ROM 13 - DARA GADAIN N.T. with PSA and PRO (BSI)

Bisardarrao ni grao khe manima nang du

¹ Khrip subungbo bonsi ni basao ha bisar khlaiyarao ni grao khe mani la thing. Madai ni phrang niyakha de saosibo bisar khlaiyaba giri; duha bisar khlaiyaba buthubo Madai se slam ba.

² Odebani, sere bisar khe badai du, bo Madai ni khapra khe badai ba se, olei badaiyarao de bonsi ni saja mai ma se.

³ Bisar khlaiyarao hamba khusi dangyarao ne de khin ma nangya, thikhabo hamya khusi dangyarao nede khin mani dong. Niyakha la, bisar khlaiyaba khe khinya hi ning dong ma nangjao du? Hamba khusi dang lah, ning boni bakhan mai ma se.

⁴ Bo de ning ham mani khlai hi Madai ni khusi khe dangyaba se. Thikhabo hamya khusi dang khade hamsi ning khin lah. Seng khe bo haglai biglai di baiya. Bode Madai ni khusi dangyaba se, ode hamya khusi dangyarao ni basao ha baslai layaba, bonsi ni basao ha Madai ni thamsi khe so riyaba se.

⁵ Odebani, Madai ni thamsi khe laihi se ning niya hi, hamba hamya tharmaiyaba ni khlai hi bo bisar ni hukhum bakhla ha hap ma nang du.

⁶ Odebani se khajna khebo nisi bojom khlai ba, bisar khlaiyarao, oleiyaba jinis buthu khe sason khlaiyaba de Madai ni dangyasarao se.

⁷ Khrip subung niha nisi ni lagai dongyaba khe ri lah; hah ni dam rima nangyaba nihabo hah ni dam khe ri lah; khajna rima nangyaba nihabo khajna ri lah, man khlaima nangyaba man khlai lah, bakhan khlaima nangyaba khe bakhan khlai lah.

Daphlung ni hamjaoma

⁸ Nisi saosi jang saosi hamjao laima khe garhi de saosibo musi khebo lagai da nang; jarni subung khe hamjaoyaba de dara khe phura maniba se.

⁹ Elei, gaori da ja; da sthaibai, makhao da ja, da libibai, thiyaba buthu khrip khe de, Ning jar khe hamjaoba lai nini noharirao khe ning hamjaoma nang du thiyaba grao ning khrip gajeb thar du.

¹⁰ Hamjaoma de noharirao khe hamya khlaiya; odebani, hamjaoma de dara khe phura khlaiyaba se.

Krista phai mani samphathai

¹¹ Ebo khe garhi bo, dini dakhna ni jathai khe nisi tharmai hi, bo thuyarao ne khlai hi nisi ni khmao ni phrang smao mani bubli gibi jang ja kha; duha jing lon jen riba ha thane de, jing sogoma ja mani bubli samphadao kha.

¹² Hor naiju japhai kha, munu sringma ja kha. Odebani andar ha khusi dangyaba buthu khe jing dangkhlai hi, jnama ni yaodi khe kha phalai nang dei!

¹³ Sain ha dongba lai ning jing majang sisi dong lai nang, hamya gede ejang ojang jaya hi, ju baola jaya hi, gaora jang khah nangma khe yaowaiya hi nam khormu odehe hingsa ha dongya hi,

¹⁴ Gabra Jisu Krista khe ning phin hi dong lah, nisi ni saomang ni nangjaothai buthu phura ja mani khlai hi nisi ni khah ha musi khebo hajora da smai lah.