ROM 11 - DARA GADAIN N.T. with PSA and PRO (BSI)

Israel ni basao ha Madai ni khasaoma

¹ Thikha la, Madai ning jarni subung buthu khe dangkhlai nang na? ang thi ba. Dangkhlaiya dou! Ang bo Israel jadi ning, Abraham ni greng, Benjamin ni sengphong ni subung se.

² Madai jang mithijao dayarao, jar ni subung buthu khe bo dangkhlaiya, Madai ni laisi ni grao ha Elija ni balam khe nisi khnaya na? Madai niha Israel sarao ni balam ni grao habo ning so ri kha:

³ Gabra, nini gorasalirao khe bonsi sthai hi, nini khapra khe bonsi sebai ba, ang khebo bonsi sthaima bao du, thi ba.

⁴ Thikhabo, boha Madai bedehe thiphin ba? Baal ni sagang ha yasgu thuyayaba, subung rjing sni anthane khlai hi ang mathao hi deng du, thi ba jang thiphinjao ba.

⁵ Olei jasosi ning duhabo khasaoma jang saikho jaoyaba subung khaisa dong kho.

⁶ Khasaoma ni khlai hi se bonsi khe saikho ba thikha de, khusi dang bani khlai hi ja phuya; ode niyakha de, khasaoma de khasaoma ja phu nang niya.

⁷ Bedehe japhu ma? Israel jadi gibi jang smaiyaba khe bo maiya. Saikho jaoyarao khe bonsi nu kha, thikhabo gibin subung buthu khrip de gmang giji ja thar kha,

⁸ Madai ni laisi ha reb ba lai; Madai ning bonsi khe mudimyaba bese khe ri hi, Nuphuya muthai jang khnaya khmao jang,

⁹ David thi du, Bonsi ni basang khe bonsi ne khlai hi jeh jang dukhon ode khudayaba khamthan ja thing!

¹⁰ Bonsi nuphuya mani khlai hi bonsi ni muthai buthu de andar jahi, Thaoglao ha mirim khe gongri ning deng la thing, bo odehe thi ba.

¹¹ Ang thi du, Thikha la, bonsi galai kha la, bonsi galai hi ning dong la ma? Odeh niya! bonsi galai bani khlai hi se Jentailrao niha sogoma sophai ba, Israelrao khasao mani khlai hi.

¹² Odebani, bonsi galaiba de habsao ni khlai hi gnang jaba se, bonsi ni khusi jayayaba de Jentailrao ne gnang jaba se thikhade, bonsi so thar khali la hamsi ning bonsi gnang ja nang thi!

Jentailrao ni sogoma

¹³ Duha nisi Jentailrao, nisi niha ang grao sainthi du. Ang de Jentailrao ni haijaoyasa se bani ang khusi dangyaba khe ang de bi bao du,

¹⁴ Ani greng buthu khe hingsa ja ri phu mani, bede thikhala gejesi khe mang mang sogo phu mani khlai hi.

¹⁵ Bonsi dangkhla bani habsao ne khlai hi Madai jang miliphinba se thikha de, bonsi lamjao kha la githi ni phrang thangba lai ja nang niya?

¹⁶ Honduri khe sapthonyaba ni phrang sagangthao ha sagaoyaba khe geryaba gathar jakha de, bo sapthonyaba bo gathar se; bede thikhade bongphang bo boni yader gathar ja kha de boni bedep buthu bo gathar ja du.

¹⁷ Bede thikhade, Oliv bedep gejesi de dainso jaoya ba, ning, oliv mosol, oliv buphang ha ning jura ja hi, yader hamba ha ning jura ja dada,

¹⁸ boni gibin bedep buthu ni bising ha da sangga lah; ning sangga la khabo, boni yader khe khrangyaba ning niya, boni yader jang se bo ning khe kharang ba.

¹⁹ Ning thi du, Jura jahi ang dongphu mani khlai hi boni bedeb gejesi khe dainso ba se.

²⁰ Ning gibi khe ning thi kha dou. Bonsi lonya bani khlai hi bonsi sagao jao ba, thikhabo ning de nini lonma ni khlai hi gejeb hi song du. Odebani, phuthan jaya hi khinma jang dong lah.

²¹ Madai ning jarni bedep gibi buthu khe ning bo haigerya kha de, ning khebo bo haiger nang niya.

²² Madai ni khasaothai ode boni khinthao thaoyaba khe khah ha mathao lah: bo galaiyarao ni basao ha hamsi ning khithao thao se, thikhabo ning de boni khasaoma ha ning ning dongkha de, nini basao ha bo khasao hi dongsong nang, thikhabo ning dongsongya kha de, ningbo dainso jao ma se.

²³ Odehe, bonsibo lonya hi ning bonsi dongsong kha de bonsi jura jahi dongma se, bonsi jura japhin mani raothai de Madai niha dong.

²⁴ Ning oliv mosol ni phrang dainso jaoyaba ning, nalai lai hajaiya hi, oliv buphang hamba ha jura jakha de, boni bedep gibiyaba buthu de, bonsi ni oliv buphang ha ning bonsi jura japhin kha de bonsi bislei ham nang.

Israel sarao ni golam

²⁵ Daphlungrao ebo grao makhao khe nisi tharmaiya mane ang nangjaoya. Ode niya khade, nisi jar khe blaijao la ma se. Jentailrao bonsi sothar mani sagang ha de Israel jadi gejesi ni basao ha khah raoma khe bo sophai rima thi du.

²⁶ Odese, Israel jadi khrip de golam mai ma; Zion ni phrang sogoyahba baigo phai nang, Jakob ni phrang Madai baoyayaba khe gajain khlai ma se,

²⁷ Ebo ning ani grao khayaba jama se, Bonsi ni phap buthu khe ang lang la kha ning, thihi reb ba lai.

²⁸ Hamba graojma gede ni balam ha de, bonsi de nisi ni khlai hi bonsi Madai ni sotrurao se; thikhabo, saikho bani grao gede ni balam hade, bonsi ni greng buthu ni khlai hi bonsi hamdao thaoyarao se;

²⁹ Madai de boni jinis magna riyaba buthu ode bo longyaba ha de boni khah khe gibin slaiya.

³⁰ Boni sagang ha de Madai ni grao khe bonsi lonya, thikhabo, bonsi lonya bani khlai hi duha de khasaoma khe nisi mai kha.

³¹ Olei jasosi ning, duha de nisi bo khasaoma khe mai kha bani, bonsibo khasaoma khe maiphu mani khlai hi, grao lonyayaba bonsi ja kha.

³² Madai ning khrip subung ni basao ha boni khasaoma khe bonsi ne phnu ri phu mani khlai hi khrip subung khe grao layayaba ha bo jeb thar kha.

Madai khe bakhan khlai ba

³³ Madai ni gnang jathai, boni girikthai ar boni gyan bangthai la gabang thubi dou! Boni bisar buthu khebo tharmai so phuya, boni lama buthu khebo baoso ha phuya.

³⁴ Sere boni khah khe mithi du? Boni bisar habo sere dongpha du?

³⁵ Niyakha la, bo suphin mane boni ha yaosandi riyaba sere dong?

³⁶ Khrip jinisbo bo ni phrang ode boni dara jang bonthane khlai hi dongphaiyaba gaja se. Boni ha ning thaoglao jang muima dong thing. Amen.