NUJAOYABA 10 - DARA GADAIN N.T. with PSA and PRO (BSI)

Degla laisi bajap thonyaba

¹ Odehe, sorgo ni degla gibin, raodao thaoyaba, sorgo ni phrang akhai phai ba khe ang nu ba; bokhe bonsi jimi merei hi, boni khro basao ha jengglong mander su ba; boni mukhang de sain lai se, boni igah buthu waislai lai se.

² Boni yao jang laisi basasa thonyaba khe khu hi labu ba. Boni igah yaoda gede sagor ha gasing hi, boni igah yaosi gede hakhong ha ga ba,

³ misiraigonma hoba lai khurang bol jang bo jirikkhao ba. Bo jirikkhao blai ba jang nokhasao grimyaba masni buthu de bonsi khurang buthu khe haiger kha.

⁴ Nokhasao grimyaba masni buthu ni khurang haiger ba jang, srap reb ma bao ba, thikhabo, sorgo ni phrang ang khurang khna kha, Nokhasao grimyaba masni buthu grao thiyaba khe hui lah, da reb thao, bo thi phai ba.

⁵ Odehe sagor jang hakhong ha sorgo ni degla song hi dongba khe ang nuba ha, nokhasao gede jar ni yao khe sugu hi,

⁶ nokhasao jang boni bising ha dongyaba jinis buthu, phirthi jang boni bising ha jinis dongyaba buthu, odehe sagor jang boni bising ha jinis dongyaba buthu khe slamyaba, thaoglao thaoglao thang hi dongyaba ni bumu khe lahi thi ba, Duha bubli yesi laoya kha;

⁷ thikhabo, sorgo degla sniyaba boni bibul khe dam mani basain buthu ha, Madai ni grao dengkhaoyaba jar ni dangyasa gorasalirao niha bo thiba lai ning, phura japhai ma se, odehe bo thi ba.

⁸ Boha, sorgo ni phrang khurang ang khna ba jang bo ang jang sain lai phin ba, Sagor jang hakhong ha songyaba sorgo ni degla ni yao ha laisi bajap khuru hi dongyaba khe labu lah, bo ode thi ba.

⁹ Odebani sorgo ni degla niha ang thang hi thi ba, ebo laisi bajap basasayaba khe ang sain ba, bo aniha thi ba, Neh, ebokhe lahi ji lah; nini bohoh hade khajao nang, thikhabo nini bukhuh hade beredih lai dijaoma se.

¹⁰ Sorgo ni degla ni yao ni phrang laisi bajap basasayaba khe laha hi ang jithar ba; boha ani bukhuh hade beredih lai di ba, ang jiblai bani yaohon ha ani bohoh hade khajao kha.

¹¹ Odehe, bonsi ani ha thilang ba, Ning khe gabang subung buthu, jadi buthu, grao buthu, ode Rajarao niha Madai grao riyaba khe asaba dara jang ning baiphin ma nang ma se, bonsi odehe thiba.