ROM 10 - DARA GADAIN N.T. with PSA and PRO (BSI)

¹ Daphlungrao, ani greng buthu khe sogoma mai thing mu thi hi ani kha ha nangjaoma jang Madai niha ang bi du.

² Bede thikhade Madai ni khlai hi gibi jang khah muh ri du thihi ang mithi du; thikhabo, bonsi bujima gibiyaba jang khah muh riba de niya.

³ Madai ni phrang dormo khe mithiya hi, bonsi ni dormo khe rao rima bao hi, Madai ni dormo ha bonsi rihi hapsingya.

⁴ Krista de bokhe lonyarao ni khlai hi bonsi dormo khe maiphu mani dara khe sjamyaba se.

Sogoma de khrip subung ni khlai hi se

⁵ Moses de dara ni phrang dormo ni grao khe edehe bo reb du: Bo dara buthu khe maniyaba de bo buthu ni khlai hi ning bo thang ma se.

⁶ Thikhabo lonma ni dormo de, Nisi ni khah jang sere sorgo ha thang nang? (bo de Krista akhai hi laphai nang thiyaba se)

⁷ jar la, Sere hakhor khithu giriyaba ha akhai nang? (bo de subung githi ni bising ni phrang Krista ning lai hi nang thiyaba grao se) da khin, bo odehe thi du.

⁸ Thikhala, bo bedehe thi ba? Grao de ning khe sampha du, nini khuh jang nini khah ha dong, bo odehe thi ba. (bo de lonma ni grao jing thiyaba de bo se).

⁹ Nini khuh jang Jisu de Gabra se thi dada ning gaba hi, subung githi ni bising ni phrang Madai ning bokhe baija ri ba thihi nini khah ha ning lon kha de, sogojao ma se.

¹⁰ Bede thikhade, dormo subung ja mani khlai hi khah ha lonma nang du, odehe sogo mani khlai hi khuh jang gaba ma nang du.

¹¹ Madai ni laisi ha thi du, Sere bokhe lon du bo laji nu nang niya.

¹² Juda jang Greekrao de musibo gibin jadaya. Gabra masi de khrip ni Gabra se; bo khrip longyarao khebo gibi jang hamsi ning hamthai ri du.

¹³ Sere Gabra ni bumu khe la du, bonsi khe sogojao ma se.

¹⁴ Thikhala, bonsi lonya kha la, bedehe bonsi khe long ma? Boni balam khe khna ba giriyaba subung la bedehe lon ma? Sainthiyaba giri hi bonsi bedehe khna ma?

¹⁵ Haihaya kha la bedehe sainthi ma? Milima ni hamba graojma khe sainthi hi, khajama ni hamba graojma khe so riyarao ni igah majang bi dou! thihi reb ba lai.

¹⁶ Thikhabo, hamba graojma khe bonsi khrip de lon tharya; Isai ning, Gabra, jing grao sainthiyaba khe sere lon du? bo odehe thi du.

¹⁷ Odebani, lonma de grao khe khnayaba ni phrang se bo dong phai ba, grao sainthiyaba khe khnayaba de Krista ni grao ni phrang se bo dong phai ba.

¹⁸ Thikhabo, ang thi du, Bonsi la khnaya na? thihi jing sing ba. Bonsi khnaba de khna kha. Bonsi ni khurang de phirthi ni khrip hathan ha dak so thar hi kha, odehe bonsi ni grao buthu de phirthi grongbri sosi gubblung thar kha, odehe thi du.

¹⁹ Thikhabo ang thi du, Israel sarao la bokhe bujiya na somo? thihi ang sing ba. Boha Moses sagangthao thi ba: Jadi ha sainpha jaoyayarao khe nisi ni basao ha hingsa ja ri nang; Jadi gibirrao khe yaowai hi nisi ni basao ha ang thamsi baigo ri ma se, thi du.

²⁰ Isai thi du, khitha rao hi, Ang khe smaiyarao khe ang goron kha, Bo ang khe smaiyayarao niha ang bonsi khe tharmai ri kha, bo odehe thi ba.

²¹ Thikhabo, Israel ni balam ha de, bo edehe thi du, Subung thiba lab giriyarao thokhi baiyarao ne khlai hi, sainsong ani yao khe ang sugu re, thihi bo sainthi du.