang la, snadi hamba bathai khe nisi mai kha? Bo jinis buthu jamthao ba hah de thihlam se.

²² Thikhabo duha ni phrang de, phap ni phrang nisi haigerjao kha, ode Madai ni leng buthu se nisi ja kha, boni lab nisi maiyaba de gathar jayaba ning ja kha, bo jamthaoba hade thaoglao ni hayu se.

²³ Phap ni dam de thihlam se thi, thikhabo Madai jinis magna riyaba de, Jini Gabra Krista Jisu niha de thaoglao ni hayu se.