NUJAOYABA 2 - DARA GADAIN N.T. with PSA and PRO (BSI)

Ephesi longjom ne laijma

¹ Ephesi ni longjom ni degla ne edehe reb lah: Boni yaoda gede ni yao ha sathrai masni di hi, gajao ni thaophari masni buthu ni gejer ha daoding baiyaba ebo grao khebo edehe thi du:

² Ning khusi dangyaba buthu khe ang tharmai du, nini dukhu hadi, nini khah laoma, subung hamyayarao khe ning naiphuyathai, haijaoyasa niya hi haijaoyasa thilaba khe nai nai hi, boni mosol jathai khe ning remyaba grao buthu khe ang khna kha.

³ Ning hamsi ning dukhu khah lao hi, ani bumu ni khlai hi ning dukhu khlaiba ha ning raoya jaya thihibo ang tharmai du.

⁴ Thikhabo, ang ning khe siji du: bedethikhade sagangthao ni hamjaoma khe ning haiger kha.

⁵ Odebani guju ni phrang ning galai ba thi hi ning wainso lah. Khah phin hi jenba ni phrang ning dangyaba buthu khe dang phin lah. Ning khah phinya khade, nini ha ang phai hi, nini thaophari dengyaba khe dengthan ni phrang ang disai ma se.

⁶ Thikhabo, ebo de nini khlai hi hamba se: Ani nangyathai khe, Nikolathu khusi dangyaba buthu khe ning jajaoya ja ba.

⁷ Bese jang longjomrao niha bo grao thiyaba khe khmao dong khade khna la thing. Bo deyaba si khe Madai ni Paradis ha dongyaba hayu ni buphang ni bathai khe ang nisi ne ji ri ma se, thi du.

Smurna longjom ne laijma

⁸ Smurna longjom ni degla nihabo edehe reb lah: Sagangthao jang yaohonthao thih hi baija phinyaba de edehe thi du:

⁹ Nini dukhu buthu khe ang tharmai du; suliya jakhabo ning gnang se. Juda gibiyaba niya hi, Juda thibaiyarao, Soithan ni sunagog ni subung buthu nisi khe bonsi sijiba khebo ang tharmai du.

¹⁰ Ning dukhu jaginyaba buthu khe da khin. Nai lah, Diabol de nisi ni bising ha gejesi khe phatho ha jeb hi nai nai ma se, ode nisi nokha sain jhi dukhu ja ma se. Thih ba sosi lonma jang dongpha lang lah, odese nisi ne ang Raja ni khrothu khe ri ma.

¹¹ Bese jang longjomrao niha thiyaba khe khmao dong khade khna la thing. Bo deyaba si khe thih maginyaba bo musibo khlaiphu nang niya, thi du.

Pergamos longjom ne laijma

¹² Pergamos longjom ni degla nihabo edehe reb lah: Seng bu daothaoyaba khe dengyaba edehe thi du:

¹³ Soithan ni singhason dengyaba hathan ha ning dongba thi hi ang tharmai du. Thikhabo, ani bumu jang song hi, odehe ani grao khe sakhi riyaba subung lonma gnang, Antipas khe Soithan raoyaba hathan ha bonsi sthaiba habo nini lonma khe ning yaohon druya.

¹⁴ Sum bedehe thikhade, gijisa ning khe ang siji du: Balaam slingriyaba gejesi khe ning mani bani, bo ning Balakh khe Israel basathu khe gajai ha langsmai ba sling ri hi, Israel ni basathu khe saokhuli bi hi mogong khe ji mani, nangjaoma phap ha galai mani khlai hi bo gajai ha langsmai ba.

¹⁵ Olei jasosi ning, nisi ni bising ha Nikola slingriyaba khe nisi mani hi ning dong.

¹⁶ Odebani, khah phin lah. Ning khah phinya khade, ang srap nini ha phai hi, ani khuh ni seng jang bonsi khe ang nanglai ma se.

¹⁷ Bese jang longjomrao niha thiyaba grao khe khmao dong khade khna la thing. Bo deyaba si ne manna huikhaoyaba gejesi khe ang ri nang; ode guphu ni longthai bo ang ri nang, bo longthai guphu hade bokhe maiyaba khe garhi de, saosi bo bonsi tharmaiyayaba bumu gadain ha bo sugujao ma se, thi du.

Thuatira longjom ne laijma

¹⁸ Thuatira longjom ni degla nihabo edehe reb lah: Wai jingba lai muthai dongyaba ode pithol jnaba lai igah dongyaba, Madai ni basa de edehe thi du;

¹⁹ Ning khusi dangyaba buthu khe ang tharmai du, nini hamjaoma, nini lonma, nini khusi dangthai, nini khah laoma khe ang tharmai du. Bo jenba ha thane duha nini hamba khusi dangthai khebo ang tharmai du.

²⁰ Thikhabo, ningkhe ang siji du, bo masainjik Jezebel gorasali nisi thiyaba khe dong mane ri bani, bo sagang ha ani dangyasarao khe khah nang ma yaowai mani odehe, saokhuli khe biya bani, mogong khe ji mani khlai hi bonsi khe sling ri hi, bo gajai gede langsmai ba.

²¹ Bo khah phin mani khlai hi ang bubli riba, thikhabo, khah nangma yaowaiyaba ni phrang bo khah phindaoya.

²² Odebani, bokhe gilim gasa ni yam ha ang so ri nang, bo jang baosi gaori japhayarao khebo, bonsi ni yaowaithai ni phrang khah phinya khade, hamsi ning ang gmang giji khlai ma se.

²³ Boni basathu khe ang sthaima se: Ode thikhase, ang khe khrip khah ha baoyaba khe jamthar si tharmaiyaba ani jathai khe longjomrao khripbo tharmai nang. Odehe khrip subung jar khusi dangba lai ning slai ma se.

²⁴ Nisi Thuatira ni gibin subung buthu de, ebo slingriyaba khe nisi mani phaya, Soithan ni grao makhao nisi ni khasu buthu, bonsi thiyaba buthu khebo nisi mani phaya bani nisi ne musi khebo bubain risi khe ang baosing nang niya.

²⁵ Ang phaiphinya side nisi niha jinis dongyaba khe naiso lah.

²⁶ Bokhe deyaba si ar jamthaoba sosi ang nangjaoba lai dangyaba si de jadi ni basao ha graothai ni hukhum ni hok khe ang ri ma.

²⁷ Bo ning ser ni goda khe yaowai hi bonsi ni basao ha bisar khlai nang, ani bupha ni phrang ang hukhum mai ba lai ning, hah ni mudik khe dophai ba lai ang dophai ma se.

²⁸ Bo khe deyaba nede naiju sathraibo ang ri ma.

²⁹ Bese jang longjomrao niha thiyaba khe khmao dong khade khna la thing.