NUJAOYABA 18 - DARA GADAIN N.T. with PSA and PRO (BSI)

Babulon galaiyaba

¹ Boni yaohon ha sorgo ni degla gini sorgo ni phrang akhaiba khe ang nuba. Hukhum dedaothao dongyaba; boni muima jang phirthi khe bo jdan thar ri ba.

² Khurang bol jang, Bo raoya kha! Babulon nogor gedeba raoya kha! Sgo sgain buthu ni dongthan jalang la kha. Odehe khrip jadi ni bese gusu ni dongthan, khrip jadi dao rege rege bojom jathan, khrip jadi mih rege regeyaba ni dongthan jalang la kha!

³ Bede thikhade, khrip jadi buthubo bo nangjaoma ni thamsi ni grep bidih ju khe bonsi ne ling ri kha. Phirthi ni rajaraobo bokhe hamjao re, odehe phirthi ni bepharirao bo nangjaoba lai lai yaowai hi bo gnang ja kha, thi hibo bai ba.

⁴ Odehe sorgo ni phrang khurang gibin ang khna phin ba: Ani subung buthu, oraha ni phrang baigo lah, Boni phap buthu ha nisi maipha jao nang, boni saja buthu habo nisi maipha jao nang.

⁵ Bede thikhade, bo masainjik ni phap buthu, sorgo sosi dak so hi kha, boni hamya buthu khebo Madai ning khna thar kha.

⁶ Nisi ni basao ha dangba lai ning, boni basao habo dang lah; Bo khrip khusi dangyaba khe phantha gin bangdao hi su lah; Boni bela gibringyaba ha ning phantha gin bangdao hi gibring ri lah.

⁷ Bonsi jarkhe dejao layaba ode jar khe suk khlai layaba khe, dukhu jang khah waimu ha su lah. Boni khah ha rani lai ang bisar khlai ba, ang banjikrao niya, musi khah waimu mai nang niya, bo odehe thi ba.

⁸ Odebani boni saja de sainsi ni bising ha ning sophai thar ma se; thihyaba ar suk, asari de wai ha saokhrip jao ma se. Bede thikhade, boni basao ha bisar khlaiyaba Gabra de bol raoyaba se, thi hi khurang bol jang bo thiphai ba.

⁹ Odehe, phirthi ni raja bo jang baosi gaori japha hi jar ni nangjaoma ha suk khlai hi dongyarao bo khamyaba waikhudi khe nu kha ning, khah bao dohi dukhu jang gra ma se.

¹⁰ Odehe, boni saja ha dukhu japha jao ma, bonsi khin bani gajain ha bonsi song nang, odehe, Nisi ni bubain risi bi dou, nisi ni bubain risi bi dou! O Babulon nogor, raothai dedao thaoyaba, gontha si ni bising ha ning nini basao ha hamya japhai kha! bonsi odehe thi ma se.

¹¹ Odehe, phirthi ni bepharirao de gra hi bokhe bonsi bi ma se. Bonsi jinis labuyaba buthu khe saosi bo baraiya kha bani;

¹² bonsi ni jinis buthu de gajao, rangkhrao, longthai dam gnang, longserkhi, rih gili duduyaba, bongphang midimyaba khrip jadi, miyung ni hathai jang slamyaba khrip jadi, dam gnang bongphang jang slamyaba khrip jadi, sugayung jang slamyaba, ser jang slamyaba, rih jaosim, rih rehendi, rih gajao jnayaba, guphu ni longthai jang slamyaba,

¹³ bongphang ni yaderma, mosola, mai, bahai midim saoyaba sathrai, murra, dup-dhuna, grep ni ju, oliv ni thao, honduri, musu buthu ode melma buthu, gorai jang roth buthu, leng, subung ni hayu buthu sosibo jahi, bo buthu khe saosibo bonsi baraiya kha.

¹⁴ Bonsi Ning bathai nangjaoyaba, nini hayu nebo libiyaba buthu de bonsi ning khe dangkhlai lang kha; nini muima jang majangma khrip jam kha, ar maiphin nang niya kha, thihi thi ba.

¹⁵ Ebo jinis buthu khe bephar khlaiyaba, bo ni phrang gnang jayaba buthu boni saja ha dukhu japha ma, khin bani bonsi gajain song hi, gra ba.

¹⁶ “Bo gmang thaosisi jakha na! Nogor gedeba, rih gili duduyaba, jaosim ode rih gajao jnayaba phin hi, gajao, longserkhi jang sal khlaiyaba de!

¹⁷ Ar grao thaosi ni bising ha ning boni gnang khrip jam lang la kha,” thihi bol jang gra dada bonsi khah baodo ma se. Odehe, rung bubrarao jang rung ha moposol thangyarao, bephar khlaiyarao khrip subung gajain ha bonsi song hi,

¹⁸ bo khamyaba waikhudi khe bonsi nuhaba jang jirik khao hi, Ebo nogor laiyaba nogor gedeba gibin dong kho? bonsi thi ba.

¹⁹ Bonsi jar jar ni bokhro buthu ha haduri phinkhru hi gra nang, Gmang thaosisi ja kha dou! hai! Nogor gedeba khrip bo boni gnang khe yaowai hi, sagor ni khrip rung ebo nogor ni khlai hi se bonsi gnang ja ba, gontha si ni bising ha ning bo haglai ja lang la kha, bonsi odehe thi ba.

²⁰ O sorgo jang nisi subung gatharrao, haijaoyarao ode gorasalirao, boni basao ha khaja lah; bede thikhade, masni khe gai khlai bani Madai ning bonsi khe saja ri kha.

²¹ Odehe, sorgo ni degla raodao thaoyaba mairong honkhliyaba longthai jang baosi longthai gedeba khe sugu hi, sagor ha bo dangkhla ba, Babulon nogor de olei jasosi ning bol jang dangkhla jao nang, odehe bokhe nuphin nang niya kha. thi ba.

²² Nini bising hade khurang majangyaba, asaba seranda ni khurang, suphin damyaba khurang, bibul ni khurang khna nang niya kha! Nini bising hade jinis slamba ringyaba musi khebo nu nang niya kha. Nini bising hade mairong honyaba khurang khebo khna nang niya kha!

²³ Nini bising hade thaophari jna nang niya kha, nini bising ha daman jang damanjik ni khurangbo khna phin nang niya kha. Nini bepharirao de habsao ni subung gedebarao ja kha, nini montro ringyarao de khrip jadi khe sibir thar kha! bo odehe thiba.

²⁴ Boni bising hade gorsalirao ni thijao jang subung gatharrao ni thijao buthu, phirthi ha sthaiyaba khrip ni thijao khe bo ri re, oraha ning maiba se.