ROM 3 - DARA GADAIN N.T. with PSA and PRO (BSI)

¹ Dei thikha la, Juda subung la snadi khe lab maidao ba? Niyakhala, jogai bujuh rasoyaba la snadi lab?

² Khrip jadi gede lab se. Bo sagangthao ha, Judarao khe Madai ni grao baigoyaba buthu khe bonsi niha dengda ri ba.

³ Bonsi ni bising ha gejesi lonya la khabo snadi jadao ma? Bonsi lonyayaba jang Madai ni lonma gnang khe musibo niya hi slam ma na?

⁴ Khrip subung thokhiyaba ja la khabo, Madai de gibiyaba se: Ning grao thiyaba buthu ha ning gibi japhu mani odehe, Ning bisar khlaijaoba ha ning dephu mani khlai hi, thihi reb ba lai.

⁵ Thikhabo, jini dormo niyayaba buthu khe Madai ning dormo ha phnu kha la, jing snadi thi ma? (Subung saomang jang thikhala). Jini basao ha thamsi hokhlai kha la Madai khe hamya thihi jing thiphu nang?

⁶ Olei niya! Olei ja kha la, Madaibo habsao khe bede bisar khlai phu ma?

⁷ Bede thikhade, ani mosol grao jang Madai ni grao gibi khe jarni muima ne phnu kha la, angkhe sumjabani subung phaphi jang baosi gajai khlaijao hi ang dongma nang ba?

⁸ Niyakha la, subung gejesi, Hamba jinis baigo phu mani khlai hi phap khusi khe jing danglai nang, bo odehe thiba, thihi bonsi angkhe thisingba lai ning hamya phap khusi khe jing dangma na? Oleiyaba subung buthu de gajai jama ning nangma se.

Saosibo dormo subung giri

⁹ Niyakhala, jing Judarao la bonsi thane jing hamdao na? Ode niya! Bonsi thane jing hamdaoya. Khrip subung, Judarao odehe, Greeksarao de phap ni hukhum bakhla ha gaja se jing dongba thihi nisi ne jing sainthi kha.

¹⁰ Madai ni grao thiba lai: Saosibo dormo subung giri Saosi jahibo giri;

¹¹ Saosibo bonsi bujima giri Saosibo bonsi Madai khe smaiyaba giri.

¹² Bonsi lama niyayaba gede thangthar hi, Bonsi khripbo haglai jathar kha; Saosibo bonsi hamba khusi dangyaba giri kha, Bonsi saosi jahibo giri.

¹³ Bonsi ni grangthroh de mangkhlong khuruba lai se, Bonsi ni slai jang bonsi mosol grao jo du, Bonsi ni bukhuh buthu hade jbu ni bis dong.

¹⁴ Bonsi ni bukhuh buthu hade sarithai odehe grao gakha jang gablai du.

¹⁵ Bonsi ni igah buthu de thijao khaikho mani khlai hi yaphri surba rao bi;

¹⁶ Bonsi ni lama buthu hade Hamyayaba jang dukhu bang bi,

¹⁷ Santi ni lama khe bonsi tharmaiya.

¹⁸ Bonsi ni muthai buthu ha Madai khe gijisa bo khinma giri.

¹⁹ Dara jang grao joyaba side Dara ni bakhla ha dongyarao niha se bo grao thiba thihi jing mithi du. Odebani khrip ni bukhuh phung hi dongphu mani odehe habsao ni khrip khe Madai ni bisar ha dong mani khlai hi.

²⁰ Odebani, Dara ni khusi buthu khe dang bani khlai hi subung saosibo boni muthai ha dormo ja nang niya; dara ni khlai hi se phap khe tharmai phai ba.

Lonma ni khlai hi dormo

²¹ Thikhabo, duha de, dara khe laphaya hi, Madai ni dormo khe phnu kha. Dara jang gorasalirao ning nisi ne mithi ri kha.

²² Bode Jisu Krista khe lon bani bokhe lonyaba si niha Madai ni dormo phnujao hi dongyaba bo ning ja kha. Gibin naiyaba musibo giri,

²³ khrip subung phap khusi dangkha bani bonsi Madai ni muima khe maiya kha.

²⁴ Thikhabo, Krista Jisu ha khoyaba ni dara jang Madai jarni khasaoma ha se ning jinis magna riba lai bonsi khe dormo ja ri ba.

²⁵ Krista Jisu de jarni thijao ni balam jang phap ni map ni khlai hi bokhe saikho hi bokhe lonma ha mai ma nang du. Madai de khah lao phu bani khlai hi, sagang ha ni phap buthu khe bo nuya jamasi ba. Ebo de Madai ning jarni dormo gibi khe phnu mani bo olei dang ba.

²⁶ Bo ning, subung gibiyaba odehe Jisu ha lonma dengyaba si khe dormo jariyaba japhu mani, duha ni bubli ha boni dormo gibi khe phnu du.

²⁷ Olei thikhala, jing sangga mani braha dong? Giri dou. Snadi dara ni kharon jang? Khusi dangyaba ni dara jang na? Niya dou. Lonma ni dara jang se ja ba.

²⁸ Dara jang dang mani bo saikhoyaba buthu khe niya hi, subung de lonma ni khlai hi se dormo ja ba thihi jing rempha ba.

²⁹ Niyakha la, Madai la Judarao ni Madai se ning na? Jentailrao nibo Madai niya na somo? Jadu dou, Jentailrao ni Madaibo bo ning.

³⁰ Madai de saosi se ning; odehe jogai bujuh raso jaoyarao de bonsi ni lonma ni khlai hi dormo ja rijao ma, jogai bujuh rasoyayarao bo bonsi ni lonma jang ning dormo ja rijao ma se.

³¹ Thikhala, lonma nang du thi bani khlai hi se ning dara khe musibo niyahi jing slam ma na somo? Braha ja ma! Dara khe gejeb dao hi jing remsong ba se.