ROM 2 - DARA GADAIN N.T. with PSA and PRO (BSI)

Madaini gibi bisar

¹ Odebani, O subung, malai khe gajai riyaba asababo ja thing, ning thisingthai khlai ma niya, bede thikhade ning malai khe gajai riyaba jang ning jar khe jar gajai rila ba se. Olei jasosi ning deiyaba khusi khe ning dang re.

² Olei khusi dangyarao khe Madai ning bonsi khe gajai ja rikha de bo dangyaba gibi se thihi jing tharmai du.

³ Thikhabo, O subung, olei khusi dangyarao khe niyayaba, ning ning oleiyaba khusi buthu khe dang du thi kha la, Madai ni saja ni hukhum ni phrang ning go nang?

⁴ Niyakha la, khah phin mani khlai hi Madai ning jarni khasaoma jang nisi khe langsmaiyaba khe wainsoyahi, boni khasaoma gnang jathai, boni naisothai, boni khah laoma buthu khe ning haglai bao ba?

⁵ Nini suttha jang ning khah rao bani, Madai ni bisar gibiyaba nujao phai mani basain hade, ninthane khlai hi thamsi bojom khlai laba se.

⁶ Bode khrip jadi jar khusi dangba lai ning bo bisar khlaiginyaba se.

⁷ Sere hamba khusi danghi, muima jang khasaoma odehe jamthaoyayaba khe smaiyarao nede bo thaoglao ni hayu rima se;

⁸ bede thikhala, sere jarne se ning denglayaba, grao gibi khe maniyayaba, jinis gibi niyayaba khe maniyarao ni basao hade, boni thamsi jang bo thamsi khe bo lukhla ma se.

⁹ Hamya khusi dangyarao ni khlai hi dukhu waimu nang nang, sagangthao Judarao ni basao ha sophai nang, odehe Greeksarao ni basao ha sophai ma se.

¹⁰ Thikhabo, hamba khusi dangyarao nede muima bakhan odehe santi jang dong nang, Judarao niha sagangthao ha ri da nang, boni yaohon ha Greeksarao ne ri ma.

¹¹ Bedethikhade, Madai saosi khebo nangjaodao nangjaoyadao jaya.

¹² Dara giri hi khrip phap khusi dangyarao de dara giri hi ning jam nang, odehe dara ni bakhla ha dong hi khrip phap khusi dangyarao de dara khe yaowai hi bonsi ni balam ha bisar khlai rijao ma se.

¹³ Dara khe se ning baoyarao de Madai ni muh ha bonsi dormo subung niya; bede thikhade dara ha lai dangyarao de gajai jari jao nang niya.

¹⁴ Dara giriyaba Jentailrao de bonsi hajai phayaba girikma khe yaowai hi Dara ha lai bonsi dang kha de, Dara giri lakhabo bonsi dara khe jarni khlai hi slam du.

¹⁵ Bonsi dara ni grao buthu hade jar jarni khah ha reb hi dongthai jithai bonsi phnu du, bokhe bonsi hamba hamya tharmaiyaba khebo bo mithipha du; bonsi ar bonsi khah ha niyalaiyaba de, hatho hatho jar khe gajai ri la re, hatho hatho jakhade jarkhe gajai jariya re.

¹⁶ Madai Jisu Krista khe yaowai hi subung buthu boni grao makhao wainso khali, hamba graojma khe ang sainthiba lai ning, bo bisar khlaima se.

Judarao jang dara

¹⁷ Thikhabo, ning Juda subung thilayaba, Dara khe ning asa khlai hi, Madai ni balam ha ning sangga du,

¹⁸ Dara ni grao khe ning slingriyaba se bani hamba jinis khebo ning mithi du, boni nangjaothai khebo ning mithi du,

¹⁹ ning jar ning, muthai ganarao khe langsmaiyaba andar ha dongyarao ne khlai hi jnaya ba,

²⁰ subung girbirrao khe jnama ha langsmaiyaba, Dara ni grao gibi odehe bujima bodo khe lahi, ansarao ni slingriyaba jahi nisi ragao sisi mithi kha de,

²¹ dei thikhala, ning subung buthu khe slingriyaba ning, jarkhe jar slingriya na? Malai khe da khaobai thiyaba ning, khaojibai du na?

²² Ning saosibo gaori da jabai thiyaba ning ning gaori jadu na? Ning, saokhuli khe jajaoyayaba bikhoh buthu khe ning lathar ladu na?

²³ Ning Dara khe sanggayaba, Dara khe sbai hi, Madai ni bumu khe hamya khlai du.

²⁴ “Madai ni bumu de nisi ni khlai hi Jentailrao ni bising ha hamya jaba se”, thihi reb ba lai.

²⁵ Dara khe ning mani kha de jogai bujuh rasoba lab se; thikhabo, Dara khe ning sebai kha de ning rayaba de rayayaba lai se.

²⁶ Odebani, rasoyayaba subung jahibo Dara khe mani kha la, bo rasoyayaba la rasoyaba jang baosi ja nang niya?

²⁷ Odebani, subung saomang ha rasoya hi Dara khe bo mani khade, ning Dara ni laisi denghibo Dara khe sbaiyaba khe bonsi ningkhe gajai jari nang niya?

²⁸ Bonsi srap nujao du, Juda subung thiyaba Juda subung gibi gibiyaba niya, bonsi ni saomang ha nujaoyaba rasoyaba de gibi gibi rasoyaba bo niya.

²⁹ Bede thikhala, bising ha Juda subung jayaba se Juda gibi gibiyaba; rasoyaba gibi gibi bo khasuha se raso ba. Laisi ni grao jang se ning niya hi, bese ha se; bode bakhan maiyababo subung ni phrang niya, Madai ni phrang se mai ba.