PHILIPPI 2 - DARA GADAIN N.T. with PSA and PRO (BSI)

Krista ni hamjaoma gedeba

¹ Krista ni gede khah shanti mai la kha, hamjaoma ni phrang shanti, bese jang dongpha lai ba, ode saosi jang saosi khe maya nanglai ba ode khasao laiyaba ja kha.

² Odebani khathai masi jahi, hamjaoma masi jahi, graosi khah masi jahi, ani khajama khe gibi khlai lah.

³ Badai hi ode jar khe dejao hi musibo khusi khe dangya hi, nisi basasa ja dada, nisi thane gibin subung khe hamdao bao lah.

⁴ Jar ne khlai hi se ning naiya hi gibin subung buthu ham mane bo nailai lah.

Krista basasa jahi dongyaba.

⁵ Bedehe Krista ha khah dong ba, olei ning nisi nihabo dong thing:

⁶ Bo de Madai jahi ning dong lakha bo, Bo Madai jang baosi ja mani baoya.

⁷ Subung ni saogari lai bo hajaiphai hi leng lai bo jahi, jar khe jar meser hi, bo khongja khlai la kha.

⁸ Subung ni saogari lahi, bo basasa jahi, thih si grao mani hi dongphai ba, kross ha thihyaba ha ning bo hang yaopha la kha.

⁹ Odebani, Madai ning bokhe judaothao ha sugu lang la kha, khrip bumu ni bising ha bumu dedaothao bo ri kha.

¹⁰ Odese, Jisu ni bumu ha ning khrip jadi sorgoni subung buthu, phirthi ni subung buthu, ode pirthi bakhla ni subung buthubo bonsi yasgu thu mani ode,

¹¹ bupha Madai ni muima ne khlai hi khrip jadi ni slai jang Jisu Krista ning Raja se thi dada bonsi baipha lang mane khlai hi.

Habsao ha jnaba lai jna du

¹² Odebani, hoi ani daphlungrao, nisi grao mani hi ning dongba lai lah, duha ang giriba hatho habo, ar gejebdao hi khinthri jang the the mao hi nisi ni sogoyah ni khusi dangpha lang lah,

¹³ bede thikhade, bo jar nangjao ba lai dang mane ode, dangma bao mane ode nisi ni khah ha bao hi khusi dang riyaba de Madai se.

¹⁴ Asaba khebo berbaiya hi ode nam khormu giri hi dang lah.

¹⁵ Greng hamyayaba ode subung gederyarao ni bising ha gajai khusi dangya hi ode, hamba jahi, Madai ni basa hamya thima giriyaba lai nisi japhu mani khlai hi, habsao ha bonsi ni gejer ha sathrai buthu lai jna lah.

¹⁶ Hayu ni grao khe remsong lah, odese Krista ni basain hade haglai ang khaiya hi dukhu khlaiyaba haglai jaya thihi ang sangga phu mani khlai hi.

¹⁷ Jadu, nisi ni lonma bandai ode khusi dangyaba ni basao ha lukhlai jaoma thikhabo ang khaja du, nisi khrip jang baosi ang khajapha du.

¹⁸ Olei jasosi ning nisi bo khaja hi, ang jang baosi khajapha lah.

Timothe jang Epaphrodita

¹⁹ Gabra ni nangjaoma ja du thikhade, Timothe khe ang srap nisi niha haiha ma asa deng du, nisi ni graojma khe ang khna hi khah shanti japhu mani khlai hi.

²⁰ Bo de ang jang baosi dongyaba ar nisi ham mani khlai hi gibi gibi nanglaiyaba se.

²¹ Bonsi khrip bo Jisu Krista ni jinis buthu khe smaiya hi jarni lab ne khlai hi se ning smai ba.

²² Timothe khe de, boni lab jathai khe nisi tharmai kha, basa jarni bupha ni khusi khe dangba lai, hamba graojma dengyaba ha ning khusi dangpha du thihi nisi mithi kha.

²³ Odebani, ani balam ni khlai hi ang tharmai ba jang bokhe srap haiha mani ang asa khlai du;

²⁴ Jar bo srap baosi phai mani khlai hi, Gabra ha ang asa khlai du.

²⁵ Ani daphlung, ang khusi dangpha laiyaba ode ani siphaiya lugurao, nisi ni grao disoyah ang nangba ha nisi a ne juru mane hai riyaba, Epaphrodita khe nisi niha haiha ma nangma se thihi ang bao du.

²⁶ Nisi khrip khebo hamsi ning wainso du, bo limdu thihi nisi khna ba khali habo hamsi ning khah waimu nang ba.

²⁷ Bo thima jasi lim ba, thikhabo Madai ning bokhe khasao hi, ode bokhe se ning niya hi bo, khah waimu ni basao ha khah waimu nangdaoyaba khe ang maiya mani khlai hi, ang khebo khasao pha ba.

²⁸ Bokhe nisi nuphin baha khaja phu mani ode, ani khah waimu khebo rijengdao mani khlai hi, bokhe ang srap haiha ma nangjao du.

²⁹ Odebani, bokhe Gabra ha jadi jadi khajama jang khusi jahi, elei subung khe bakhan khlai lah.

³⁰ Nisi ani khusi dang riyaba thaoyaba khe phura dangso mani khlai hi thiba khe khinya hi Krista ni khusi, bo thima jasi bo dang ba.