ROM 4 - DARA GADAIN N.T. with PSA and PRO (BSI)

Abraham nai mani daogari

¹ Dei thikha la, saomang ni dara ha jini greng Abraham khe snadi lab ja kha thihi jing thima na?

² Abraham de khusi dang bani khlai hi dormo subung ja riba se thi kha de, bo sangga mani hathan dongma se, thikhabo Madai ni sagang ha de dong nang niya.

³ Madai ni laisi habo snadi thi ba? Abraham de Madai khe lon ba, boni lonma khebo dormo ha saikho ba, thihi bo sainthi du.

⁴ Khusi dangyaba sain ruji buthu khe yaosandi riba baoma niya, lagai lai se baoma nang ba.

⁵ Bede thikhade, khusi dangya hi, Madai khe mithiyayarao khe dormo ja riyaba lonsoyaba lonma khebo dormo sainpha du.

⁶ Subungbo khusi dangyaba khe baoya hi, Madai ni bokhe dormo habo baoyaba buthu ni khophal hamthai khe Davidbo elei ning thi du:

⁷ Bonsi ni hamya buthu map khlaijao hi dongyarao, odehe bonsi ni phap buthu phungkhlip jaohi dongyarao de bonsi ni khophal hambi,

⁸ Gabra jang phap giri baojaoyarao de, bonsi ni khophal hambi.

⁹ Dei thikha la, bo khophal hamba la jogai bujuh raso jaoyarao ni basao ha se ning dong ba, na jogai bujuh raso jaoyayarao ni basao habo dong ba? Abraham de Gabra khe lon du, boni lonma ha dormo thihi saikho jaoba se, jing thi du.

¹⁰ Bokhebo bede saikho ba? Bo jogai bujuh raso bani sagang ha, na raso bani yaohon ha? Bo jogai bujuh raso bani yaohon ha niya, bo jogai bujuh raso bani sagang ha se ja ba.

¹¹ Jogai bujuh raso mani bising ha, lonma ni khlai hi dormo maiyaba khe gejebdao ri mani khlai hi bo jogai bujuh raso ja bani sin khe bo mai ba.

¹² Olei jasosi ning, jogai bujuh rasoyaba subung buthu jogai bujuh rasoba se ning niya hi jini bupha Abraham bo jogai bujuh khe raso mani sagang ha lonyaba, boni yagain rikphayarao ni buphabo bo ning.

Lonma Madai ni grao hanggaiyaba mai du

¹³ Habsao don somphothi phantha ni grao hanggaiyaba, Abraham odehe boni bongso niha sophaiyaba de, Dara ni khlai hi niya, lonma ha dormo jaba ni khlai hi se bo sophai ba.

¹⁴ Dara khe yaowaiyarao se don somphothi ni phantha jama thikhade, lonma de haglai se, grao hanggaiyaba bo haglai jama se.

¹⁵ Dara de thamsi khe sori re; thikhabo dara giriyaba hade, hamya khlaiyaba bo giri.

¹⁶ Odebani, Dara khe remsongyarao niha se ning niya hi, Abraham jang lonma ha yaowai phalaiyarao boni bongsorao khrip niha de, grao hanggaiyaba khe khasaoma ha asa riyaba japhu mani khlai hi, bo grao hanggaiyaba khe lonma ha ning bonsi phura asa dengba se. Bede thikhala Abraham de jing khrip ni bupha se.

¹⁷ Gabang jadi ni bupha ha ningkhe ang slam kha, thihi reb ba lai. Bo ning lonyaba Madai, subung githi khe hayu riyaba odehe, jinis giriyaba buthu khe dongphai mani longyaba ni sagang ha de grao hanggaiyaba hamba se.

¹⁸ Sathrai buthu lai nini bongso buthu bang ma, thihi gabang jadi ni bupha ja mani grao hanggaiyaba khe asa ja mani giriba habo asa jang bo lon ba.

¹⁹ Bo maithai jang rjasi ja kha, boni saomang de subung githi lai ja kha, thihi odehe Sara bo sagrima se thihi hatho hatho baoba habo, boni lonma khe bo raoya ja riya.

²⁰ Madai grao hanggaiyaba ni balam ha de, lonsingya jahibo mao ba giri, Madai niha muima khe se bo yaopha dao ba.

²¹ Bo grao hanggaiyaba khe Madai ning gibi khlai riphu du thihi bo lon du.

²² Odebani, Boni lonma khe bo dormo ha sainpha ba se,

²³ bede thikhade, boni lonma khe boni dormo ha sainpha ba thiyaba de bo jarni khlai hi se ning reb ba niya.

²⁴ Jingbo, jini Gabra Jisu subung githi ni gejer ni phrang mathangyaba khe lonyarao ni lonma ni khlai hi gajai jayayarao nebo bo reb ba se.

²⁵ Bo de jini gajai buthu ni khlai hi thih mani yaopha lahi dong ba, odehe jing gajai jaya mani khlai hi bo mathang jaohi dongba se.