ROM 16 - DARA GADAIN N.T. with PSA and PRO (BSI)

Subung saosi jang saosi khlimlai ba

¹ Jini bahandao Phoibi, Kenkria longjom ni dangyajik khe nisi ne basao mithi rima ang nangjao du.

² Bokhe, subung gatharrao lai ning nisi lamjao mane odehe, nisi bokhe juru mane nangba ha nisi juru phu mani khlai hi, nisi khe ang khna ri du. Bobo gabang subung ni juruyajik ja re, ang khebo bo ning juru ba se.

³ Krista Jisu ha khusi dangpha laiyarao, Priskilla jang Akuila khe ang khlim du,

⁴ bonsi de ani hayu khe sogo mani bonsi gorna ajao raoyaba se, bonsi ni basao ha ang se ning niya hi, Jentail longjom sarao khrip bo khaja mani grao khe bonsi thi ba.

⁵ Bonsi ni noh ha longjom bojom jayarao khebo ang khlim du, Ang hamjaoyaba, Epainet, Asia raji ha Krista khe lonjenyaba khe ang khlim du.

⁶ Nisi ni khlai hi dukhu khla phayaba Mari khe ang khlim du.

⁷ Ani greng, Andronika jang Junia, phatho ha ang jang baosi dongyarao khe ang khlim du; bonsi de haijaoyasarao ni bising ha bumu jayaba se, bonsi de anthane Krista ha dong dayaba se.

⁸ Gabra ha ang hamjaoyaba, Ampliata khe ang khlim du.

⁹ Krista ha jing khusi dangpha laiyaba Urban odehe, ang hamjaoyaba Staku khe ang khlim du;

¹⁰ Krista ha subung gibiyaba Apollo khe ang khlim du. Aristobul ni apnarao khe ang khlim du.

¹¹ Ani greng Herodian khe ang khlim du, Narkissa ni apnarao Gabra ha dongyarao khebo ang khlim du.

¹² Gabra ni khusi dangyaba, haingajikrao, Trophaima jang Truphosa khe ang khlim du; Gabra ha gabang dukhu khlai hi dang du, hamjaoyaba Persis khe ang khlim du.

¹³ Gabra saikhoyaba subung Rufa jang boni buma, ani bo bumathu khe ang khlim du.

¹⁴ Asunkristas jang Phlegon, Hermes thu, Patrobas thu, Harmas jang bonsi jang baosi dongyaba daphlungrao khe ang khlim du.

¹⁵ Philologa thu, Julia thu, Neren jang boni bahandao odehe Olumpa, odehe bonsi niha subung gathar dongyarao khrip khebo ang khlim du.

¹⁶ Nisi gathar khudimthai jang saosi khe saosi khlim lai lah. Krista ni longjomrao khrip khebo bonsi nisi khe khlim ha du.

Yaohonthao ni sibringthai

¹⁷ Daphlungrao, slingrithai nisi maiyaba khe badai hi nisi ni bising ha degaoyaba odehe galai ri mani jaokhuyarao ni bising hade hamsisi naiso lahi degao mani khlai hi nisi khe ang khainsu du.

¹⁸ Oleiyaba subung buthu de jini Gabra Krista ni khusi khe bonsi dangyaba niya, jar boni khusi khe se bo dang ba. Bonsi thaoyasi grao jo ba ringyaba jang subung sidarao khe bonsi thokhi re.

¹⁹ Nisi ni grao khnathai khe khripbo mithi du, odebani nisi ni basao ha ang khaja du; bede thikhade, hamba khusi gede girik lah, hamya gede hamya jaya hi dong mani nisi khe ang nangjao du.

²⁰ Santi ni Madai de soithan khe nisi ni igah bakhla ha sangga ning gakhli ma se. Gabra Jisu Krista ni khasaoma nisi niha dong thing.

²¹ Ang jang baosi khusi dangpha laiyaba Timothe bo nisi khe khlim du; olei jasosi ning, ani greng buthu Lukia, Jason ar Sosipater thubo nisi khe bonsi khlim ha du.

²² Ebo laijma khe hai mani rebyaba ang Tertia se, Gabra ni bumu jang nisi khe ang khlim ha du.

²³ Ang jang longjom sarao khrip bo sohiba jang bupha Gaiabo nisi khe khlim ha du. Nogor ni rang naisoyaba Erasta jang jini daphlung Kuarta buthubo nisi khe bonsi khlim ha du.

²⁴ Jini Gabra Jisu Krista ni khasaoma de nisi khrip niha dong thing. Amen.

Mathao mane biyaba

²⁵ Duha, bode, ani hamba graojma odehe, gda ni grao makhao buji hi dengyaba nujao phai ba lai, Jisu Krista ni grao, baikhla hi dongyaba khe dongyaba, bo nisi khe rao ri hi,

²⁶ bo grao makhao khe, jug jug Madai grao riba lai, gorasalirao laisi ni grao jang khrip jadi niha, nisi khna ri kha, bonsi khrip mani phu mani khlai hi.

²⁷ Bo Madai girikdaothao niha se ning, Jisu Krista ni khlai hi jug jug muima dong thing. Amen.