NUJAOYABA 8 - DARA GADAIN N.T. with PSA and PRO (BSI)

Sin masni khruba ni grao

¹ Sin masniyaba khebo khru ba jang gontha gejer lai nokhasao de siri siri ja ba.

² Boha, sorgo ni degla Madai ni sagang ha songyaba sni buthu khe ang nu ba, bonsi ne bibul masni bo yaopha ba.

³ Sorgo ni degla gibin saosi, bahai midim saoyaba gajao ni bokhoh labu hi khapra rogong ha bo songphai ba. Singhason ni sagang ha gajao ni khapra basao ha khrip subung gatharrao biyaba buthu baosing pha mani khlai hi, bahai midimyaba gabang boniha bonsi yaopha ba.

⁴ Sorgo degla ni yao ni phrang de bahai midim saoyaba ni waikhudi khe subung gatharrao biyaba buthu jang ning Madai niha sohi kha.

⁵ Odehe, sorgo ni degla ning bahai midim saoyaba bokhoh khe bo laha hi, khapra ha waithai khe gablai ri hi, bokhe phirthi ha dangkhla ba. Odebani, nokhasao grung grung grimyaba sar buthu, khurang ni sar buthu nokhasao jablai jablai gurjliyaba buthu, ode banglama smaoyaba buthu dong phai ba.

Bibul dam ba

⁶ Boha sorgo ni degla sniyarao bibul masni langyarao khe dam mane bonsi salai kha.

⁷ Degla sagangthao boni bibul khe damba, gidithai jang wai, thijao jang gibringyaba baigo phai hi, bokhe phirthi ha dangkhla kha; phirthi phantha tham saikhao hi phantha si kham thar kha, boha gakhrangyaba buthubo khrip kham thar ba.

⁸ Sorgo ni degla gniyaba boni bibul khe damba, boha ning hading gedeba lai kham hi sagor ha bokhe dangsing ba.

⁹ Sagor khe phantha tham saikhao hi phantha si khe thijao ja ri hi, sagor ha hang gnang dongyaba khrip phantha tham saikhao hi phantha si thih ba, rung buthubo phantha tham saikhao hi phantha si hamya khlaijao hi dong ba.

¹⁰ Sorgo ni degla gathamyaba boni bibul khe dam ba jang, sathrai gedeba, waimijing lai jing hi sorgo ni phrang, dikhong buthu phantha tham saikhao hi phanthasi ni basao ha ode dihmu buthu ni basao ha ning bo graiphai ba.

¹¹ Bo sathrai ni bumu de Khayaba se. Bo ning dih khe phantha tham ha phantha si saikhao hi phantha si khe bo dikha ri hi, bo gabang khah kha bani, bo dih khayaba hathan ni subung gabang ning thih kha.

¹² Sorgo ni degla briyaba boni bibul khe dam ba jang, sain khe phantha tham saikhao hi phantha si, dain khebo phantha tham saikhao hi phantha si ode, sathrai buthu phantha tham ha phantha si khe hamya khlai ba, odehe, jnama buthu khe phantha tham ha phantha si saikhao hi bonsi andar khlai jao ba, sainbo phantha tham saikhao hi phantha si andar ja hi dong ba; olei jasosi ning horbo phantha tham saikhao hi phantha si andar japha ba.

¹³ Boha ang naiha bade, nokhasao gejer ha daoling birbai hi khurang bol jang edehe thiba khe ang khna ba, Sorgo ni degla gibin gatham bonsi ni bibul khe dam ba jang phirthi ha dongyarao ne khlai hi bubain risi bi dou! Bubain risi bi dou! Bubain risi bi dou! thi hi bo jirikkhao phai ba.